د یادې ډلې د پاکستان څانګې په یوه خپره کړې اعلامیه کې د بلوچستان په کویټه ښار کې پر شیعه وو د برید مسوولیت پرغاړه اخېستی. په دغه برید کې، چې د هزارګنجي سیمې هزاره شیعه پکې په نښه شوي، د دوو تنو د وژل کېدو خبر ورکړل شوی.
د طالبانو د ننګرهار مرستیال والي غلام الرحمن حیدري د ملګرو ملتونو د سرمنشي له ځانګړې استازې او په افغانستان کې د دغه سازمان له عمومي رییسې جورجيټ کګنون سره کتلي.
د طالبانو د بهرنیو چارو وزیر امیرخان متقي په کابل کې د ترکیې د سفارت له سرپرست سادین ایلدز سره په لیدنه کې د سیمې پر وروستیو تحولاتو او د چین په اورمچي ښار کې د شویو خبرو اترو په اړه خبرې کړې دي. متقي هیله ښودلې چې وړې ستونزې به د خبرو د پرمختګ مخه ونه نیسي.
د ایران او امریکا او اسرییل ترمنځ د شخړو له امله اروپايي هوايي شرکتونه، په ځانګړي ډول د سویس هوايي شرکت، اړ شوي چې د اسیا پر لور د الوتنو لپاره د افغانستان هوايي حریم وکاروي. خو پیلوټان الوتنې پخپله همغږې کوي او طالبان د هرې الوتنې پر سر ۷۰۰ ډالره فیس اخلي.
د ازبکستان د اندیجان ولایت د ۱۱۰ سوداګرو یو پلاوي د یاد ولایت د والي او سوداګرۍ خونې د رییس په مشرۍ د افغانستان د بازارونو د ارزونې او اقتصادي همکاریو پراختیا په موخه کابل ته سفر کړی دی. یاد پلاوي د طالبانو د اوبو او کرنې وزارت له وزیر سره کتلي.
د طالبانو د پېښو پر وړاندې د مبارزې ادارې ویلي چې د یادې ادارې د ولایتي ریاستونو د لومړنیو راپورونو له مخې، په تېرو ۲۴ ساعتونو کې د سختو بارانونو، سېلابونو، د دیوالونو نړېدو او د غرونو ښویېدنې له امله لږ تر لږه ۱۰ تنه مړه شوي او ۱۵ نور ټپیان دي.
د کونړ د خاص کونړ قومي مشرانو افغانستان انټرنشنل ته وویل، چې د طالبانو ځايي چارواکي د کلیو د حریم په تړاو د خپلې ډلې د مشر هبت الله حکم نه عملي کوي. دوی نیوکه کوی، چې د طالبانو کور او ښار جوړونې وزیر ملا نجیب الله حقاني د حکم خلاف په خاص کونړ ولسوالۍ کې ځمکې پر خپلوانو وېشلې دي.
د پاکستان په بلوچستان ایالت کې ځايي پولیسو خبر ورکړی، د دغه ایالت د کویټې ښار لوېدیځ بایپاس هزارګنجي سیمه کې ناپېژاندو وسلهوالو پر هزاره وګړو ډزې کړې چې له امله یې دوه کسه وژل شوي او ۳نور ټپیان دي.
د پاکستان د سمندر ساتونکو د ګزمې پر یوې کښتۍ د بلوچستان د ګوادر جیواني سیمې ته نږدې برید شوی او په پېښه کې درې نظامیان وژل شوي دي. تر اوسه محلي چارواکو د برید د ډول یا د بریدګرو په اړه نور جزئیات نه دي خپاره کړي.
د طالبانو د کورنیو چارو وزارت خبر ورکړی، چې په لسو ولایتونو کې ۳۳ کسان د «غلا، ناقانونه وسلو د لېږد» او نورو جرمونو په تور نیول شوي دي. د یاد وزارت د خبرپاڼې له مخې؛ له دې ډلې ۲ کسان په بلخ، ۳ په هلمند، ۲ فراه، ۳ غزني، ۲ نیمروز او ۴ په هرات ولایت کې د غلا په تور نیول شوي دي.
د ملي امنیت پخواني رییس رحمتالله نبیل د هرات په انجیل ولسوالۍ کې پر ملکي وګړو د مرګوني برید په غبرګون کې ویلي، چې د عقیدې او باور له امله د بېګناه خلکو وژل د انسانیت ضد جنایت دی.
هندي رسنیو راپور ورکړی، چې د دغه هېواد مشهوره سندرغاړې اشا بهوسلې د یکشنبې په ماسپښین مړه شوه. هغه د شنبې په شپه د ممبۍ په یوه روغتون کې د روغتیایي وضعیت خرابېدو له امله بستر شوې وه. د نوموړې زوی نن د هغې مړینه تایید کړه.
په کابل کې د ایران سفارت خبر ورکړی، په کندهار کې د ایران کونسولګرۍ نوي چارسمبالي محمدرضا نفر د سیستان او بلوچستان ولایت له مسوولینو او د مېلک سیمې له ځايي چارواکو سره په لیدنه کې ټینګار کړی چې د مېلک سرحدي دروازه باید د بندرعباس او چابهار په کچه پیاوړې شي.
په پنجشېر کې د طالبانو د والي ویاند سیفالدین لټون خبر ورکړی، چې په تېر یوه کال کې یې د ۴مېلیونه او ۱۷۸زره ډالرو په ارزښت تر ۱۱۱زره قیراطه ډېر زمرد پلورلي دي. د هغه په وینا؛ د یاد ولایت دغه اندازه زمرد د ۲۳ ازاده داوطلبیو له لارې پلورل شوي دي.
د طالبانو د کرنې وزارت یکشنبه (د وري۲۳مه) منلې، چې په نیمروز ولایت کې د یادې ډلې د کرنې رییس نیازمحمد وهاج په یوې ټرافیکي پېښه کې مړ شوی دی. د طالبانو اړوندو رسنیو راپور ورکړی، چې دغه پېښه د نیمروز ولایت په دلارام ولسوالۍ کې شوې ده.
په برلین کې د افغانستان تر ۶۰ زیاتو علمي، سیاسي او ټولنیزو څېرو په ګډون د «ملي مرکې» تر سرلیک لاندې ناسته ترسره شوه. د ناستې ګډونوالو د طالبانو له لوري په تېرو څو کلونو کې د نجونو پر زدهکړو لګېدلی بندیز «ستر ظلم او د ملي ګټو لپاره نه جبرانېدونکی زیان» بللی دی.
د ازادۍ جبهې په نوم د طالبانو وسلهوالې مخالفې ډلې د یوې خبرپاڼې په خپرولو ادعا کړې، چې تېره شپه یې د کابل ښار ۱۶مې امنیتي حوزې اړوند په الوخېلو سیمه کې د طالبانو پر یوه رنجر موټر برید کړی. یادې جبهې زیاته کړې، چې په دغه برید کې دوه طالبان وژل شوي او دوه نور ټپیان دي.
د طالبانو د کرنې، اوبو لګولو او مالدارۍ وزارت خبر ورکړی، چې د دغه وزارت مرستیال مولوي صدراعظم عثماني د یاد وزارت د یوه تخنیکي پلاوي په مشرۍ د شپږ ورځني رسمي سفر لپاره د روسیې فدراسیون (مسکو او سنپترزبورګ) ته ولاړ.
په لغمان کې د طالبانو د کرنې، اوبولګولو او مالدارۍ ریاست خبر ورکړی، چې سږکال د دغه ولایت په شنوخونو کې د کرل شویو بادرنګو په حاصلاتو کې ۲۰ سلنه زیاتوالی راغلی دی. د یاد ریاست په وینا، تېر کال شاوخوا ۴زره ټنه بادرنګ راټول کړل شوي وو؛ خو سږکال دغه کچه ۵۱۶۰ ټنو ته رسېدلې ده.
په خیبر پښتونخوا کې په بېلابېلو پېښو کې د یوې ښځې په ګډون پنځه کسان وژل شوي، چې پهکې د فاروق په نوم د سولې کمېټې یو غړی هم شامل دی. پولیس وایي، چې د خیبر پښتونخوا په ټانک ولسوالۍ کې د ناپېژاندو وسلهوالو په ډزو کې د فاروق په نوم د سولې کمېټې دغه غړی وژل شوی دی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د وري ۲۲مه) ۷۰۸ کډوالې کورنۍ چې ټولټال ۳زره او ۹۰۲ کسان کېږي؛ له ایران او پاکستان نه افغانستان ته ستنې شوې دي.