د طالبانو د صنعت او سوداګرۍ وزارت مرستیال احمدالله زاهد د امام ابوحنیفه پنځم نړیوال نندارتون په څنډه کې بهرنیو سوداګرو ته د افغانستان د صنعت د ودې او پراختیا په برخه کې د پانګونې بلنه ورکړې ده.
د طالبانو د کورنیو چارو وزیر سراجالدین حقاني په کابل کې د افغانستان لپاره د اروپايي ټولنې له ځانګړي استازي توماس فریلېسن سره په لیدنه کې دواړو لورو د تعامل او امنیت پر موضوعاتو خبرې کړې دي. دواړه د افغانستان او پاکستان ترمنځ د ستونزو حل په اړه هم غږیدلي دي.
د روسیې د امنیت شورا مرستیال سکرتر الکساندر وینیدنکتوف ویلي، چې له طالبانو سره د مسکو همکاري څو اړخیزه ده او د روسیې له ملي ګټو سره په بشپړه توګه سمه ده. وینیدنکتوف وايي، له کابل سره یوازې روسیه همکاري نه کوي، بلکې دده په وینا، د سیمې نږدې ټول هېوادونه ورسره اړیکې لري.
د افغانستان لپاره د پاکستان پخوانی ځانګړی استازی اصف درانی وايي، «د تحریک طالبان پاکستان غړي او مشران په افغانستان کې له وسلو سره ازاد ګرځي». دراني افغانستان انټرنشنل ته په یوه مرکه کې وویل، چې له پاکستان سره د افغان طالبانو دښمني «خپله پښه په تبر وهل» دي.
د طالبانو د استخباراتو رییس په میدان وردګ کې یوې غونډې ته وویل، چې دوی د خپل نظام کلکه ساتنه کوي او پر پولو د تېري کوونکو پلانونه شنډ شوي دي. عبدالحق وثیق زیاته کړه، چې «کفار او مفسدین هڅه کوي نظام ته زیان ورسوي».
سرچینو افغانستان انټرنشنل ته ویلي، چې په کابل کې د شیخ زاید ښارګوټي ۵۲۱ اپارتمانونه د بېرته اخېستلو له خطر سره مخ دي او طالبانو د ۱۹ اپارتمانونو د تخلیې لومړنی نوملړ صادر کړی دی. د ښارګوټي اوسېدونکي وايي، د قسطونو ورکولو ته چمتو دي، خو یوڅه وخت باید ورکړل شي.
د افغانستان کرکټ بورډ خبر ورکړی، چې د هېواد له ۱۹ کلنو کمعمره ملي لوبډله عمان ته روانه شوې، څو له بنګلهدېش سره څلور او له عمان سره دوه یو ورځنۍ سیالۍ و کړي. دغه سیالۍ چې د اکتوبر پر ۱۶مه پیلیږي، د اسیا جام لپاره د افغان لوبډلې د چمتووالي برخه ده.
د طالبانو د ټولګټو وزارت وايي، چې د کابل – جلالاباد لویه لاره بېرته د ترافیکو پرمخ پرانیستل شوې ده. دا لاره تېره شپه د سختو ورښتونو او غر ښویېدنې له امله د ورېښمو تنګي په سیمه کې تړل شوې وه.
د هسپانیا په مادرید کې د رواداري سازمان، کاسا اسیا او د مادرید د وکیلانو ټولنې په ګډه د افغان ښځو د ولسي محکمې د کلیزې په مناسبت غونډه کړې ده. رواداري سازمان د محکمې د پرېکړې د پلي کېدو او پر افغان ښځو او نجونو د لګول شویو ټولو محدودیتونو د لغوه کولو غوښتنه کړې ده.
د طالبانو د کورنیو چارو وزارت وايي، چې د یاد وزارت وزیر سراجالدین حقاني په کابل کې د اسلامي همکاریو سازمان د سرمنشي له ځانګړي استازي طارق علي بخیت او مل پلاوي سره په ناسته کې د افغانستان او دغه سازمان ترمنځ د دوه اړخیزو اړیکو د پیاوړتیا په اړه خبرې کړي دي.
د طالبانو سترې محکمې ویلي چې د جلالاباد د انګور باغ د ځمکې قضیه له اووه میاشتنیو څېړنو وروسته د حقدارو کسانو په ګټه فیصله شوې او د ځمکې د سپارلو امر یې صادر کړی دی. محکمې د ځمکې د غصب موضوع هم تایید کړې ده.
د طالبانو د بهرنیو چارو وزارت په یوه محتاطانه غبرګون کې پر ریاض او د سعودي عربستان پر نورو هوایي ډګرونو د یمني وسله والو پر بریدونو خواشیني ښودلې او د ملکي وګړو ژوند ته هرډول ګواښ یې د غندنې وړ بللی دی.
د افغانستان رسنیو د ملاتړ سازمان (امسو) په خپل میاشتني راپور کې ویلي، چې طالبانو پر خبریالانو فشارونه زیات کړي او د عکسونو او ویډیوګانو پر خپرولو یې محدودیتونه لګولي دي.
د انارو د حاصلاتو موسم رارسېدلی، خو د یوه افغان بڼوال اصلي اندېښنه د انارو راټولول نه؛ بلکې د پېرودونکو موندل دي. هغه افغانستان انټرنشنل ته په یوه لېږلې ویډیو کې خپل د انارو بڼ ښيي او وايي، ان د محصولاتو د بیې پوښتنې لپاره هم څوک نه ورځي.
د طالبانو ویاند ذبیحالله مجاهد د افغانستان په اړه د پاکستاني چارواکو وروستیو څرګندونو ته په غبرګون ویلي، د پاکستان پوځي کړۍ په کابل او اسلاماباد کې د ناامنۍ لامل شوې. د هغه په وینا، دغه پوځي کړیو د افغانستان او پاکستان ترمنځ د ستونزو د حل لپاره د خبرو او مذاکراتو مخه نیولې ده.
د جاپان د بهرنیو چارو وزیر توشیمیتسو موتیګي د اکتوبر له ۷مې تر ۱۰مې نېټې د سعودي عربستان پر هوايي ډګرونو د یمني وسلهوالو بریدونه وغندل او په یمن او سیمه کې یې د تاوتریخوالي لړۍ د پای ته رسېدو غوښتنه وکړه.
د پاکستان د بهرنیو چارو وزیر اسحاق ډار طالبانو ته خبرداری ورکړی، چې د وسلهوالو ډلو پر ضد د اقدام نه کولو له پایلو سره به مخ شي. نوموړي ویلي، پاکستان د ترهګرۍ پرضد مبارزه کې تر ۹۰زره ډېر کسان له لاسه ورکړي او اقتصاد یې نږدې ۵۰ مېلیارده ډالر زیان لیدلی دی.
د ملګرو ملتونو د بشري چارو د همغږۍ دفتر «اوچا» د دوشنبې په ورځ (د تلې ۲۰مه) ویلي، چې د ژمي په درشل کې په افغانستان کې زرګونه ستنې شوې کډوالې کورنۍ بېړنیو مرستو ته اړتیا لري. دغه ادارې زیاته کړې: «بشري مرستې باید ونه ځنډېږي».
د ننګرهار سیمهییزو سرچینو افغانستان انټرنشنل ته خبر ورکړی، چې ناپېژاندو وسلهوالو د ننګرهار د درهنور ولسوالۍ اوسېدونکی اسماعیل په ډزو وژلی دی. د سرچینو په وینا، دغه ځوان تېره شپه په سرهرود ولسوالۍ کې د ناپېژاندو کسانو په ډزو وژل شوی دی.
د هرات اوسېدونکی او د افغانستان د فوټبال نړۍوال لوبڅار جلیل احمد جامي د ۲۰۲۶کال د نړۍوالو لوبڅارانو په نوملړ کې شامل شوی او د فوټبال نړۍوال فدراسیون (فیفا) لهخوا لېږل شوي د لوبڅارۍ وسایل یې هم ترلاسه کړي دي.
د طالبانو د ریاستالوزرا اداري مرستیال عبدالسلام حنفي د اسلامي همکاریو سازمان د سرمنشي له مرستیال او د افغانستان لپاره د دغه سازمان له ځانګړي استازي طارق علي بخیت سره د روغتیا، پوهنې او کډوالو لپاره د کورونو جوړولو په برخه کې د مرستو پر دوام خبرې کړې دي.