په کابل کې د ترکیې سفارت په لغمان کې د ټرافیکي پېښې له امله خپله ژوره خواشیني څرګنده کړې ده. دغه سفارت د یوې خبرپاڼې په خپرولو سره د یادې پېښې له امله افغان ولس ته تسلیت هم ویلی دی. په یاده ټرافیکي پېښه کې له پاکستانه راستنېدونکي له ۲۰ ډیر کسان وژل شوي او ۳۳ نور ټپيان شوي دي.
په جرمني کې مېشتو یو شمېر افغانانو د دغه هېواد په پلازمېنه برلین کې د افغانستان د ښځو او نجونو د حقونو په ملاتړ اعتراضي لاریون ترسره کړی او ویلي یې دي چې نړۍ دې د افغان ښځو غږ واوري.
د پاکستان د جماعت اسلامي ګوند د بلوچستان ایالت مشر هدایتالرحمن بلوڅ پر ځوانانو غږ کړی چې وسلې دې نه اخلي، غرونو ته دې نه خېژي، بلکې د خپلو حقونو لپاره دې ډیموکراټیکه مبارزه وکړي. هغه له خلکو وغوښتل، «سړکونو ته راووځئ. دا پارلمان د کوم خان، سردار او پانګهوال شخصي ملکیت نه دی.
د ایران د بهرنیو چارو وزیر سید عباس عراقچي، ویلي چې له امریکا سره خبرې اترې او د پیغامونو تبادله لا هم روانه ده او تر هغه چې کومې مشخصې پایلې ته ونه رسېږي، په اړه یې قضاوت نه شي کېدای.
د ایران د روغتیا بیمې ادارې مشر، محمد مهدي ناصحي ویلي چې په ایران کې د استوګنې کارت لرونکي افغان کډوال د روغتیا بیمې لپاره د ایراني وګړو په پرتله ۸۰ سلنه زیات فیس ورکوي.
د لومړي ځل لپاره د پکتیا ولایت په زندان کې د «اختریز جام ټورنمنټ» په نوم د محبوسینو تر منځ کرکټ سیالۍ ترسره شوې. د دغه ولایت لپاره د طالبانو د رسنیو دفتر ویلي، په دې سیالیو کې ۷ لوبډلو ګډون درلود او بالاخره دغه سیالۍ د «ځوان ستوري» لوبډلې په اتلولۍ سره پایته ورسېدې.
باخبره سرچینو ایران انټرنشنل ته ویلي، چې د ایران ولسمشر مسعود پزشکیان ددغه هېواد د مذهبي مشر مجتبی خامنه یي دفتر ته یو رسمي لیک لیږلی دی او د خپلې استعفا غوښتنه یې کړې ده. تر اوسه د هغه داستعفا د منلو په اړه په رسمي ډول څه نه دی ویل شوي.
نیویارک ټایمز راپور ورکړی چې د امریکا ولسمشر ډونالډ ټرمپ د ایران جګړې په تړاو د احتمالي هوکړې د چوکاټ شرایط سخت کړي او د هوکړې اصلاح شوې نسخه یې تهران ته لېږلې ده.
د طالبانو ویاند ذبیح الله مجاهد په ملګرو ملتونو کې د افغانستان په اړه د مذاکراتو د رهبرۍ او د پرېکړه لیکونو د مسودو د چمتو کولو په برخه کې د چین د رول هرکلی کړی. چین د ملګرو ملتونو په امنیت شورا کې د افغانستان اړوند سلا مشورو او پرېکړه لیکونو د مسودو چمتو کولو مسوولیت لري.
د جاپان د دفاع وزیر شینجیرو کویزومي پر توکیو د «بېرته پوځي کېدو او نوي جنګي سیاست» تورونه رد کړل او پر چین یې نیوکه وکړه چې خپل پوځ په خورا چټکۍ او له روڼتیا پرته پراخوي.
د طالبانو د بلخ د صنعت او سوداګرۍ رییس وايي، صنعت او سوداګرۍ وزارت پرېکړه کړې ده، چې د افغانستان په صنعتي پارکونو کې له غیرفعالو صنعتکارانو صنعتي ځمکې بېرته اخلي. امیر محمد متقي وايي، له هغو صنعتکارانو هم ځمکې اخلي چې د صنعتي فعالیتونو پر ځای یې په نورو موخو کارولې دي.
بریتانیایۍ ورځپاڼې ډېلي مېل په یوه رپوټ کې لیکلي چې د طالبانو له ادعاوو سره سره چې ګواکې «بچهبازي» یې منع کړې ده، په افغانستان کې له هلکانو جنسي ناوړه ګټه اخیستنه لا هم روانه ده. د رپوټ له مخې، د طالبانو ځینې چارواکي، سیمهییز قوماندانان او بانفوذه کسان په دغه بهیر کې ښکېل دي.
د طالبانو د کورنیو چارو وزارت د ډایاګ عمومي مدیر اعلان وکړ، چې د یادې ډلې د نوي لارښود لهمخې په ټول هېواد کې د ډرون او امنیتي کامرو پر وارداتو او اسعتمال بندیز لګول شوی او یوازې هغه کسان یې کارولی شي، چې سراج الدین حقاني او یا هم ارشد معیین جواز ور کړی وي.
د طالبانو د کورنیو چارو وزیر سراج الدین حقاني تره مولوي ابراهیم حقاني د پکتیا ولایت روحاني بابا ولسوالي کې د نېزه وهنې دودیزې سیالیو کې د ګډون پرمهال ویلي، چې ویلي، چې ۵۰ کاله وړاندې جهاد په نېزه وهلو پیل شوی و.
د خیبر پښتونخوا په اورکزۍ ولسوالۍ کې د امنیتي پېښو له ډېرېدو سره سږکال د لوی اختر پر مهال د سیلانیانو شمېر کم شوی و. په سیمه کې له شپږو میاشتو راهیسې انټرنېټ هم بند دی چې زده کوونکي او د سیمې اوسېدونکي یې له سختو ستونزو سره مخ کړي.
په سمنګان ولایت کې د طالبانو د بدني روزنې او سپورټ امریت وايي چې د غیږنیونې په یو ورځنیو سیالیو کې د کندز، بغلان، جوزجان، بلخ او سمنګان ولایتونو ۶۰ ورزشکارانو ګډون کړی و. سمنګان په دغو سیالیو کې بریالی ولایت اعلان شوی.
طالبانو په خوست ، پکتیا او پکتیکا ولایتونو کې پر ډیورنډ کرښه خپلو امنیتي پوستو ته د خندقونو د کېندلو چارې پیل کړې دي. سرچینو افغانستان انټرنشنل ته وویل، چې دغه خندقونه په ځاځي میدان، علیشیرو، ګوربزو، تڼیو او سپیره ولسوالۍ کې پیل شوي او په نورو ولایتونو کې هم په پلان کې دي.
د طالبانو تر واک لاندې د دولتي شرکتونو مسوولان وايي، د بغلان ولایت په تاله برفک ولسوالۍ کې د ډبرو سکرو له یوه تازه کشف شوي کان څخه د سکرو د استخراج چارې پیل شوې دي.
د طالبانو د چارو ادارې رییس نورالحق انور د طالبانو اداره او د هغوی کړنې د ابراهیم ع او د اسلام د نورو پیغمبرانو له لارې سره تشبېه کړې دي او ادعا کوي چې د طالبانو اداره د نبیانو په پلونو روانه ده.
د طالبانو د نیمروز ولایت د فرعي ګمرکونو ریاست وایي، ګرځنده ډلې یې توانېدلې د یاد ولایت په چهار برجک ولسوالۍ کې نږدې یو ټن او ۹۰۰ کیلوګرامه قاچاقي درمل ونیسي. یاد ریاست وايي، قاچاق وړونکو غوښتل دغه درمل له پاکستان نه افغانستان ته په غیرقانوني ډول وارد کړي.
د طالبانو د غزني ولایت د اندړو ولسوالۍ د امربالمعروف امریت محتسبانو د سردې بند تفریحي سیمې ته ورغلو سېلانیانو سخه دریاوې او ځینې نور تفریحي توکي اخیستي دي. ځینو سېلانیانو ویلي، چې طالبانو دې سیمې ته د اختر په ورځو کو د مېرمنو د ورتګ مخه هم نیولې وه.