د اوکراین ولسمشر ولادیمیر زېلېنسکي ویلي، سره له دې چې په اروپا کې د پاتريوت هوايي دفاعي سيستم ضد توغنديو د توليد لپاره له وړاندې پلانونه اعلان شوي وو؛ خو د امريکا لهخوا د تولید اجازه نهده ورکړل شوې. هغه ويلي، چې د جواز د ورکړې ژمنې شوې وې؛ خو امريکا پرې عمل ونه کړ.
په کونړ کې د طالبانو د کانونو او پټرولیم ریاست خبر ورکړی، چې د دغه ولایت ګران بیه کاني ډبرې د سوداګرو په حضور کې د ازادې بولۍ له لارې پلورل شوې دي. د یاد ریاست په وینا؛ دغه ډبرې د ۲۲ مېلیونه او ۲۹۰زره افغانیو په ارزښت پلورل شوې، چې یوه برخه به یې د دولت خزانې ته ور زیاته شي.
په پروان کې د طالبانو د امر بالمعروف او نهې عن المنکر ریاست وايي، چې محتسبانو یې په دغه ولایت کې شاوخوا ۵۰۰ د موسیقۍ الې او لوډسپېکرونه سوځولي دی. د یاد ریاست په وینا؛ دغه وسایل یې د تېر یوه کال په اوږدو کې راټول کړي وو.
د ملګرو ملتونو د کډوالو عالي کمېشنرۍ (UNHCR) په تازه خپور شوي راپور کې راغلي، په ۲۰۲۵کال کې شاوخوا ۵۰۰زره راستنېدونکو افغان کډوالو ته د ځای پرځای کولو او ملاتړ خدمتونه برابر شوي چې په دې کې د ښځو او نجونو د خوندیتوب او ټولنیز څار پروګرامونه هم شامل دي.
د طالبانو تر واک لاندې د کډوالو ستونزو ته د رسېدنې کمېسیون وایي، یوازې پرون سېشنبه د ایران او پاکستان له بېلابېلو لارو ۸۱۲ کورنۍ چې ټولټال ۴زره او ۲۱۴ کسان کېږي؛ افغانستان ته ستنې شوې دي. طالبانو زیاته کړې، چې له ستنو شویو کورنیو سره یې لومړنۍ مرستې هم کړې دي.
د افغانستان رسنیو ملاتړ سازمان (AMSO) وایي، په پاکستان او ایران کې د برازیل بشرپاله ویزو ته په تمه یوشمېر افغان خبریالان او رسنیز فعالان له جبري اېستنې او سختو امنیتي ګواښونو سره مخ دي او د هغوی دوسیې باید په بېړني او شفاف ډول وڅېړل شي.
د پاکستان د تحریک انصاف ګوند بنسټګر او پخواني لومړي وزیر عمران خان کورنۍ د هغه د روانې درملنې پر څرنګوالي نیوکه لري او غوښتنه کوي، چې کورنۍ ته دې د درملنې په بهیر کې د ګډون او څار اجازه ورکړل شي.
د امریکا مرستیال ولسمشر جيډي وېنس وایي، واشنګټن غواړي د ایران موضوع د ډیپلوماسۍ له لارې حل کړي؛ خو د اړتیا په صورت کې به امریکا له پوځي ځواک هم کار واخلي.
په ننګرهار کې د طالبانو امنیې قوماندانۍ خبر ورکړی، چې د دغه ولایت د درېیمې حوزې اړوند یې دوه کسه له شاوخوا ۵۰زره «زېکپ» نشهيي ګولیو سره نیولي دي. د یادې قوماندانۍ د خبرپاڼې له مخې؛ نیول شویو کسانو پر خپل جرم اعتراف کړی.
د امریکا یوه لوړپوړي چارواکي ادعا کړې، چې چین د ۲۰۲۰کال په جون میاشت کې د لوپ نور په سیمه کې تر ځمکې لاندې اټومي ازموینه ترسره کړې؛ خو چین بیا دغه تورونه رد کړي او هغه یې د دغه هېواد په چارو کې «سیاسي لاسوهنه» بللې ده.
د برلین په نړۍوال فورم کې یوشمېر افغان ښځینه فعالانو ګډون وکړ او له نړۍوالې ټولنې یې وغوښتل، چې د افغان ښځو د حقونو ملاتړ وکړي. پروانه ابراهیم خېل نجرابي افغانستان انټرنشنل ته ویلي، چې د غونډې په بېلابېلو برخو کې د افغانستان ناوړه شرایط په ګوته شول.
د ایران د رېل پټلۍ ادارې اجرایوي مشر جبار علي ذاکري وايي، د افغانستان او ایران ترمنځ د رېل پټلۍ له لارې د انتقالاتو لېږد په بېساري ډول زیات شوی او دغه لاره د دواړو هېوادونو د اقتصادي اړیکو د پراختیا لپاره «کلیدي لویه لاره» ګرځېدلې ده.
د امریکا د بهرنیو چارو پخوانۍ وزیرې هېلري کلېنټن په یوې نوې مقاله کې ویلي، چې په نړۍ کې د ښځو سره د کرکې او افراطیت تر ټولو سخته بېلګه نن ورځ د طالبانو تر واک لاندې افغانستان کې لیدلی شئ. هغې ویلي، چې د طالبانو یو له لومړنیو اقداماتو څخه له ټولنې د ښځو ګوښه کول وو.
په میدان وردګ کې د طالبانو د اطلاعاتو او کلتور ریاست خبر ورکړی، چې د دغه ولایت په مرکز میدان ښار کې د شاوخوا ۶۰ مېلیونه افغانیو په لګښت یوه معیاري سړه خونه جوړه شوه. د یاد ریاست په وینا؛ دغه سړه خونه د ۲زره مټریک ټنو د ساتنې ظرفیت لري.
سمافور وېبپاڼې راپور ورکړی، چې ایران د سېشنبې په ورځ په جنیوا کې د اټومي خبرو اترو له نوي پړاو سره هممهاله، د یوه پوځي تمرین د ترسره کولو لپاره د هرمز تنګي یوه برخه په لنډمهاله توګه وتړله.
د پاکستان د سوداګرۍ وزیر جام کمال خان د سېشنبې په ورځ وویل، چې له افغانستان سره د تعامل شرط دا دی چې لومړی باید د ترهګرۍ مسله حل شي. نوموړي په خپل اېکس کې لیکلي، چې له افغانستان سره اړيکې د ترهګرو د پټنځایونو تر لهمنځه وړلو پورې نه عادي کېږي.
د کاناډا پروړاندې د نیوزیلنډ د کرېکټ ملي لوبډلې په بریا سره، د افغانستان د کرېکټ ملي لوبډله د شلاوریز نړۍوال جام له سیالیو حذف شوه. نیوزیلنډ د دغو سیالیو د څلورم ګروپ په خپلې وروستۍ لوبه کې کاناډا ته د ۸ وېکټو په توپیر ماتې ورکړه.
د ملګرو ملتونو سازمان کې د امریکا سفیر مایک والټز ویلي، ډونالډ ټرمپ چمتو دی چې د ایران پروړاندې پرېکنده اقدام وکړي، خو ډیپلوماسۍ ته یې لومړیتوب ورکړی دی.
پنټاګون اعلان کړی، چې امریکایي ځواکونو په جلا جلا بریدونو کې د نشهیي توکو د قاچاق په شک درې کوچنۍ بېړۍ په نښه کړې دي، چې له امله یې ۱۱ تنه وژل شوي دي.
د مرکزي اسیا هېوادونو استازو په استانه کې د تماس ډلې د فوقالعاده غونډې په څنډه کې ویلي، چې دوی د افغانستان په اړه د یوې ګډې ستراتېژۍ د جوړولو هڅه کوي. هغوی ټینګار وکړ، چې نور افغانستان یوازې یو ګواښ نه ګڼي، بلکې د سوېلي اسیا بازارونو ته د رسېدو لپاره یې یو مهم فرصت بولي.
د پاکستان د کورنیو چارو وزیر محسن نقوي د سېشنبې په ورځ په لاهور کې یوې خبري ناستې ته د وینا پر مهال په خېبرپښتونخوا او بلوچستان ایالتونو کې د ناامنیو پر زیاتېدو اندېښنه څرګنده کړه او خبرداری یې ورکړ، چې په خېبرپښتونخوا کې د ناامنیو لمن د پراخېدو په حال کې ده.