په غزني کې د طالبانو رسنیز دفتر خبر ورکړی، چې د ازبکستان سفارت مرستیال بهادر تاشمانوف او د دغه هېواد د مسلمانانو د ادارې مرستیال شیخ حامدجان ایشمتبیکوف په ګډون ۱۴کسیز پلاوي په غزني کې د طالبانو له والي وليجان حمزه او یوشمېر سیمهییزو مسوولینو سره لیدلي دي.
تېره اونۍ د طالبانو د سرحدونو، قومونو او قبایلو چارو وزیر ملا نورالله نوري پر مخالفو جبهو غږ کړی و، چې د خبرو او تفاهم لپاره یې دروازې پرانیستې دي؛ خو په تازه څرګندونو کې یې خپله خبره بېرته واخیسته. هغه وایي، چې له یادو جبهو سره د تفاهم اړتیا نهلري.
د پنټاګون ویاند شان پارنیل د دوشنبې په ورځ اعلان کړی، چې د امریکا د پوځ پخوانی جګړن او رواني ډاګټر نضال حسن به په ډزو اعدام شي. حسن په ۲۰۰۹کال کې د ټېکساس ایالت په فورټ هود پوځي اډه کې په ډزو ۱۳ کسان وژلي او تر ۳۰ ډېر یې ټپیان کړي وو.
د افغانستان او ایران ګډې سوداګرۍ خونې خبر ورکړی، د ایران شاوخوا ۱۸۰ کسیز سوداګریز پلاوی چې سوداګر، پانګهوال او اقتصادي فعالان پهکې شامل دي په کابل کې د امام ابوحنیفه نړۍوال نندارتون کې د ګډون لپاره کابل ته رسېدلی دی.
د ملګرو ملتونو د بشري مرستو د همغږۍ دفتر (اوچا) ویلي، چې د یادې ادارې د بېړني غبرګون صندوق (CERF) له افغانستان سره د بشري مرستو لپاره ۱۸ مېلیونه ډالر بودجه ځانګړې کړې ده.
د طالبانو د سرحدونو، قومونو او قبایلو چارو وزیر ملا نورالله نوري د غزني په جاغوري ولسوالۍ کې په یوه ولسي غونډه کې یو وار بیا د پاکستان پر حکومت او استخباراتو نیوکې کړې دي. نوموړي زیاته کړې، چې پاکستان دې د افغانانو صبر او حوصله نه ازمايي.
د پاکستان په بېلابېلو طبي پوهنتونونو کې تر ۱۰۰۰ ډېر افغان محصلان چې شاوخوا ۳۵۰ یې نجونې دي، له دغه هېواده د اېستلو تر پرېکړې وروسته د خپلو زدهکړو د برخلیک په اړه سخت اندېښمن دي.
د اغاخان فرهنګي بنسټ د خپرونو مسوول امانالله صاحبزاده د طالبانو د اطلاعاتو او فرهنګ وزارت د فرهنګ او هنر معین عبدالرحمان طیبي سره په لیدنه کې ویلي، چې د غور ولایت جام څلي د وضعیت ارزونې لپاره تراوسه د کورنیو او بهرنیو متخصصانو لهخوا دوه ارزونې شوې دي.
د ایران د خراسان رضوي ولایت د فني او مسلکي زدهکړو عمومي مشر ویلي، چې د افغان کډوالو د کار تضمین امکان نهشته؛ نو ځکه یې له حقوقي اړخه د مسلکي مهارتونو د سندونو د ورکړې لړۍ درولې ده. ایران په دې وروستیو کې د قانوني اسنادو لرونکو کسانو پرته پر نورو کاګرو د کار بندیز لګولی دی.
د غزې حکومت د رسنیو دفتر خبر ورکړی، چې د اکټوبر له لسمې نېټې د اوربند له پیل راهیسې پر غزې د اسراییل په بریدونو کې ۱۴۶۰ کسان وژل شوي او ۵زره او ۱۱۶ نور بیا ټپیان شوي دي.
سهیل اپریدي د پاکستان تحریک انصاف ګوند د بنسټګر عمران خان د خلاصون او د خپلو سیاسي غوښتنو لپاره د پراخ لاریون لومړی پړاو (یکشنبه د تلې ۱۲مه) د لکي مروت ولسوالۍ له ګنډي چوک پیل کړ او شپې کوهات ته ورسېدل. لاریونوال به نن سېشنبه د پېښور په لور حرکت وکړي.
د طالبانو د صنعت او سوداګرۍ وزیر نورالدین عزیزي د ایران د اسلامي شورا د تولید ملاتړ ځانګړي کمېسیون له مشر محسن زنګنه په مشرۍ له یوه ایراني پلاوي سره د دواړو هېوادونو ترمنځ د سوداګرۍ او صنعتي همکاریو پر پراختیا خبرې کړې دي.
د قبرص ډیپلومات او د افغانستان او پاکستان لپاره د ملګرو ملتونو د سرمنشي پخوانی استازی بنوین سیوان د ۸۸ کلونو په عمر ومړ. سایپرس میل ورځپاڼې راپور ورکړی، چې سیوان د دوشنبې په ورځ (د تلې ۱۳مه) مړ شوی. د ارمنه عمومي خیریه ټولنې هم د هغه مړینه تایید کړه.
په بلخ کې د قرهقل ریاست اداري مدیر محمد عارف ویلي، د روان کال په لومړیو شپږو میاشتو کې له افغانستان نه ۳۹زره او ۳۷۹ د قرهقل پوستکي بهرنیو هېوادونو ته صادر شوي دي. د هغه په وینا، له یادې ډلې ۲زره او ۹۰۸ قرهقل پوستکي د هوايي ډګر له لارې یوازې چین ته صادر شوي دي.
د طالبانو یو پوځي پلاوي د روسیې د پوځي تمریناتو په څنډه کې د شمالي کوریا له یوه پوځي چارواکي سره لیدلي دي. د سویلي کوریا رسنیو راپور ورکړی، چې د طالبانو د پوځ یوه قوماندان نصیبالله مدني د شمالي کوریا له پوځي اتشې سره د پوځي روزنې او د تجربو د تبادلې په اړه خبرې کړې دي.
په غور کې ځايي سرچینې وايي، چې د دغه ولایت په تیوره ولسوالۍ کې د نوریې په نوم یوه ځوانه ښځه د خپل مېړه لهخوا تر سختې شکنجې وروسته مړه شوې ده. سرچینې وايي، چې د ښځې د بدن پر ځینو برخو د سوځېدو ټپونه هم لیدل شوي دي.
د «رواداري» په نوم د بشري حقونو بنسټ د طالبانو د پوهنې وزیر حبیبالله اغا او د لوړو زدهکړو وزیر ندا محمد ندیم د نیولو په اړه د جرمونو نړۍوالې محکمې له حکمونو هرکلی کړی دی.
د افغانستان کرېکټ بورډ ویلي، چې د هېواد د ۱۹ کلنو کرېکټ لوبډله به د ۲۰۲۶کال اسیا جام چمتووالي لپاره د بنګلهدېش او عمان د ۱۹ کلنو لوبډلو پر وړاندې د یو ورځنیو لوبو په لړۍ کې د لوبو ډګر ته ښکته شي.
د ایران د نشهيي توکو پر وړاندې د مبارزې پولیسو قوماندان ایرج کاکاوند وايي، سره له دې چې په افغانستان کې د نشهيي توکو د کښت کمېدو په اړه راپورونه خپاره شوي؛ خو لاهم د دودیزو او صنعتي نشهيي توکو سترې جوپې د افغانستان له ختیځو پولو ایران ته اړول کېږي.
د افغانستان د ژغورنې ملي مجمع د مسکو فارمټ اتمې ناستې پر بهیر نیوکه کړې او ویلي یې دي، سیمهییز نوښتونه هغه مهال اغېزمن کېدای شي چې د افغانانو پر پراخ ګډون او د یوه پراخ بنسټه سیاسي نظام پر رامنځته کېدو ولاړ وي.
د افغانستان لپاره د ملګرو ملتونو ځانګړی راپور ورکوونکی ریچارډ بېنېټ د طالبانو د دوو چارواکو په اړه د جرمونو نړۍوالې محکمې د نیولو حکمونو علني کېدل «ډېر مهم» او «د پام وړ» بللي دي.