د طالبانو د بهرنیو چارو وزیر امیرخان متقي د افغانستان لپاره د ملګرو ملتونو د سرمنشي له ځانګړې استازې او د یوناما له مشرې رباب فاطمې سره لیدلي دي. متقي د افغانستان په اړه د یوناما په ارزونو کې د وضعیت پر متوازن انعکاس او له طالبانو سره پر لازمې همغږۍ ټینګار کړی دی.
د اسلامي وحدت ګوند مشر محمد محقق د کندهار د پخواني امنیه قوماندان جنرال عبدالرازق اڅکزي په اتمه تلینغونډه کې پر طالبانو غږ وکړ چې په افغانستان کې له روانو ظلمونو، په ځانګړي توګه د شیعهوو د جایدادونو له راګرځولو او ځورولو لاس واخلي.
په تاجکستان کې د افغانستان سفیر ظاهر اغبر ویلي، چې د بغداد مهمې ناستې ته د طالبانو نه بلل کېدل په اسلامي نړۍ کې د دې ډلې د مشروعیت نشتوالی په ډاګه کوي. هغه ټینګار کړی، چې د ملت له ارادې پرته نړیوال اعتبار نه ترلاسه کېږي.
طالبانو د کندهار ښار د اوومې ناحیې اړوند د پنجوايي څلورلارې په سیمه کې د احمد په نامه یو ځوان صراف په ډزو وژلی. سرچینو افغانستان انټرنشنل ته ویلي، چې پر نوموړي د طالبانو له امنیتي پوستې نه د تېرېدو پرمهال ډزې شوې دي او وروسته یې په روغتون کې سا ور کړې ده.
د ټرمپ پخواني مرستیال او مشهور سیاستوال مایک پېنس ویلي چې پر روسیې د بندیزونو د لرې کولو په اړه د ډونالډ ټرمپ پریکړه د سناتور لینډسي ګراهام د میراث سپکاوی دی. نوموړي دا پریکړه د امریکا له ملي ګټو سره په ټکر کې بللې ده.
چین او پاکستان په سنکیانګ ایالت کې د «قراقرم ۲۰۲۶» په نوم ګډ پوځي تمرینونه وکړل. دغه تمرینونه په لوړو سیمو کې ترهګرۍ ضد عملیاتو ته ځانګړي شوي وو او موخه یې د دواړو هېوادونو ترمنځ د پوځي همکاریو پیاوړتیا او د ځواکونو د همغږۍ زیاتول ښودل شوي.
د طالبانو د صنعت او سوداګرۍ وزارت د عوایدو راټولولو او مبدا تصدیقپاڼو د وېش بورډ څلورمه غونډه کې د عوایدو د راټولولو پر شفافیت او د انوایس پر منظم ثبت بحثونه کړي. نورالدین عزیزي د عوایدو پر شفافې راټولونې، د مبدا تصدیقپاڼو پر شفاف وېش او د انوایسونو پر دقیق ثبت ټینګار کړی دی.
د طالبانو د کور او ښار جوړولو وزارت له ازبکستاني پلاوي سره د کابل د ماسټر پلان، ښارګوټو، ریل پټلیو او لویو ودانیزو پروژو په اړه خبرې کړې دي. د طالبانو د ښارجوړونې وزارت ویلي، چې ازبکستان د تخنیکي تجربو د لېږد په برخه کې همکارۍ ته چمتووالی ښودلی دی.
د افغانستان کرکټ بورډ د هانکانګ شپږ اوریزو سیالیو لپاره د ګلبدین نایب په مشرۍ د شپږ کسیزې لوبډلې نوملړ اعلان کړ. د هانکانګ شپږ اوریزه کرکټ سیالي د روانې اکټوبر میاشتې په ۳۰ مه پیلیږي.
د طالبانو د ننګرهار ولایت امنیه قومانداني وايي، چې په شیرزادو ولسوالۍ کې یې د چرسو یوه لویه کارخونه کشف او تخریب کړې ده. د یادې قوماندانۍ په وینا، په عملیاتو کې ۵۲۰ کیلوګرامه خام او ۸۱ کیلوګرامه پاخه چرس او د چرسو د میده کولو یو ماشین سوځول شوي دي.
روسي چارواکي وايي، د اوکراین د ډرون بریدونو له امله په سنپترزبورګ او لینینګراډ کې یو کس وژل شوی او ۱۵ نور ټپیان دي. بریدونه د تېلو پر تاسیساتو، لوژستیکي او معلوماتي مرکزونو شوي خو بل خوا روسي چارواکو د «۱۰۱۵ » اوکرایني ډرونونو د نسکورولو ادعا هم کړې ده.
د افغانستان د شنونکو شبکې د راپور له مخې، ایټالیا له تېرو دوو لسیزو راهیسې اروپا ته د افغان کډوالو مهم ترانزیټي مسیر دی. د کار او استوګنې محدود فرصتونه او اقتصادي ستونزې ددې لامل شوي چې ډېری افغانان له تریسته ښار څخه نورو اروپايي هېوادونو ته ولاړ شي.
د ایران د بهرنیو چارو وزیر عباس عراقچي وايي، چې که امریکا د تهران شرطونه ومني، هرمز تنګی به په شپږو ورځو کې بېرته پرانیستل شي او په اوومه ورځ به خبرې پیل شي. د ایران شرطونه د بندیزونو لرې کول او په سیمه کې د جګړو پای ته رسول دي.
د طالبانو د احصایې او معلوماتو اداره وایي چې په وږي میاشت کې د خوراکي توکو په بیو کې ۰،۱ سلنه او د غیرخوراکي توکو په بیو کې ۰،۶ سلنه ټیټوالی راغلی دی. خو ځینو افغان سوداګرو افغانستان انټرنشنل ته وویل، چې د لارو په بندېدو سره د خوراکي توکو بیې درې سلنه لوړې شوې دي.
سرچینو افغانستان انټرنشنل ته ویلي، چې طالبانو د کندهار په سپین بولدک ولسوالۍ کې خلکو ته د متحدې جبهې د دوو وژل شویو جنګیالیو د جنازې په مراسمو کې د ګډون اجازه نه ده ورکړې او د هغوی د فاتحې پر مراسمو یې هم بندیز لګولی دی.
د ایران پارلمان مهرداد اخلاقي د دفاع د نوي وزیر په توګه تایید کړی دی. نوموړي په خپله وینا کې ویلي، چې د امریکا د موربم د استعمال د مخنیوي لپاره یې لازم تدابیر نیولي، خو په ورته وخت کې یې خبرداری ورکړی، چې واشنګټن ته به د برید «خورا پریکنده» ځواب ور کړي.
د ایران د سویلي خراسان ولایت چارواکي وايي، د روان کال په لومړیو شپږو میاشتو کې د ایران او افغانستان پر پوله د ماهیرود بندر له لارې ۸۲۴ زره ټنه ترانزیټي توکي لېږدول شوي چې د تېر کال د همدې مودې په پرتله ۹۲ سلنه زیاتوالی ښيي.
د پاکستان د رواني روغتیا د لومړۍ سراسري ملي سروې موندنې ښيي چې په دغه هېواد کې نږدې له هرو درېیو لویانو یو تن له رواني ناروغۍ یا رواني ستونزو سره مخ دی.
افغانستان کې د سره صلیب نړۍوالې کمیټې مشر هیرلي مارکس ویلي چې دغه کمیټه غواړي د طالبانو تر واک افغاني سرې میاشتې سره د همکارۍ درې کلن تړون لاسلیک کړي چې موخه یې د اړمنو افغانانو لاسنیوی ښودل شوی دی.
د ملګرو ملتونو د سرمنشي ځانګړې استازې رباب فاطمه کابل ته رسېدلې او په افغانستان کې یې د ملګرو ملتونو د مرستندویه پلاوي (یوناما) د مشرې په توګه خپله دنده پیل کړې ده. نوموړې په ډیپلوماسۍ، نړیوالو اړیکو او عامه خدمتونو کې تر ۳۰ کلونو زیاته تجربه لري.
د ملګرو ملتونو د بشري حقونو عالي کمېشنر فولکر ترک وايي، د افغانستان د خلکو وضعیت د خرابېدو په حال کې دی او نړیوالې ټولنې د افغانانو ستونزو ته کافي پاملرنه نه ده کړې؛ په داسې حال کې چې د ښځو پر حقونو محدودیتونه، لوږه او د نړیوالو مرستو کمښت بشري بحران لا پراخوي.