د «مسوولیت د خونديتوب نړۍوال مرکز» په خپل وروستي اوونیز راپور کې ویلي، چې افغانستان لاهم د بشري خوندیتوب له جدي ننګونو سره مخ دی او ښځې، نجونې او ملکي وګړي د تاوتریخوالي او محدودیتونو تر ټولو ډېر اغېزمن دي.
اروپايي پارلمان د چهارشنبې په ورځ (د غبرګولي ۲۷مه) د یادې ټولنې غړو هېوادونو کې په ناقانونه توګه د مېشتو کډوالو د بېرته ستنولو په اړه د اروپایي ټولنې په سیاستونو کې پراخ بدلونونه تصویب کړل.
افغانستان کې د یو بل کال لپاره د یوناما ماموریت له غځېدو وروسته پنجشېر کې د ملګرو ملتونو اړوندو ۹ ادارو د طالبانو له اړوندو ادارو سره د همغږۍ غونډه کړې. د ملګرو ملتونو د پروژهيي خدمتونو دفتر وویل، په روان کال کې به دغه ولایت کې د ۶۰۰ زره ډالرو په ارزښت پراختیايي پروژې عملي کړي.
د امریکا د استازو جرګې غړې یاسمین انصاري په افغانستان کې د امریکا د متحدینو په ملاتړ کې واشنګټن ناکامه بولي او له قطر څخه د کانګو په څېر درېیمو هېوادونو ته د افغان پناهغوښتونکو د استولو په تړاو له ولسمشر ټرمپ څخه د ځواب او وضاحت غوښتنه کړې ده.
د سپینې ماڼۍ یوه چارواکي رویټرز خبري اژانس ته ویلي، چې «ټرمپ د چهارشنبې په ورځ د تفاهم یو یادښت لاسلیک کړ چې له ایران سره د جګړې د پای ته رسولو په موخه چمتو شوی دی». د دغه تفاهم یادښت ۱۴ مادې لري.
اروپايي ټولنې ویلي چې په افغانستان کې تلپاتې سوله، ثبات او هوساینه یوازې د یوه «ټولشموله، ملي او د افغانانو په مشرۍ سیاسي بهیر» له لارې ترلاسه کېدای شي؛ هغه بهیر چې د ټولنې د ټولو قشرونو ګډون او د ښځو اغېزمن حضور پکې تضمین شوی وي.
د طالبانو د ټرانسپورټ او هوایي چلند وزارت د هوا پوهنې ادارې ویلي، چې د هېواد په ۱۸ ولایتونو کې د ورښتونو، تالندې برېښنا او سېلابونو د راوتلو اټکل شوی دی.
د افغانستان د کرېکټ ملي لوبډلې د یو ورځنیو نړیوالو لوبلړۍ په دویمه سیالۍ کې له کوربه هند څخه د ۱۷۱ منډو په توپیر ماتې وخوړه. افغان اتلانو په لومړۍ سیال کې د اوو وېکټو په توپیر ماتې خوړلې وه. دواړه لوبډلې به د راتلونکې شنبې په ورځ درېیمه او وروستۍ سیالۍ وکړي.
ځايي سرچینې وایي، طالبانو په پنجشېر ولایت کې خپل پوځي حضور پراخ کړی او امنیتي تدابیر یې سخت کړي دي. د سرچینو په وینا، دې ډلې د پنجشېر په بېلابېلو سیمو کې نوې امنیتي پوستې جوړې کړې او د شپې له خوا یې د تګ راتګ محدودیتونه هم لا پسې سخت کړي دي.
د افغانستان د ښځو د حقونو څار بنسټ پر افغان ښځو د طالباني محدودیتونو د زیاتېدو په تړاو غبرګون ښودلی او ویلي یې دي چې له لومړنیو اړتیاوو څخه د ښځو بې برخې کول د هغوی کرامت او خپلواکي تر پښو لاندې کوي.
ځايي سرچینو افغانستان انټرنشنل ته ویلي، چې د تخار ولایت د کوکچې سیند په غاړه د سرو زرو د زرشویۍ په یوه کارځای کې د طالبانو د ځواکونو په ډزو یو کارګر وژل شوی او دوه نورو د نیولو پر مهال سیند ته د لوېدو له امله خپل ژوند له لاسه ورکړی دی.
امریکا بالاخره د چهارشنبې په ورځ (د غبرګولي۲۷مه) د هغه تفاهم د یادښت رسمي متن خپور کړ، چې د تېرې اونۍ په پای کې یې له ایران سره لاسلیک کړی وو. امریکا له دې وړاندې ویلي وو، چې د قطر او پاکستان په غوښتنه او د ایران په ټینګار به دا متن تر جمعې ورځې او د رسمي لاسلیک تر وخته نهخپروي.
په جنیوا کې د افغانستان دایمي استازي نصیراحمد اندیشه د بشري حقونو د شورا په ۶۲مه کلنۍ ناسته کې ویلي، چې د طالبانو د مشر احکام او فرمانونه باید د افغانستان د قوانینو یا د خلکو د لید لوري په توګه ونه ګڼل شي.
د طالبانو مخالفې ډلې، مقاومت جبهې د رهبرۍ شورا غړي مولوي حبیب الله حسام ویلي، چې دغه جبهه د خپلو مبارزو لپاره د هېڅ ډلې، جریان یا هېواد اجازې ته نه تم کېږي. هغه دغه مقاومت یو شرعي، عقلي او ولسي اړتیا او د جهاد او ولسي پاڅون طبیعي دوام بللی دی.
د طالبانو د کور او ښار جوړولو وزارت وايي، د بغلان ولایت د چمقلعه او د پکتیا د زاهو صنعتي پارکونو تفصیلي پلان بشپړ، تایید او لاسلیک شو. د دغه وزارت په وینا، د لغمان د خیروخېلو صنعتي پارک د ۲۰ کیلوواټ برېښنا شبکې پلان هم تایید او لاسلیک شوی دی.
په تاجکستان کې د افغانستان سفیر محمد ظاهر اغبر ویلي، چې دوشنبې کې د افغانستان په سفارت کې د افغان ښځو او نجونو د ملاتړ او یووالي په موخه یوه غونډه جوړه شوې ده. د غونډې ګډونوالو د طالبانو له لوري پر ښځو او نجونو لګول شوي محدودیتونه او جنسیتي تبعیض په کلکه غندلی دی.
د امریکا جمهوريغوښتونکي سناتور لېنډسي ګراهام ویلي، له ایران سره د تفاهملیک لاسلیکول د امریکا په ګټه دي او کولای شي د هُرمز تنګي د بېرته پرانیستل کېدو، د شخړو د کمېدو او په منځني ختیځ کې د ثبات د ټینګښت لپاره زمینه برابره کړي.
د طالبانو تر کنټرول لاندې د المپیک، بدني روزنې او سپورټ ادارې اعلان کړی، چې د پکتیکا ولایت په ارګون ولسوالۍ کې د څلورو ولایتونو د اتو لوبډلو ترمنځ د فوټبال پیل شوې سیالۍ د غزني د ازادۍ کلب په اتلولۍ پای ته ورسېدې.
د امریکا ولسمشر ډونالډ ټرمپ د جي۷ سرمشریزې پر مهال په یوه خبري کنفرانس کې یو ځل بیا له افغانستان څخه د امریکایي ځواکونو د وتلو پر څرنګوالي نیوکه وکړه او ویې ویل، چې د جو بایډن ادارې د وتلو پر مهال پوځي تجهیزات په افغانستان کې پرېښودل. هغه ویلي، طالبان اوس د امریکا «چاپلوسي» کوي.
په ننګرهار کې د طالبانو د بیو کنټرول او د احتکار مخنیوي کمیسیون په سره رود ولسوالۍ او جلالاباد ښار کې د خښتو یوه بټۍ او څلور نانوایانې د سرغړونو له امله تړلي دي. دغه کمیسیون ویلي چې دا ګام یې په بازارونو کې د نرخونو د کنټرول او د سرغړونو د مخنیوي په موخه پورته کړی دی.
د افغانستان د خبریالانو مرکز د طالبانو له لوري د دولتي ادارو په کارکوونکو باندې د ځیرکو ټیلفونونو پر کارولو لګول شوی بندیز په کلکه غندلی او دا یې د بیان ازادۍ پر وړاندې یو بل خنډ بللی. دغه مرکز خبرداری ورکړی چې دغه پرېکړه به رسنیو او خبریالانو ته د معلوماتو لاسرسی لا محدود کړي.