د امریکا د مشرانو جرګې د بهرنیو اړیکو کمیټې مشر له طالبانو سره د مستقم تعامل د اړتیا په اړه، د امریکا د ځانګړې استازې رینا امیري پر څرګندونو نیوکه کړې ده. ښاغلي مکال ویلي، له کله نه چې رینا امیري په دې دنده ګمارل شوې، طالبانو د ښځو د ځپلو لپاره ډېر فرمانونه صادر کړي دي.
روانه اونۍ د طالبانو د بهرنیو چارو وزیر سره د رینا امیري له کتنو وروسته، هغې پر خپله ټوېټر پاڼه لیکلي و: "له طالبانو سره د مستقیم تعامل لپاره د افغانانو او د بشري حقونو د مدافعینو له پراخ ټینګار وروسته مې، په دوحه کې د طالبانو - له استازو سره وکتل”.
دغو لیدنو پراخ غبرګونونه راوپارول. یوشمېر افغان ښځینه معترضانو ویلي، چې امیري باید د امریکا د بهرنیو چارو وزارت د استازې په توګه له طالبانو سره خپلې لیدنې د افغان ښځو او بشري حقونو د فعالانو په نوم توجیه نه کړي.
د امریکا د مشرانو جرګې د بهرنیو اړیکو د کمیټې مشر هم د رینا امیري دغو څرګندونو ته غبرګون ښودلی او د افغان ښځو او نجونو پر وړاندې د طالبانو د چلند اغیزمنولو لپاره یې د ځانګړې استازې هڅې بې پایلې وګڼلې.
مکال پر خپله ټوېټر پاڼه لیکلي: «له کله نه چې رینا امیري د ښځو لپاره د امریکا ځانګړې استازې ګمارل شوې، طالبانو د ښځو د ځپلو لپاره خورا ډېر فرمانونه صادر کړي.»
مکال زیاته کړې: « افغانانو له امریکا نه دي غوښتي، چې طالبانو سره تعامل وکړي. دغه ناستې نه یوازې دا چې د ښځو او نجونو سره مرسته نه کوي، بلکې د طالبانو د عادي کېدو لامل کېږي.»
د امریکا د بهرنیو چارو استازې پر بیان د مکال نیوکې، له طالبانو سره د امریکا پر چلند د جمهوري غوښتونکو او سپینې ماڼۍ ترمنځ د نظرونو اختلاف څرګندوي.
ځینو افغان فعالانو او سیاستوالو ویلي، چې امریکا له طالبانو سره تعامل کې خپلې ګټې ویني او د امریکا د بهرنیو چارو په وزارت کې افغاني الاصله استازې رینا امیري د واشنګټن د سیاست او ګټو پر بنسټ عمل کوي.
د افغانستان د ولسي جرګې پخوانۍ استازې فوزیه کوفي د چهارشنبې په ورځ پر خپله ټوېټرپاڼه لیکلي، چې بهرني ډېپلوماتان د خپلو حکومتونو د ګټو لپاره پړه نشو ګڼلی. هغې د طالبانو له مخالفینو غوښتي، چې خپلې لیکې جوړې کړي او خپل روایتونه پیاوړي کړي.
