د طالبانو د صنعت او سوداګرۍ وزیر نورالدین عزیزي د منځنۍ او سوېلي اسیا ترمنځ د اتصال په تړاو د ترمذ خبرو اترو په دویمه ناسته کې انلاین ګډون کړی او ویلي یې دي، چې افغانستان د منځنۍ او سوېلي اسیا ترمنځ د یو ارتباطي پُل په توګه د ځانګړي رول لوبولو وړتیا لري.
د زده کړو د ملاتړ نړۍوال بنسټ له پوهنتون نه د هغو ۷۴ افغان نجونو د فراغت مراسم ونمانځل چې د قطر د یوه بنسټ په ملاتړ سکالر شېپونه ورکړل شوي وو. دا هغه نجونې دي چې د طالبانو له واکمنېدو وروسته یې د زده کړو بهیر له خنډ سره مخ شوی و.
د کندهار ولایت د سپین بولدک له لارې ۱۹۹ افغان بندیان چې تازه د پاکستان له زندانونو خوشې شوي وو، نن طالبانو ته وسپارل شول. په کندهار کې د طالبانو د کډوالو او راستنېدونکو چارو ادارې ویلي، چې په دې ډله کې ښځې او ماشومان هم شامل دي.
د بغلان په دوشي ولسوالۍ کې د تازه کرل شویو چنارونو تر سیوري لاندې د کلي مشر غلام علي پویا ویاړي چې د جګړو له کلونو وروسته اوس خلک د ونو ارزښت بیا پېژني. هغه وویل، چې «مرغانو ته قفسونه مه جوړوئ»، ونې وکرئ، هغوی پخپله راځي.
د روسیې د صدراعظم مرستیال الکسي اوورچوک ویلي چې د افغانستان له لارې د اورګاډي پټلۍ د جوړولو پروژه، سره له دې چې سیمه له بېثباتۍ سره مخ ده، لا هم په فعاله توګه تر بحث لاندې ده.
د خیبر پښتونخوا سر وزیر سهیل اپریدي خبرداری ورکړی، که د پاکستان تحریک انصاف ګوند له بنسټګر عمران خان سره پر ملاقات بندیز دوام وکړي؛ نو د ګوند وکیلان او استازي به (د جون په ۱۰مه) د پاکستان د قامي اسمبلۍ مخې ته پرلت ووهي.
په کندهار کې د سږکال صادراتو لپاره تر سل ټنه زیات وچ انځر چمتو شوي دي. سوداګر وایي، د پاکستان له لارې د سوداګرۍ پر وړاندې رامنځته شویو خنډونو او د ایران پر مسیر د شته ستونزو له امله دغه محصول لاهم په ګدامونو کې بند پاتې دی.
د بشري حقونو یو بنسټ «الدمیر» وايي، د ۲۰۲۳کال په اکتوبر میاشت کې د اسراییل د جګړې له پیل راهیسې په غزه کې تر ۹۵۰۰ زیات فلسطینیان تري تم شوي دي. د یاد بنسټ په وینا؛ په دې ډله کې ۴زره او ۷۰۰ ښځې او ماشومان هم شامل دي.
سرچینو افغانستان انټرنشنل ته ویلي، چې په کویت کې د افغانستان سفارت د طالبانو یوه ډیپلومات ته سپارل شوی. د سرچینو په وینا؛ د طالبانو د بهرنیو چارو وزارت خپل یو ډیپلوماټ مولوی محمدشفیق خطیب کویت ته د نوي سفیر په توګه معرفي کړی.
په هرات کې د لبنیاتو ټولنې مسوولین وایي، چې اوسمهال په دغه ولایت کې شاوخوا ۲۵۰ د لبنیاتو پلورلو هټۍ او ۱۰ تولیدي کارخونې فعالې دي. د یادې ټولنې مشر عبدالرحیم عثماني وايي، په هرات کې هره ورځ له ۱۳۰ تر ۱۴۰ ټنه شېدې تولیدیږي.
د خیبر پښتونخوا د مردان ښار د شیخ ملتون ټاون په سیمه کې ناپېژاندو کسانو د یوې کورنۍ درې غړي په خپل کور کې وژلي دي. ځایي پولیسو ویلي، چې په وژل شویو کسانو کې یوه مېرمنه هم شامله ده.
د خیبر پښتونخوا د خیبر ولسوالۍ د لنډي کوتل په خیبر تکیه سیمه کې د هغو پاکستاني موټر چلوونکو او محصلانو د بېرته ستنېدو لپاره احتجاجي پرلت روان دی، چې له تېرو اتو میاشتو راهیسې په افغانستان کې بند پاتې دي. دغه پرلت له تېرو ۱۵ ورځو راهیسې دوام لري.
د طالبانو د کورنیو چارو وزارت خبر ورکړی، د پکتیا ولایت په ډنډ پټان ولسوالۍ کې یې د کشفي عملیاتو پرمهال ۲۰ میله وسلې او نور مهمات نیولي چې له پاکستان نه افغانستان ته قاچاق کېدې. یاد وزارت زیاته کړې، چې قاچاق وړونکي له سیمې تښتېدلي او دوی یې د نیولو عملیات پيل کړي دي.
د برېتانیا درې شاهي سمندري ځواکونه د یوې پوځي چورلکې پرېوتو له امله مړه شوي دي. دغه مرګونې پېښه د چورلکې د تمرین پرمهال رامنځته شوې. د برېتانیا لومړي وزیر کېیر سټارمر په یوه پیغام کې دغه پېښه خورا غمجنه وبلله او د قربانیانو له کورنیو سره یې خواخوږي څرګنده کړه.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو روانه اونۍ د افغانستان په بېلابېلو ولایتونو کې ۱۸ کوډګر نیولي دي. د یاد وزارت په وینا؛ دغه کوډګر یې په بلخ، لوګر، کابل، سرپل، غور، زابل، تخار، دایکنډي او فراه ولایتونو کې نیولي دي.
د خیبر پښتونخوا سر وزیر سهیل اپریدي د اسلاماباد سترې محکمې ته عریضه کړې او غوښتنه یې کړې، چې د راتلونکي مالي کال د ایالتي بودجې په اړه د مشورو لپاره دې له پخواني لومړي وزير عمران خان سره په زندان کې د لیدنې اجازه ورکړي.
د امریکا ولسمشر ډونالډ ټرمپ د «پوډ فورس ون» پاډکاسټ سره په یوه مرکه کې د ایران د مشر مجتبی خامنهيي د فزیکي او رواني حالت په اړه د یوې پوښتنې په ځواب کې وویل: «ما له هغه سره د لیدنې ویاړ نهدی ترلاسه کړی. که په روایتونو باور لرئ، هغه د بدن ډېری غړي له لاسه ورکړي دي».
د طالبانو د کډوالو او بېرته راستنېدونکو چارو وزارت د پنجشنبې په ورځ (د غبرګولي ۱۴مه) خبر ورکړی، ۷۹ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته د تورخم له لارې بېرته افغانستان ته ستانه شوي دي.
د طالبانو د امر بالمعروف، نهې عنالمنکر او شکايتونو اورېدو وزارت خبر ورکړی، چې د دغه وزارت محتسبینو د بلخ ولایت مرکز د مزارشریف ښار د څلورمې او اتمې حوزې اړوند درې کوډګر نیولي دي. یاد وزارت وایي، چې دغه کسان یې د خلکو لهخوا تر شکایتونو وروسته نیولي دي.
د پاکستان د سند ایالت په شهید بېنظیراباد ولسوالۍ کې د سختو دوړو، توپان او شړکنده باران له امله د ښځو او ماشومانو په ګډون لږترلږه شپږ کسان مړه شوي دي. د یادې ولسوالۍ د اطلاعاتو ادارې ویلي، دغه کسان د کورونو چتونو او دېوالونو نړېدو له امله مړه شوي دي.
د طالبانو تر کنټرول لاندې د افغانستان د سوداګرۍ او پانګونې خونې رییس سید کریم هاشمي ازبکستان ته د خپل سفر پرمهال د دغه هېواد د ترانسپورټ له وزیر او د اوسپنې پټلۍ ادارې له مشرانو سره د ترانزیټي همکاریو پر پراختیا خبرې کړې دي.