د طالبانو تر چتر لاندې د سوداګرۍ او پانګونې خونې مشر کریم هاشمي، د افغان–امریکا د سوداګرۍ خونې له مشر جیفري ګریکو سره په لیدنه کې له امریکايي پانګوالو وغوښتل چې په افغانستان کې د لویو پروژو لپاره سهامي شرکتونه جوړ کړي. هغه د نفتو چاڼ او د کانونو پروسس د پانګونې ښه فرصتونه وبلل.
د طالبانو د بلخ د والي دفتر وایي، له خپلو ملاتړو ملایانو سره یې د ملا هبت الله اخوندزاده په امر مشورتي غونډه پیل کړې. په پام کې ده، چې دا ډول غونډې په شاوخوا ولایتونو کې هم وشي. سرچینې وایی، د دې غونډو لامل د وسله والو مخالفانو له زیاتو شویو فعالیتونو د طالب چارواکو اندېښنې ښيي.
د امرالله صالح په مشرۍ زرغون بهیر ویلي، چې د یوې غونډې پر مهال یې پر خپل تشکیلاتي جوړښت د بیا کتنې پرېکړه کړې. یاد بهیر د صالح یو غږیز پیغام هم خپور کړی، چې پکې طالبانو ته د چانس ورکولو په تړاو د سیمه ییزې او نړیوالې اجماع د «پاشلتیا» او طالب ضد ډلو ته د « نویو فرصتونو» خبره شوې.
د طالبانو د برېښنا شرکت مشر د کاسا–زر پروژې په تړاو د قرغزستان سیمهییزو غونډو کې د دغې پروژې پر ژر بشپړېدو او د پاتې چارو بشپړولو لپاره د اضافي مالي سرچینو د برابرولو پر اړتیا ټینګار کړی. دغه پروژه له مرکزي اسیا څخه افغانستان او پاکستان ته د برېښنا لېږد په موخه طرحه شوې ده.
د اتریش د کورنیو چارو وزارت وايي، دغه هېواد افغانستان ته د محکومو افغان وګړو د ستنولو لپاره چمتووالی نیسي. د دغه وزارت د معلوماتو له مخې، د ۲۰۲۶ کال په لومړیو شپږو میاشتو کې شاوخوا ۱۷۰ افغان وګړي له اتریش څخه اېستل شوي دي.
د طالبانو د عامې روغتیا وزیر، د اسلامي همکاریو سازمان له مرستیال څخه غوښتي، چې دغه سازمان دې له اسلامي هېوادونو څخه د طالبانو لپاره د روغتیایي تجهیزاتو، ظرفیت لوړونې او دوامداره روغتیایي ملاتړ په برابرولو کې مرسته وکړي.
د اوکراین ولسمشر ولادیمیر زیلینسکي اېبيسي ټلوېزیون ته وویل، چې که د روسیې ولسمشر ولادیمیر پوتین پر یوه ۶۰ ورځني بشپړ اوربند هوکړه وکړي، اوکراین چمتو دی په دې موده کې ولسمشریزې ټاکنې وکړي. د هغه دا څرګندونې د اوکراین د ټاکنو په تړاو د ټرمپ د نیوکو په ځواب کې دي.
د طالبانو د ریاستالوزرا اداري مرستیال عبدالسلام حنفي په کابل کې د اسلامي همکاریو سازمان له ځانګړي استازي طارق علي بخیت سره په لیدنه کې ویلي، چې د افغانستان خاوره به د هېڅ هېواد پر ضد ونه کارول شي.
د ایران د ملي امنیت شورا منشي محسن رضايي ویلي، چې تهران هره شپه په هرمز تنګي کې «پنځه یا شپږ» امریکايۍ کوچنۍ بېړۍ په نښه کوي. د نوموړي په وینا، دغه بېړۍ لویو تېلوړونکو بېړیو ته تېل لېږدوي او هرمز تنګی د ایران تر کنټرول لاندې دی.
د امریکا ولسمشر ډونالډ ټرمپ ویلي چې روسیه او اوکراین د انرژۍ پر اوربند هوکړې ته رسېدلي دي. ټرمپ پر ټولنیزو رسنیو په یوه پیغام کې ولیکل چې دا اوربند سملاسي پلی کېږي. ددغه اوربند له مخې به دواړه هېوادونه د یو اوبل د انرژۍ پر تاسیساتو بریدونه نه کوي.
سرچینو افغانستان انټرنشنل ته ویلي، چې طالبانو په کندهار د پنځم ټولګیو ۴۷۰ نجونې ښوونځي ته له تګ څخه منع کړې دي. طالبانو ویلي چې یادې نجونې بلوغ ته رسېدلې او نور باید له کوره بهر ونه ځي.
د کډوالۍ نړیوال سازمان ویلي چې له جیبوټي څخه یمن ته د ۳۰۵ کډوالو لېږدوونکې کښتۍ د ډبېدو له امله د ۱۵ ماشومانو په ګډون ۱۰۹ کسان مړه شوي او تر ۱۱۶ ډېر نور لادرکه دي.
په افغانستان کې د ترکیې سفیر سادین ایلدز بلخ او جوزجان ولایتونو ته د سفر پر مهال، د بلخ له والي محمد یوسف وفا سره پر دوه اړخیزې سوداګرۍ او اقتصادي او روغتیایي همکاریو خبرې کړې دي.
د ایران د بهرنیو چارو پخواني وزیرمحمد جواد ظریف وايي، په کابل کې د ایران سفیر د بهرنیو چارو وزارت ډیپلوماټ نه دی، بلکې د قــدس ځواک استازی دی، ځکه تهران کابل د ځان لپاره ګواښ ګڼي.
د ملګرو ملتونو د ماشومانو ملاتړ صندوق (یونېسف) د نجونو نړیوالې ورځې په مناسبت په افغانستان کې د کم عمره نجونو د ودونو د مخنیوي ترڅنګ د هغوی د زده کړو، روغتیا او خوندیتوب لپاره د سملاسي اوګډو هڅو غوښتنه کړې ده.
د طالبانو د اطلاعاتو او کلتور وزارت وايي، چې د ازبکستان د فرهنګي میراثونو پلاوي تخار ته د سفر پر مهال د اشکمش ولسوالۍ د «شاه مشرب بابا» تاریخي زیارت د معیاري بیارغونې ژمنه وکړه. یاد پلاوي ویلي چې د بیا رغونې په طرحه کې جومات، کتابتون، زرغونه سیمه او تمځای شامل دي.
د طالبانو د مالیې وزارت ویلي چې د ۴۴،۸ میلیونه افغانیو په ارزښت یې د مسافرو د توکو د کنټرول لپاره پنځه سکنرونه پېرلي، چې څلور په کابل نړیوال هوايي ډګر او یو د بلخ په حیرتان ګمرک کې نصب او د کارونې لپاره چمتو شوي دي.
د طالبانو د بهرنیو چارو وزیر امیرخان متقي د اسلامي همکاریو سازمان د سرمنشي له مرستیال طارق علي بخیت سره په لیدنه کې د افغانستان او سیمې پر وضعیت او د سیمې له هېوادونو او نړۍ سره د سیاسي او اقتصادي پرمختګونو په اړه خبرې کړې دي.
د افغانستان د بهرنیو چارو پخواني وزیر حنیف اتمر پر سعودي عربستان د یمني وسله والو وروستي بریدونه غندلي او وايي، د حرمین شریفین پر خاوره تېری د نه بښلو وړ عمل دی. اتمر ویلي چې د بېګناه ملکي وګړو وژل هېڅ ډول توجیه نه لري او ټوله اسلامي نړۍ باید دا پېښه وغندي.
په کابل کې د امام ابوحنیفه سوداګریز نندارتون کې ۳۲۳ کورنیو او بهرنیو شرکتونو خپل محصولات په شاوخوا ۷۰۰ غرفو کې نندارې ته وړاندې کړي دي. ګډونوال وايي، افغانستان د سیمهییز ترانزیټ، سوداګرۍ او پانګونې د پراختیا او نړیوالو بازارونو سره د اړیکو پیاوړتیا لپاره د پام وړ ظرفیت لري.
د کندهار یو شمېر صنعتکارانو افغانستان انټرنشنل ته ویلي، چې د برېښنا د سخت کمښت له امله له زیاتو لګښتونو سره مخ دي او که دغه ستونزه یې حل نه شي، ښايي خپلې فابریکې نورو ولایتونو ته ولېږدوي. د کندهار صنعتي پارک اوس په ۲۴ ساعتونو کې یوازې ۷ ساعته نامنظمه برېښنا لري.