د امریکا د ملکي استخباراتي پخوانۍ شنونکې بېټ بیلي، چې د افغانستان د جګړې په اړه یې کار کړی، وايي واشنګټن باید له افغان متحدانو سره د کړې ژمنې د پوره کولو لپاره عملي ګامونه واخلي.
د خیبر پښتونخوا اعلی وزیر سهیل اپریدي ویلي، د تحریک انصاف د بنسټګر عمران خان د روغتیا په اړه وروستی حکومتي راپور اندېښمنوونکی دی او باید د هغه درملنه د شخصي ډاکټرانو تر څارنې او د کورنۍ په شتون کې په یوه مجهز روغتون کې ترسره شي.
د بېپولې خبریالانو سازمان (ار ایس ایف) وايي، په پاکستان کې، په ځانګړې توګه د پاکستان تر ادارې لاندې کشمیر کې، د رسنیو د ازادۍ پر وړاندې فشارونه په خطرناک ډول زیات شوي او چارواکي هڅه کوي د سیمې په اړه د معلوماتو خپرېدل محدود کړي.
د بلوچستان ایالتي حکومت ویلي، د زیارت ولسوالۍ په مانګي بند پمپینګ سټېشن د شوي برید او په پایله کې د پولیسو د وژل کېدو د پېښې د پلټنو لپاره قضایي کمېسیون جوړ کړل شوی دی.
د طالبانو ویاند ذبیحالله مجاهد وايي، طالبان د افغانستان او پاکستان ترمنځ د روان کړکېچ د هواري لپاره د چین او نورو هېوادونو د منځګړیتوب هرکلی کوي او له خبرو او مذاکراتو ملاتړ کوي.
په جینوا کې د افغانستان دایمي استازی نصیر احمد اندېشه وايي، د افغانستان د بشري حقونو د څار لپاره د ملګرو ملتونو میکانیزمونه باید په جنیوا کې پاتې شي او ویانا ته یې انتقال به د مدني ټولنې لپاره اضافي ستونزې رامنځته کړي.
د جمهوریت پر مهال د چارو ادارې مشر فضلمحمود فضلي وايي، افغانستان د طالبانو د سیاستونو له امله د مصنوعي ځیرکتیا او ټکنالوژۍ له نړیوال انقلاب څخه د وروسته پاتې کېدو له ګواښ سره مخ دی.
د امریکا د مرکزي استخباراتو ادارې پخوانۍ ماموره سارا اډمز وايي، د طالبانو د مشر هبتالله اخوندزاده له خپلو جنګیالیو او پلویانو څخه د «اطاعت» غوښتنه په داسې وخت کې شوې چې د دې ډلې په منځ کې د واک او نفوذ پر سر، په ځانګړې توګه د شمالي ولایتونو د کنټرول په اړه، اختلافات ژور شوي دي.
د ترکیې لپاره د امریکا سفیر او د عراق په چارو کې ځانګړي استازي ټام بارک د کردستان د سیمې پر لومړي وزیر مسرور بارزاني او په اربیل کې د هغه پر دفتر برید په کلکه غندلی او دا یې د سیمې ثبات ته «مستقیم ګواښ» بللی دی.
په اسلام اباد کې د طالبانو سفير سردار احمد شکېب ويلی، طالبان د مقابلې یا شخړې سیاست نه تعقیبوي او چاته اجازه هم نه ورکوي چې د افغانستان خاوره «د کوم بل هېواد د امنیت او ثبات پر ضد وکاروي».
د مقاومت په نامه طالب ضدې وسله والې جبهې ادعا کړې چې د بغلان ولایت د فرینګ ولسوالۍ پر مرکز یې په برید کې د طالبانو درې غړي وژلي او ټپیان کړي دي.
د بښنې نړیوال سازمان د جنوبي اسیا سیمهییز دفتر وايي، د ۲۰۲۱ کال په اګست کې د طالبانو بیا واکمنېدو په افغانستان کې په پراخه کچه د بشري حقونو بحران رامنځته کړی دی.
د خيبرپښتونخوا د قبايلي ولسواليو پوليسو، چې د قبايلي ولسواليو په ايالت کې د ورګډېدو وړاندې ليويز او خاصه دار ځواکونه وو، د خپلو حقونو لپاره په خيبر پاس کې اعتراضي پرلت کړی دی.
د بشري حقونو د څار سازمان د افغانستان د برخې څېړونکې فرشته عباسي وايي، افغانستان د طالبانو تر واک لاندې د افغانانو د جبري ستنولو لپاره خوندي هېواد نه دی او بېرته ستانه شوي کسان د ځورونې، خپلسرو نیونو او شکنجې له ګواښ سره مخ کېدای شي.
د کابل ښار د لویدیځ د دشت برچي په مهدیه ښارګوټي کې د یوه ښوونځي دننه د لاسي بم په چاودنه کې لږ تر لږه ۵۲ کسان ټپیان شوي چې د امنیتي سرچینو په وینا، ډېری یې ماشومان دي.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ ویلي، پر ښځو او نجونو د طالبانو محدودیتونه پراخې ټولنیزې، اقتصادي او رواني اغېزې لري. نوموړي افغان ښځو ته په خطاب کې ویلي:«تاسو یوازې نه یاست، موږ تاسو نه یاست هېر کړي.»
د ډونالډ ټرمپ استازی جېرډ کوشنر او د اسراییل لومړی وزیر بنیامین نتنیاهو له اوږدو او مفصلو خبرو اترو وروسته د غزې د شخړې د هواری او راتلونکي بهیر په تګلاره هوکړې ته رسېدلي دي.
د امریکا ولسمشر ډونالډ ټرمپ وايي، ایران باید د جګړې د پای ته رسېدو لپاره تسلیم شي. نوموړي همداراز ګواښ کړی، که عمان د هرمز تنګي د سوداګریزې بېړۍچلونې د بېرته عادي کولو په هڅو کې خنډ شي، امریکا به پرې برید وکړي.
د طالبانو د کورنیو چارو وزیر سراج الدین حقاني په خوست کې د خپل ورور بدرالدین حقاني په نوم ۲۰ بستریز روغتون پرانېست. بدرالدین حقاني د حقاني شبکې یو له مهمو قوماندانانو و چې په ۲۰۱۲ کال کې په شمالي وزیرستان کې د امریکا په بېپیلوټه هوايي برید کې ووژل شو.
د طالبانو د ریاست الوزرا اداري مرستیال عبدالسلام حنفي د بامیان پوهنتون د ۱۲۲۵ محصلانو د فراغت په مراسمو کې ویلي، افغانستان په بېلابېلو برخو کې مسلکي ځوانانو ته جدي اړتیا لري. نوموړي د پوهنتون له تازه فارغه شویو ځوانانو غوښتنه کړې چې خپل علم د هېواد د پرمختګ لپاره وکاروي.
د ایران د بهرنیو چارو وزارت ویاند اسماعیل بقایي وايي، تهران لا هم د طالبانو د رسميت پېژندنې په اړه وروستۍ پرېکړې ته نه دی رسېدلی، خو د نوموړي په وینا، د طالبانو په رسمیت نه پېژندل باید د ایران او افغانستان ترمنځ د اړیکو او دوه اړخیزې همکارۍ د دوام او پیاوړتیا لپاره خنډ ونه ګرځي.