د هرات اوسېدونکی او د افغانستان د فوټبال نړۍوال لوبڅار جلیل احمد جامي د ۲۰۲۶کال د نړۍوالو لوبڅارانو په نوملړ کې شامل شوی او د فوټبال نړۍوال فدراسیون (فیفا) لهخوا لېږل شوي د لوبڅارۍ وسایل یې هم ترلاسه کړي دي.
د طالبانو د ریاستالوزرا اداري مرستیال عبدالسلام حنفي د اسلامي همکاریو سازمان د سرمنشي له مرستیال او د افغانستان لپاره د دغه سازمان له ځانګړي استازي طارق علي بخیت سره د روغتیا، پوهنې او کډوالو لپاره د کورونو جوړولو په برخه کې د مرستو پر دوام خبرې کړې دي.
د سعودي عربستان چارواکي وايي، د ریاض پر ملک خالد نړۍوال هوايي ډګر په تازه برید کې یو کس وژل شوی او ۱۱ نور ټپیان شوي دي. د سعودي عربستان د هوايي چلند ادارې ویلي، وژل شوی کس پاکستانی وګړی و.
د خوړو نړۍوال پروګرام په خپل اونیز راپور کې ویلي، چې په افغانستان کې د خوراکي توکو د بیو کچه د تېرکال پرتله لوړه ده. راپور زیاتوي، د کارګرو کمښت او د پېرلو کمزوري ځواک ګڼو خوراکي توکو ته د خلکو لاسرسی محدود کړی دی.
ملګرو ملتونو په یوه تازه راپور کې ویلي، چې په افغانستان کې د ۲۰۲۳ او ۲۰۲۵ کلونو ترمنځ د ماشومانو له حقونو د جدي سرغړونې ۴زره او ۵۸۲ پېښې ثبت شوې دي. راپور په دې موده کې د ۱۴۱۵ ماشومانو د مرګ ژوبلې خبر هم ورکړی دی.
په نیمروز کې د طالبانو امنیې قوماندانۍ ویاند ګل محمد قدرت خبر ورکړی، چې د دغه ولایت مرکز زرنج ښار د زرنج-دلارام پر لویه لار د دوو ترافیکي پېښو له امله یو کس مړ او درې کسان ټپیان شوي دي. هغه وایي، لومړۍ پېښه چې د دغه لویې لارې پر عمومي کنډک رامنځته شوې درې کسان پهکې ټپیان شوي دي.
د ځمکپوهنې نړیوالو مرکزونو د افغانستان په شمال ختیځ بدخشان ولایت کې د ریښتر په کچه د ۳،۹ درجې زلزلې د رامنځته کېدو خبر ورکړی دی. د معلوماتو له مخې، د دغې زلزلې مرکز د جرم ولسوالۍ په ۴۶ کیلومترۍ سوېل ختیځ کې و.
پاکستان، سعودي عربستان، ترکیې او مصر په یوې ګډې اعلامیې کې پر سعودي د ایران له ملاتړه د برخمنو یمني یاغي وسلهوالو بریدونه په کلکه غندلي او په سمدستي ډول یې د دغو بریدونو د درېدو غوښتنه کړې.
متحده جبهه ادعا لري، چې د غور په مرکز فیروزکوه ښار کې یې پر طالبانو برید کړی او په پایله کې یې یو طالب وژل شوی او یو بل یې ټپي دی. دغې جبهې ټینګار کړی، چې فیروزکوه ښار به «د ظالمانو له شر» څخه ازاد شي. طالبانو د تېر په څېر د مخالفو جبهو دغه ډول ادعاوو ته څه غبرګون نهدی ښودلی.
د سعودي رسمي خبري اژانس خبر ورکړی چې د بهرنیو چارو وزیر فیصل بن فرحان، له خپل ایراني سیال عباس عراقچي سره ټلیفوني خبرې کړي او په منځني ختیځ کې د وروستیو بدلونونو او روان تاوتریخوالي پر کمولو یې نظریات تبادله کړي دي.
د افغانستان د عدلیې پخوانی وزیر فضلاحمد معنوي په دغه مقاله کې، چې افغانستان انټرنشنل ته یې لیکلې ده، پر دې بحث کوي چې ولې د طالبانو او اسلاماباد اړیکه له ملګرتیا څخه مقابلې ته رسېدلې ده او دا ناورین د ایران، هند او د افغانستان د راتلونکي لپاره څه پایلې لري.
په کاناډا کې د پښتون ژغورنې غورځنګ غړو د «پاکستان د ظلمونو افشا کول» په نوم نړۍوال کنفرانس پیل شو او لا هم روان دی. تر اوسه په دغې غونډه کې ګډونوالو په پښتونخوا کې پر پښتنو د پاکستان د روانو ظلمونو په تړاو څرګندونې کړې دي.
د طالبانو د ترانسپورټ او هوايي چلند وزارت د هواپوهنې ادارې د افغانستان په نهو ولایتونو کې د سختو بارانونو، تالندې برېښنا، تېزو بادونو او سېلابونو د راوتلو اټکل کړی دی.
د طالبانو د کانونو او پټرولیم وزارت مرستیال محمد اسحاق صاحبزاده وايي، د مالګې د پروسس له کارخونو سره د همکارۍ او د تولیدي ظرفیتونو د لوړولو له لارې هڅه کوي، چې په راتلونکي کې د افغاني مالګې صادراتو ته زمینه برابره کړي. افغانستان د مالګې په برخه کې ځان بسیاینې ته رسېدلی دی.
د طالبانو د ۲۰۷ الفاروق قول اردو اعلان کړی، چې په فراه کې یې د ښځو او ماشومانو په ګډون ۸۴ کسان ایران ته د ناقانونه تګ په تور نیولي. دا په داسې حال کې ده چې د طالبانو له بیا واکمن کېدو وروسته ډیری افغانان د بې وزلۍ او د دغې ډلې د تګلارو له امله په مرګونو لارو کډوالۍ ته زړه ښه کوي.
د ملګرو ملتونو سرمنشي انتونیو ګوتریش وايي، په ټوله نړۍ کې له هرو پنځو نجونو یوه له ۱۸ کلنۍ مخکې واده کېږي، چې له امله یې د میلیونونو نجونو زدهکړې، روغتیا او خوندیتوب له جدي ستونزو سره مخ کېږي.
د طالبانو د اقتصاد وزیر د اروپايي ټولنې د استازولۍ له نوي مشر نیکولا بلومو سره په کتنه کې د اقتصادي بندیزونو د لرې کولو غوښتنه کړې او له اروپايي ټولنې یې غوښتي، چې له افغانستان سره مالي اړیکې پراخې او اروپايي شرکتونه پانګونې ته وهڅوي.
د طالبانو تر چتر لاندې د سوداګرۍ او پانګونې خونې مشر کریم هاشمي، د افغان–امریکا د سوداګرۍ خونې له مشر جیفري ګریکو سره په لیدنه کې له امریکايي پانګوالو وغوښتل چې په افغانستان کې د لویو پروژو لپاره سهامي شرکتونه جوړ کړي. هغه د نفتو چاڼ او د کانونو پروسس د پانګونې ښه فرصتونه وبلل.
د طالبانو د بلخ د والي دفتر وایي، له خپلو ملاتړو ملایانو سره یې د ملا هبت الله اخوندزاده په امر مشورتي غونډه پیل کړې. په پام کې ده، چې دا ډول غونډې په شاوخوا ولایتونو کې هم وشي. سرچینې وایی، د دې غونډو لامل د وسله والو مخالفانو له زیاتو شویو فعالیتونو د طالب چارواکو اندېښنې ښيي.
د امرالله صالح په مشرۍ زرغون بهیر ویلي، چې د یوې غونډې پر مهال یې پر خپل تشکیلاتي جوړښت د بیا کتنې پرېکړه کړې. یاد بهیر د صالح یو غږیز پیغام هم خپور کړی، چې پکې طالبانو ته د چانس ورکولو په تړاو د سیمه ییزې او نړیوالې اجماع د «پاشلتیا» او طالب ضد ډلو ته د « نویو فرصتونو» خبره شوې.
د طالبانو د برېښنا شرکت مشر د کاسا–زر پروژې په تړاو د قرغزستان سیمهییزو غونډو کې د دغې پروژې پر ژر بشپړېدو او د پاتې چارو بشپړولو لپاره د اضافي مالي سرچینو د برابرولو پر اړتیا ټینګار کړی. دغه پروژه له مرکزي اسیا څخه افغانستان او پاکستان ته د برېښنا لېږد په موخه طرحه شوې ده.