د طالبانو تر واک لاندې د هواپوهنې ادارې خبر ورکړی، چې نن سېشنبه (د زمري ۲۷مه) په ۶ ولایتونو کې د شړکنده باران، تالندې برېښنا، تېزو سېلیو، خاورو دوړو او سېلابونو راوتو اټکل شوی دی.
د طالبانو ویاند ذبیح الله مجاهد د یادې ډلې او پاکستان ترمنځ د کړکېچ د حل لپاره د چین او نورو هېوادونو له منځګړیتوب هرکلی وکړ او ویې ویل، چې دوی د خبرو اترو او مذاکراتو ملاتړ کوي. هغه د دوشنبې په ورځ (د زمري ۲۶مه) هیله څرګنده کړه، چې د منځګړو هڅې به «مثبتې» پایلې ولري.
د رویټرز/ایپسوس د یوې نظرپوښتنې له مخې، د امریکا د ولسمشر ډونالډ ټرمپ د محبوبیت کچه راټیټه شوې او د ولسمشرۍ پرمهال تر ټولو ټیټې کچې ته رسېدلې ده. د دغه خبر له مخې، ۶۴ سلنه کسانو د هغه له کړنو سره مخالفت ښودلی دی.
د پاکستان اېکسپرېس ټربیون ورځپاڼې د راپور له مخې، په اډیاله زندان کې د عمران خان د طبي معاینې لپاره جوړ شوي بورډ سپارښتنه کړې چې نوموړي ته دې هره ورځ د یو ساعت مزل او استراحت زمینه برابره شي، څو ذهني فشار یې راکم شي.
په خیبر پښتونخوا او بلوچستان کې د افغان کډوالو پر ضد د نیولو لړۍ لاهم په چټکۍ سره روانه ده. په چارسده او کوټه کې د بېلابېلو عملیاتو پرمهال ۱۳ افغانان نیول شوي دي. یوازې په چارسده کې د ځایي ادارې او پولیسو په ګډو عملیاتو کې ۶ افغان کډوال نیول شوي دي.
د پېښور ځایي رسنیو راپور ورکړی، چې په دغه ښار کې د مېشتو افغان کډوالو پر ضد د کور په کور عملیاتو لپاره چمتووالی بشپړ شوی او ښایي چې دغه عملیات د شپې لهخوا ترسره شي. د راپور له مخې، په خیبر پښتونخوا کې د مېشتو شاوخوا یو مېلیون افغان کډوالو معلومات راټول شوي دي.
د افغانستان د متحدې جبهې مشر سمیع سادات له هغه پخوانیو افغان امنیتي او دفاعي ځواکونو چې اوس له طالبانو سره همکاري کوي غوښتي، چې په ۱۵ ورځو کې د یادې ډلې له لیکو ووځي. هغه خبرداری ورکړی، چې تر یادې مودې وروسته له طالبانو سره همکار کسان به د «پوځي اهدافو» په نوملړ کې شامل شي.
د ترکیې ولسمشر رجب طیب اردوغان د امریکا له ولسمشر ډونالډ ټرمپ سره د ټیلیفون په کرښه په خبرو کې د واشنګټن او تهران ترمنځ د کړکېچ کمولو لپاره له ایران سره د خبرو اترو د دوام غوښتنه وکړه.
د ډلهییز امنیت تړون سازمان سرمنشي طالقبېک ماسادکوف وايي، چې د افغانستان په یوشمېر سرحدي سیمو کې بېثباتي د سیمې امنیت ګواښي. هغه ټینګار وکړ، اوسني وضعیت ته په پام دا اړینه ده چې له افغانستان سره د پولې کنټرول پیاوړی شي.
بدخشان کې وروستۍ پېښه باید د طالب قوماندانانو ترمنځ سیمهییز اختلاف یا د سرو زرو د کانونو پر سر محدوده شخړه ونه ګڼل شي. دغه ولایت کې روان وضعیت ښايي د طالبانو د حکومت د یوه مهم جوړښتي تناقض نښه وي؛ داسې تناقض چې ریښې یې د وسلهوالو ډلو په اقتصادي منطق او د «غنیمت» په مفهوم کې دي.
د افغانستان لپاره د پاکستان پخوانی ځانګړی استازی اصف درانی وايي، طالبان باید د یوې وسلهوالې ډلې په څېر چلند څخه واټن واخلي او د یوه مسوول حکومت او د نړیوالې ټولنې د یوه غړي په توګه چلند وکړي، نه د یوې نیمهپوځي ډلې په څېر.
د ملګرو ملتونو د نړیوالو اړیکو مشرې ملیسا فلمینګ وايي، په افغانستان کې د ښځو او نجونو د حقونو بحران کمساری دی او نړیواله ټولنه باید دا وضعیت هېڅکله هېر نه کړي.
د طالبانو مخالفې ډلې، ازادۍ جبهې د کابل په لویدیځ کې د یوه ښوونځي مخې ته چاودنه غندلې او ویلي یې دي چې په دې پېښه کې له ۵۰ ډېر کسان، چې ډېری یې زدهکوونکي دي، ټپیان شوي دي. دوی زیاته کړې چې د دشت برچي چاودنه د طالبانو د امنیت ادعا درواغ ثابتوي.
د ښځو او ماشومانو د حقونو د څېړنې بنسټ له طالبانو غوښتي چې د دغه بنسټ شپږ نیول شوي کارکوونکي دې سمدستي او له کوم قید او شرط پرته خوشې کړي.
د ملګرو ملتونو د ښځو برخې اجراییه مشرې سیما باهوس د طالبانو د بیا واکمنېدو د پنځم کال په مناسبت ویلي، په افغانستان کې د ښځو او نجونو محرومیت باید هېڅکله عادي ونه ګڼل شي.
د طالبانو په اداره کې دننه ځینو سرچینو افغانستان انټرنشنل ویلي، په کندهار کې د طالبانو د مشر هبتالله اخوندزاده نږدې کړۍ له ۱۲ یا ۱۳ کلونو څخه د لوړ عمر لرونکو نجونو پر مخ د دیني مدرسو د تړلو طرحه ارزوي.
د افغانانو د لېږد او بیا مېشتېدو د ملاتړ بنسټ افغان ایواک په خپل اوونیز راپور کې ویلي چې د زرګونو افغانانو د لېږد بهیر په مهم پړاو کې دی او تمه ده چې د امریکا د ۲۰۲۷ مالي کال د کډوالو د منلو راتلونکې پرېکړه د دغو افغانانو پر برخلیک مستقیم اغېز وکړي.
د جمعیت علمای اسلام ګوند مشر مولانا فضل الرحمن ویلي، پاکستان او افغانستان تاریخي، مذهبي او کلتوري اړیکې لري او دواړه هېوادونه باید د دوو پیاوړو او سولهییزو ګاونډیانو په توګه د خپل ګډ راتلونکي لپاره نوې او پیاوړې بنسټونه جوړ کړي.
په نوي ډیلي کې د طالب سفیر نوراحمد نور د طالبانو د بیا واکمنېدو د پنځم کال په مراسمو کې له هند سره د اړیکو د لا پراختیا غوښتنه کړې او ویلي یې دي چې افغانستان باید د سیالیو د ډګر پر ځای د سیمهییز اتصال، همکارۍ او ګډې اقتصادي ودې پُل وګرځي.
د عوامي نشنل ګوند د خیبر پښتونخوا ایالتي مشر میا افتخار حسین ويلي، د پاکستان له واکمنو پوښتم چې که د هند، ایران، امریکا او اسرايیل ترمنځ د شخړو د هواري لپاره هڅې کولی شي، نو له افغانستان سره جګړه ولې نه شي درولی؟.
د ایران ولسمشر مسعود پزشکیان وايي، د ایران د هغو کسانو د کلونو اسارت تجربه چې د جګړې پر مهال بندیان شوي وو، یوازې د جګړې د تاریخ یوه برخه نه، بلکې د هغو کسانو د مقاومت روایت دی چې کړاوونه یې وزغمل، خو د ایران عزت یې پرېنښود.