د طالبانو د کانونو او پټرولیم وزارت دشنبې په ورځ (د لړم ۲مه) په ننګرهار کې د شوکاڼي د درېیو بېلابېلو کانونو د استخراج او پروسس قراردادونه له کورنیو خصوصي شرکتونو سره لاسلیک کړل. دغه وزارت وایي، پر دغو درې واړو کانونو په مجموعي ډول څه باندې ۲۲۸ میلیونه امریکایي ډالره پانګونه کېږي.
کابو ټولو هېوادونو افغانانو ته د ویزو ورکړه درولې یا خورا کمه کړې ده. د طالبانو نهمشروعیت، بهرنیو جنګیالیو ته د افغان پاسپورټونو د وېش خبرونه او د ویزو له پایته رسېدو وروسته خپل هېواد ته د افغانانو نهستنېدل یې اصلي لاملونه دي. دغه وضعیت افغانان له ګڼو ستونزو سره مخ کړي دي.
د خیبر پښتونخوا په هريپور، مانسهره، کُرمې او باجوړ ولسوالیو کې په بېلابېلو پېښو کې اته کسان مړه او څلور نور ټپیان شوي دي. د ځايي مسوولینو په وینا، دغه پېښې د دوو ټرافیکي، د تندر رالوېدو او د ماین چاودنې له امله رامنځته شوې دي.
د طالبانو تر واک لاندې د افغانستان د سپورټ ادارې ویلي، چې روسیه د افغان پاراالمپیک لوبغاړو لپاره د روزنیزو کمپونو او تمریناتي لوبو د زمینې برابرولو ژمنه کړې ده. د دغې ادارې د خبرپاڼې له مخې، په دې اړه روسیې ته د افغانستان د المپیک ادارې د طالب مشر د سفر پر مهال خبرې شوې دي.
د بلوچستان سبۍ ښار کې د ناڅرګندو وسلهوالو په ډزو کې د هندو سوداګر بسنت کُمار تر وژل کېدو وروسته سوداګرو او هندو ټولنو په اعتراضي ډول خپلې هټۍ وتړلې. د پولیسو په وینا، دغه هندو سوداګر چاکر سیمه کې د ناڅرګندو وسلهوالو په ډزو کې لومړی ټپي او بیا وروسته یې روغتون کې ساه ورکړه.
د ملګرو ملتونو په جینوا دفتر کې د افغانستان استازي نصیر احمد اندېشه د دغه بنسټ د ۸۱مې کلیزې په مناسبت وویل، چې دا سازمان اوس د ده او ملګرو لپاره یې د افغانانو او په ځانګړې توګه د ښځو او نجونو د حقونو د دفاع «مورچل» دی.
په هلمند کې د طالبانو رسنیز دفتر ویلي، د دغه ولایت په فرعي ګمرکونو کې یې ۴ زره او ۴۹۵ کیلوګرامه قاچاقي وارداتي توکي ترلاسه کړي دي. د دغه دفتر په وینا، دغه قاچاقي مواد په تېره یوه اونۍ کې ترلاسه شوي او د لېږد په تړاو یې ۸ کسان هم نیول شوي دي.
د افغانستان د فوټبال تر ۱۵ کلونو کمعمره ملي لوبډلې په نړیوال جام کې له سیرالیون هېواد څخه د یوه ګول په زیاتوالي سره خپله لومړۍ لوبه وګټله. په دې لوبه کې رامین سلطاني او خیر محمد نظري د افغانستان په ګټه دوه ګولونه وهلي دي.
د پاکستان د اطلاعاتو چارو وزارت د طالبانو د وياند ذبیح الله مجاهد وروستیو څرګندونو ته په غبرګون ویلي، د اسلام اباد پر امنیتي ادارو تور لګول، طالبان د افغانستان له خاورې د ترهګرۍ د مخنیوي له مسوولیت څخه نه شي خلاصولی.
په ارزګان کې ځايي سرچینو افغانستان انټرنشنل ته وویل، چې طالبانو د تېر جمهوري نظام پرمهال د دغه ولایت د پخواني امنیه قوماندان جنرال مطیع الله پر کور بیا ځلي چاپه وهلې او د نوموړي په کور کې یې کېندنې کړې دي.
د طالبانو د اطلاعاتو او کلتور وزارت پلاوي د کندهار په میوند ولسوالۍ کې له تاریخي ابدو او د ملالۍ میوند له قبر څخه لیدنه کړې او وايي، چې د ملالۍ میوندۍ او تاریخي ابدې به له ارزونې وروسته ورغوي.
د طالبانو د کانونو او پټرولیم وزارت ویلي چې د ۵۷ میلیونه ډالرو په ارزښت یې د ننګرهار د سپینغر ولسوالۍ د شینوارو سیمې د تالک د دویم بلاک د استخراج تړون له یوه خصوصي شرکت سره لاسلیک کړ. دغه تړون د ۱۵ کلونو لپاره لاسلیک شوی او شرکت به پکې ۵۷ میلیونه ډالره پانګونه کوي.
د پاکستان د جماعت اسلامي ګوند پخواني مشر سراجالحق له افغانستان او ایران سره د سوداګریزو لارو د تړل کېدو په غبرګون ویلي، چې د بلوچستان اوسېدونکي له سختو ستونزو سره مخ دي او حکومت د عامو خلکو په وړاندې د وسله والو ډلو په څېر چلند کوي.
د طالبانو د کورنیو چارو وزیر په خوست کې یوې غونډې ته د وینا پرمهال د یادې ډلې د مشر د فرمانونو پر عملي کولو ټینګار کړی او زیاته کړې یې ده چې ټول طالب چارواکي باید له خو سره ښه او نرم چلند وکړي.
د پاکستان د اطلاعاتو وزارت د افغان طالبانو د مخالفو وسله د ملاتړ تورونه رد کړي او دغه ډول ادعاوې یې «بې اساسه او ګمراه کوونکي» بللې دي. د پاکستان د اطلاعاتو وزارت ویلي چې دغه ادعاوې یوازې پر اټکلونو ولاړې دي.
د طالبانو د کورنیو چارو وزارت ويلي، چې په کونړ، فاریاب، هلمند، جوزجان، سمنګان، نیمروز او فراه ولایتونو کې یې د غلا، قاچاق او قتل په تور ۱۲ کسان نیولي دي.
نوي افشا شوي اسناد ښیي چې سویس تېر کال جېنوا ته د طالبانو د یوه پلاوي د سفر لپاره له ۱۶ زره ډالرو ډېر لګښت کړی او د دغه څلور کسیز پلاوي هر غړي ته یې د ورځني مصرف پیسې هم ورکړې دي.
د اکثریت ګوند غړی فضل محمود فضلي پر غیردولتي سازمانونو او موسسوو سختې نیوکې کړي او ویلي یې دي چې دغو سازمانونو د افغانستان په سیاست کې د بهرنۍ استعماري اجنډا ریښې غځولې دي.
د فرانسې او افغانستان د بشري حقونو یو شمیر بنسټونو د فرانسې له حکومته غوښتي، چې د افغانانو د ایستلو اسانولو په موخه له طالبانو سره خبرې اتری سملاسي ودروي کړي او د بشري حقونو په برخه کې خپلو نړیوالو مکلفیتونو ته ژمن پاتې شي.
د طالبانو د سرحدونو، قومونو او قبایلو چارو وزارت د سرحدي پلټونو معین په شبرغان کې د یوې غوڼدې پرمهال پر بهر مېشتو افغانو غږ کړی چې نارضه هېوادوال دې د تماس کمېسیون له لارې بېرته خپل هېواد ته ستانه شي.
د طالبانو مخالفې وسله والې ملي مقاومت جبهې ادعا کړې، چې تېره ورځ یې د هرات د انجیل ولسوالۍ د پرواني کلي په سیمه کې دوه طالبان وژلي دي.