آرشیف

د ملګرو ملتونو سازمان کې د امریکا سفیر مایک والټز ویلي، ډونالډ ټرمپ چمتو دی چې د ایران پروړاندې پرېکنده اقدام وکړي، خو ډیپلوماسۍ ته یې لومړیتوب ورکړی دی.

پنټاګون اعلان کړی، چې امریکایي ځواکونو په جلا جلا بریدونو کې د نشه‌یي توکو د قاچاق په شک درې کوچنۍ بېړۍ په نښه کړې دي، چې له امله یې ۱۱ تنه وژل شوي دي.

د مرکزي اسیا هېوادونو استازو په استانه کې د تماس ډلې د فوق‌العاده غونډې په څنډه کې ویلي، چې دوی د افغانستان په اړه د یوې ګډې ستراتېژۍ د جوړولو هڅه کوي. هغوی ټینګار وکړ، چې نور افغانستان یوازې یو ګواښ نه ګڼي، بلکې د سوېلي اسیا بازارونو ته د رسېدو لپاره یې یو مهم فرصت بولي.

د پاکستان د کورنیو چارو وزیر محسن نقوي د سې‌شنبې په ورځ په لاهور کې یوې خبري ناستې ته د وینا پر مهال په خېبرپښتونخوا او بلوچستان ایالتونو کې د ناامنیو پر زیاتېدو اندېښنه څرګنده کړه او خبرداری یې ورکړ، چې په خېبرپښتونخوا کې د ناامنیو لمن د پراخېدو په حال کې ده.

د امریکا د ولسمشر مرستیال جي‌ډي وېنس له فاکس‌نیوز سره په خبرو کې ویلي، چې ایرانیان لا هم د ټرمپ د ځینو سرو کرښو منلو ته چمتو شوي نه دي.

د برېتانیا پاچا، د امریکا ولسمشر، د کاناډا لومړي وزیر او د نړۍ یو شمېر نورو مشرانو د سې‌شنبې په ورځ د روژې میاشتې د رارسېدو له امله مسلمانانو ته مبارکي وویله او دا یې د مهربانۍ، خواخوږۍ او یو بل ته د مرستې فرصت وباله.

د سویس د بهرنیو چارو وزیر ایګناتزیو کاسیس ویلي، چې د ایران د بهرنیو چارو له وزیر عباس عراقچي سره یې په خپله وروستۍ لیدنه کې په دغه هېواد کې د اعتراضونو پر مهال د معترضانو د نیولو او وژلو په اړه د خپل هېواد اندېښنه شریکه کړې ده.

طالبانو ومنله، چې افغانستان ته د بشري مرستو کمېدو د خلکو د اړتیاوو د پوره کولو په برخه کې د دې ډلې پر وړتیا منفي اغېز کړی. د طالبانو د اقتصاد وزیر دین محمد حنیف په کابل کې بهرنیو مرستندویو بنسټونو ته وویل، د هېوادونو د مرستو بې‌ساري کمښت د خلکو پر ژوند ناوړه اغېز کړی.

په بلخ کې د طالبانو والي محمد یوسف وفا په دغه ولایت کې د خپلې ډلې له چارواکو سره په یوې ګډه ناسته کې ټینګار وکړ، چې لومړی باید دوی په خپله او بیا عام خلک دغه قانون پلی کړي. هغه زیاته کړه، چې په راتلونکي کې به د امربالمعروف قانون د لا ښه تشرېح لپاره نورې غونډې هم جوړې کړي.

د ایران ولسمشر مسعود پزشکیان اعلان وکړ، چې د ایران اسلامي جمهوریت هېڅکله د اټومي وسلو د ترلاسه کولو په لټه کې نه دی او چمتو دی، چې په دې اړه د څارنې او تفتیش پروسې ته غاړه کېږدي.

د افغانستان لپاره د اروپايي ټولنې استازي ژیل برتران له طالبانو سره د هېوادونو پر تعامل د بشري حقونو د فعالانو د نیوکو په غبرګون ویلي، د افغانستان دننه له دې ډلې سره د تعامل په اړه کوم مخالفت نشته. هغه وایي، له طالبانو سره د اړیکو په اړه نیوکې د بهر مېشتو افغانانو له لوري کېږي.

ګیزیل پلېکو هغه فرانسوۍ مېرمن ده، چې مېړه یې پر هغې د ډله‌ییزو جنسي تېریو د زمینې برابرولو په تور محکوم شوی دی.

د ایران د بهرنيو چارو وزير عباس عراقچي له امريکايي استازو سره د سې‌شنبې ورځې خبرې اترې «رغنده» وبللې او ويې ويل، چې د تېرې ناستې پرتله په‌کې ښه پرمختګ شوی دی. هغه وویل: «په پای کې موږ پر يو لړ لارښوونو او اصولو عمومي هوکړې ته ورسېدو».

د کندوز په امام صاحب ولسوالۍ کې د ۶۵ چاپ‌اندازانو په ګډون د وزلوبې سیالۍ ترسره شوې. په دغو سیالیو کې د کوربه چاپ‌اندازانو سربېره، د تخار ولایت لوبغاړو هم برخه اخیستې وه.

د طالبانو د اقتصاد وزارت د ثبت شویو معلوماتو له‌مخې، په ۲۰۲۵ زېږدیز کال کې د نړۍوالې ټولنې له‌خوا د افغانستان بېلابېلو برخو ته نږدې یو میلیارد او نهه میلیونه ډالره ځانګړې شوې دي.

د نایجیریا د دفاع وزارت ویاند ویلي چې د یادې ډلې پر ضد د مبارزې د عملیاتو د پراخولو لپاره شاوخوا ۱۰۰نور امریکایي سرتېري نایجیریا ته رسېدلي دي. د امریکا ولسمشر ډونالډ ټرمپ پر نایجیریايي چارواکو تور پورې کړی چې ددغه هېواد په شمال لوېدیځ کې د میشتو عیسویانو په ساتنه کې پاتې راغلي.

رویټرز د یوه امریکایي چارواکي له قوله لیکلي، چې له ایراني پلاوي سره په مذاکراتو کې پرمختګ شوی، خو لا هم ډېر جزیات پاتې دي چې باید وڅېړل شي.

د طالبانو د معیار او کیفیت ادارې اعلان کړی، چې د کورنیو تولیداتو د کیفیت لوړولو او د هغوی د سیالۍ وړتیا پیاوړي کولو بهیر یې په ډېر جدیت پیل کړی دی. دغه اداره وایي، په کابل کې یې پر تولیدي شرکتونو او فابریکو منظمه او پرېکنده څارنه روانه ساتلې ده.

د عمان د بهرنیو چارو وزیر بدر البوسعیدي، چې د ایران او امریکا ترمنځ د اټومي مذاکراتو منځګړی دی، وایي، د دواړو هېوادونو ترمنځ د خبرو اترو دویم پړاو د ګډو موخو او تخنیکي مسایلو په پېژندنه کې له «ښه پرمختګ» سره پای ته رسېدلی.

د امریکا سویلي قوماندانۍ د سې شنبې په ورځ وویل چې په ختیز ارام سمندر او کارابین سمندر کې یې پر بېړیو درې جلا بریدونه کړي، چې په پایله کې یې ۱۱ کسان وژل شوي دي. د امریکا پوځ د معلوماتو له مخې، په لومړي برید کې څلور کسان، په دویم کې هم څلور کسان او په درېیم کې درې کسان وژل شوي دي.

په افغانستان کې د ملګرو ملتونو مرستندویه پلاوي(یوناما) ویلي، روژه د یووالي، تفکر، مینې او سولې میاشت ده او ملګري ملتونه په دې مبارکو شېبو کې د افغانستان له خلکو سره اوږه په اوږه ولاړ دي.