د امریکا ولسمشر ډونالډ ټرمپ د «پوډ فورس ون» پاډکاسټ سره په یوه مرکه کې د ایران د مشر مجتبی خامنهيي د فزیکي او رواني حالت په اړه د یوې پوښتنې په ځواب کې وویل: «ما له هغه سره د لیدنې ویاړ نهدی ترلاسه کړی. که په روایتونو باور لرئ، هغه د بدن ډېری غړي له لاسه ورکړي دي».
د طالبانو د کډوالو او بېرته راستنېدونکو چارو وزارت د پنجشنبې په ورځ (د غبرګولي ۱۴مه) خبر ورکړی، ۷۹ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته د تورخم له لارې بېرته افغانستان ته ستانه شوي دي.
د طالبانو د امر بالمعروف، نهې عنالمنکر او شکايتونو اورېدو وزارت خبر ورکړی، چې د دغه وزارت محتسبینو د بلخ ولایت مرکز د مزارشریف ښار د څلورمې او اتمې حوزې اړوند درې کوډګر نیولي دي. یاد وزارت وایي، چې دغه کسان یې د خلکو لهخوا تر شکایتونو وروسته نیولي دي.
د پاکستان د سند ایالت په شهید بېنظیراباد ولسوالۍ کې د سختو دوړو، توپان او شړکنده باران له امله د ښځو او ماشومانو په ګډون لږترلږه شپږ کسان مړه شوي دي. د یادې ولسوالۍ د اطلاعاتو ادارې ویلي، دغه کسان د کورونو چتونو او دېوالونو نړېدو له امله مړه شوي دي.
د طالبانو تر کنټرول لاندې د افغانستان د سوداګرۍ او پانګونې خونې رییس سید کریم هاشمي ازبکستان ته د خپل سفر پرمهال د دغه هېواد د ترانسپورټ له وزیر او د اوسپنې پټلۍ ادارې له مشرانو سره د ترانزیټي همکاریو پر پراختیا خبرې کړې دي.
د ګډ امنیتي تړون سازمان عمومي منشي په مسکو کې د دغه سازمان د دفاع وزیرانو په غونډه کې د افغانستان د وضعیت په اړه خبرداری ورکړی. تولګابیک مسادکوف ویلي، چې په افغانستان کې د شخړو احتمال او د وسلهوالو سازمانونو فعالیت د پراختیا په حال کې دی.
د منځني ختیځ او مرکزي اسیا چارو شنونکي روسلان سلیمانوف ویلي، د طالبانو له حکومت سره د روسیې د اړیکو پراختیا تر ډېره د امنیتي اندېښنو او جیوپولیټیکو موخو له امله ده. نوموړي زیاته کړې، چې د طالبانو او روسیې اړیکې یوازې امنیتي بڼه نه؛ بلکې سیاسي او تبلیغاتي اړخ هم لري.
د امریکا د استازو جرګې د ډیموکرات ګوند غړې ګريس مېنګ د ډونالډ ټرمپ د حکومت د کډوالۍ پر سیاستونو نیوکه کړې ده. هغې د امریکا د بهرنیو چارو وزیر مارکو روبیو ته په خطاب ویلي، امریکا باید له هغو افغان متحدینو سره خپله ژمنه پوره کړي چې له امریکايي ځواکونو سره یې همکاري کړې وه.
د پښتونخوا ملي عوامي ګوند مشر محمودخان اڅکزي خبرداری ورکړی، چې په افغانستان کې د هر ډول پوځي مداخلې پایلې به د ټولې سیمې په زیان وي. هغه وایي، که څه هم کابل په لنډ وخت کې نیول کېدای شي؛ خو له افغانستان نه وتل به ډېر ستونزمن وي.
د افغانستان کرېکټ بورډ د لوبغاړو د غوراوي کمېټې د سریلانکا الف او هند الف لوبډلو پر وړاندې په درې اړخیزې یو ورځنۍ سیالۍ کې د ګډون لپاره د افغانستان الف لوبډلې (افغان ابدالیانو) نوملړ اعلان کړ. دغه سیالۍ به د غبرګولي له ۱۹مې تر ۳۱مې پورې د سریلانکا په ډمبولا ښار کې ترسره شي.
د پوهنتون یوشمېر پخوانۍ ښځینه استادانې وایي، طالبانو له هغوی څخه د کار حق، ټولنیز مقام او د تدریس فرصت اخیستی او ژوند یې په «تدریجي مرګ» بدل کړی دی.
د افغانستان د فوټبال ملي لوبډله به نن پنجشنبه (د غبرګولي ۱۴مه) په مالدیف کې د «ډایمنډ جوبېلي» نړۍوالو څلور اړخیزو سیالیو پر دوام په خپله دویمه لوبه کې له بنګلهدېش سره مخ شي. دغه لوبه به د کابل په وخت د شپې په ۸:۳۰ بجو د مالدیف په پلازمېنه ماله ښار کې ترسره شي.
د بلوچستان ایالت په چاغي ولسوالۍ کې د پاکستان سرحدي ځواکونو ویلي، چې د یو لړ عملیاتو پرمهال یې ۱۴۹ افغان کډوال نیولي او بېرته یې افغانستان ته ستانه کړي دي. د دوی په وینا؛ دغه عملیات د چاغي ولسوالۍ د «همایي» کلي په سرحدي سیمه کې ترسره شوي دي.
د ملګرو ملتونو د ماشومانو ملاتړ صندوق (یونېسف) وايي، په افغانستان کې د نجونو پر زدهکړو او د ښځو پر کار دوامداره محدودیتونو د افغانستان په ناخالص کورني تولید کې د ۰.۵ سلنه کمښت لامل شوی دی.
د جنوبي کوریا د ولسمشر لی جې-میونګ واکمن ډیموکراټیک ګوند د سیمهییزو ټاکنو په لومړنیو پایلو کې د اکثریت څوکۍ ګټلې دي، خو په ورته وخت کې د پلازمېنې سیول ښاروالۍ د مهمې څوکۍ د بایللو له ګواښ سره مخ شوی دی.
د امریکا متحده ایالاتو اعلان کړی، چې لبنان او اسراییل د اوربند پر یوه هوکړه سلا شوي دي. د رویټرز خبري اژانس د راپور له مخې، دغه خبر د امریکا د بهرنیو چارو وزارت له لوري د یوې ګډې اعلامیې په خپرولو سره اعلان شوی دی.
د ایټالیا لومړۍ وزیره جورجیا ملوني په دې هېواد کې د درېیو افغان پناهغوښتونکو او یوه پاکستاني وګړي د ژوندي سوځول کېدو په غبرګون کې ویلي چې دغه «وېروونکي جنایت» سخت ټکان ورکړی او حکومت به یې عاملین د عدالت منګولو ته وسپاري.
نړیوالو رسنیو راپور ورکړی چې د افغانستان د ښځینه فوټبال لوبډله، د فوټبال نړیوال فدراسیون (فیفا) له لوري په نړیوالو سیالیو کې د ګډون د اجازې د ترلاسه کولو وروسته، په نیوزیلنډ کې د کوک ټاپوګانو د ښځینه فوټبال لوبډلې پر وړاندې د دوستانه سیالیو ډګر ته ښکته کېږي.
د طالبانو تر واک لاندې د افغانستان د فوټبال فدراسیون اعلان کړی، چې د هېواد د فوټبال اتلانو لیګ د لومړي پړاو غوراوي سیالۍ د مرکزي زون په کچه پیل شوې دي. دغه سیالۍ د کابل په کوربتوب ترسره کېږي او د بېلابېلو ولایتونو شپږ لوبډلې پکې د بل پړاو د جواز ترلاسه کولو لپاره سیالي کوي.
د طالبانو بهرنیو چارو وزیر امیرخان متقي وايي، له هغو شاوخوا ۵۰ هېوادونو سره له ۲۰ کلنې جګړې وروسته دا تمه نهلري، چې اوس پر دوی «ګلان» وشیندي. هغه زیاته کړه، په سیمه کې له یوه هېواد پرته په نورو ټولو کې سفارتونه لري او په وینا یې: «که څوک ورسره اړیکې نهغواړي هغه د هغوی کار دی».
د افغانستان د څېړونکو شبکه وایي، چې په هېواد کې د چاپېریال ناورین له وچکالۍ، سېلابونو، د اوبو له کمښت، ککړتیا، خوراکي ناامنۍ او پر ښارونو له زیات فشار سره تړلی دی او اغېزې به یې په راتلونکو کلونو کې د افغانستان د خلکو پر ژوند سیوری وغوړوي.