د سعودي عربستان ولیعهد محمد بن سلمان او د متحده عربي امارات مشر محمد بن زاید النهیان په ټلیفوني خبرو کې ټینګار وکړ، چې د خلیج د همکاریو شورا پر غړو هېوادونو د ایران دوامداره بریدونه د کړکېچ زیاتوونکي او خطرناک دي او د سیمې امنیت او ثبات ګواښي.
د اسکار د جایزو ۹۸مه دوره د یکشنبې په ورځ (د کب ۲۴مه) په لسانجلس کې د امنیتي اندېښنو تر سیوري لاندې پر سرې غالۍ د مېلمنو په ورتګ سره پیل شوه. ټاکل شوې چې په دې مراسمو کې د سینما په بېلابېلو برخو کې لکه د غوره اداکارۍ، ډایرېکټرۍ او غوره فلم ګټونکي اعلان شي.
د اسراییل پوځ د دوشنبې په سهار اعلان وکړ، چې په لبنان کې یې د خپلو پوځي عملیاتو پر دوام په پلازمېنه بیروت کې د حزبالله ډلې پر مهمو زېربناوو او تاسیساتو پراخ بریدونه پیل کړي دي. دا بریدونه د بیروت پر سوېلي څنډو «ضاحیه» له یوې درنې بمبارۍ وروسته پیل شوي.
د پاکستان حکومت د اپوزیسیون مشر او دوو ګوندونو پر افغانستان د پاکستان په بریدونو کې ولسي وګړو ته د اوښتې مرګژوبلې په تړاو د اندېښنې څرګندولو سربېره د روانې شخړې د سمدستي پای ته رسېدو غوښتنه کړې ده. دوی ویلي، پاکستان باید په سیمه کې د سترو قدرتونو د تاوتریخوالي پروژې ختمې کړي.
فرانس پرېس اژانس د اسراییلي چارواکو له قوله راپور ورکړی، چې ټاکل شوې په راتلونکو ورځو کې د فرانسې په منځګړیتوب د لبنان او اسراییل ترمنځ د حزبالله د بېوسلې کولو او تلپاتې سولې په اړه جدي مذاکرات پیل شي.
د خوړو نړۍوال پروګرام ویلي، له هغو کورنیو سره یې د اړینو مرستو وېش پیل کړی چې د افغانستان او پاکستان ترمنځ د وروستیو نښتو له امله زیانمنې شوې دي. یاد سازمان زیاته کړې، سرحدي نښتو او په منځني ختیځ کې روانو جګړو افغانستان ته د دوی د مرستو رسولو لړۍ له خنډ سره مخ کړې ده.
یونېسف د پکتیکا په جانيخېل ولسوالۍ کې له څه باندې ۱۲۰۰ کورنیو سره نغدي مرسته وکړه. دغه مرستې چې ټولټال نږدې ۵ میلیونه افغانۍ کېږي پر هغو کورنیو وېشل شوي، چې ماشومان یې له ۶ تر ۱۲ میاشتو عمرونه لري.
په لغمان کې د طالبانو د ترافیکو مدیر حبیبالله مبارز وايي، چې په روان کال کې د لغمان ولایت په بېلابېلو سیمو کې ۸۰ ترافیکي پیښې شوې دي، چې له امله یې ۷۰ کسان مړه او ۲۱۴ نور ټپیان شوي دي.
پښتون سیاستوال او د پاکستان د سنا پخوانی غړی افراسیاب خټک وایي، پر کندهار د پاکستان د تېرې شپې بریدونه له ګواښوونکي پیغام سره سره تر ډېره ننداریز وو. د هغه په وینا، د طالبانو بېپيلوټه الوتکو د جګړې څرنګوالی بدل کړی او پاکستان ته یې سرخوږی جوړ کړی دی.
د طالبانو د ریاستالوزرا اداري مرستیال عبدالسلام حنفي د دغې ډلې او پاکستان ترمنځ وروستیو نښتو ته په اشارې، له ګاونډیو او د سیمې له هېوادونو سره د متقابل درناوي پر بنسټ د ښو اړیکو غوښتنه کړې او ویلي یې دي، چې له هېچا سره جګړه نه غواړي.
د اروپا د فوټبال اتحادیې (یوفا) په دوحه کې د ارجنټاین او هسپانیې ترمنځ د بینالقارهيي سوپر جام (فینالیسیما) پایلوبه لغوه کړه. ټاکل شوې وه، چې دا لوبه د وري اوومه نېټه ترسره شي.
د خېبر پښتونخوا په لکي مروت کې د امن کمېټې غړی ملک نبيالله بنخېل د ناپېژندو وسلهوالو په ډزو کې ووژل شو. د ځايي سرچینو په وینا، دغه پېښه نن (یکشنبه د کب ۲۴مه) ماخوستن رامنځته شوې او بریدګر هم په تېښته بریالي شوي دي.
د روغتیا د نړۍوال سازمان مشر ویلي، چې په لبنان، عراق او سوریه کې د روغتیایي خدماتو د ملاتړ لپاره یې ۲ میلیونه ډالره بېړنۍ بودیجه ځانګړې کړې ده.
د افغان اېواک په نوم د افغانانو د بیامېشتېدنې د همغږۍ سازمان مشر شاون وان ډیور ویلي چې د امریکا د کډوالۍ او ګمرک ادارې په توقیف کې یو پخوانی افغان نظامي مړ شوی دی.
د اختر په رانږدې کېدو سره په بلخ ولایت کې د دولتي ښوونځي یو شمېر ښوونکي وايي، چې له تېرو دریو میاشتې راهیسې یې معاشونه ځنډېدلي دي. ښوونکي نیوکه کوي، چې په افغانستان کې د ښوونکي معاش کم دی خو بیا هم اړوندې ادارې ښوونکو ته پر وخت معاشونه نه ور کوي.
د امریکا ولسمشر ډونالډ ټرمپ خبرداری ورکړی چې کېدای شي د ایران د تیلو پر مهم صادراتي مرکز خارګ ټاپو نور بریدونه هم وکړي. هغه ویلي چې د جګړې د پای ته رسولو لپاره له تهران سره د هوکړې لپاره لا چمتو نه دی.
د طالبانو د کندهار ولایت مرکزي بندخونې ویاند، رفیع الله زاده، وایي چې د کوچني اختر د رارسېدو په مناسبت یې د دغه ډلې د مشر ملا هبت الله په امر ۲۰۱ تنه بندیان ازاد کړي او د ۳۹۳ کسانو د بند موده یې راکمه کړې ده.
په کندهار کې ځایي سرچینو افغانستان انټرنشنل ته وویل، چې د کندهار د ځانګړې قطعې قومندان حافظ حبیب د پاکستان د تېرې شپې په هوايي برید کې ټپي شوی دی. د سرچینو په وینا، له هوايي برید وروسته تېره شپه حافظ حبیب په ټپي حالت کې د کندهار مومند روغتون ته د درملنې لپاره لېږدول شوی دی.
د ملګرو ملتونو د ماشومانو د ملاتړ صندوق (یونیسف) وايي چې په ۲۰۲۵م کې د افغانستان د ښوونې کیفیت د لوړولو لپاره یې له ۵۴۰۰۰ څخه په ډیرو ښوونکو پانګونه کړې ده.
د اټک په بېلابېلو سیمو کې پولیسو داسې بنرونه لګولي چې د افغان کډوالو د نیولو لپاره د معلوماتو په بدل کې د ۱۰زره کلدارو د انعام ورکولو ژمنه پکې شوې ده. دا اقدام داسې مهال کېږي چې په پاکستان کې د افغان کډوالو د نیولو او ایستلو لړۍ په وروستیو میاشتو کې چټکه شوې ده.
د طالبانو دفاع وزارت اعلان وکړ، چې د جنوبي وزیرستان په مرکز واڼه کې یې د پاکستان د پوځ پر ځانګړي کمپ هوايي برید کړی دی. یاد وزارت ویلي، چې په برید کې یې د واڼه په پوځي کمپ کې دپاکستان د ځانګړو ځواکونو ودانۍ او نور مهم تاسیسات په نښه کړي دي.