سرچینې: په اسلام اباد کې پولیسو ګڼ افغان کډوال نیولي
په اسلام اباد کې ځایي سرچینو افغانستان انټرنشنل ته ویلي، چې چهارشنبې د شپې ناوخته پاکستاني پولیسو د افغانانو پر کورونو یرغل کړی او لږ تر لږه ۱۷ کسان یې له ځانه سره بیولي دي.
په اسلام اباد کې ځایي سرچینو افغانستان انټرنشنل ته ویلي، چې چهارشنبې د شپې ناوخته پاکستاني پولیسو د افغانانو پر کورونو یرغل کړی او لږ تر لږه ۱۷ کسان یې له ځانه سره بیولي دي.
د سرچینو په وینا، په نیول شویو کسانو کې داسې کسان هم شته چې د پاکستان ویزې لري.
د افغان کډوالو یوې سرچینې چې نه یې غوښتل نوم یې واخیستل شي، افغانستان انټرنشنل ته ویلي چې چهارشنبه د شپې شاوخوا ۱۲ نیمې بجې پولیسو په اېف ۱۷ سیمه کې د افغان کډوالو پر کورونو یرغل کړی او ځینې یې له ځانه سره بیولي دي.یوې افغان کډوالې وویل: «شاوخوا د شپې ۱۲ نیمې یا یوه بجه به وه، چې پولیس په تاوتریخوالي سره ور وروټکاوه. ددوی درېیو ماشومانو چېغې وهلی او دباندې راغلل.»دغې مېرمنې زیاته کړې ده، چې د ور د پرانیستلو سره سم، بې له دې چې ښځې او ماشومان په پام کې ونیسي، نارینه یې په وهلو ډبولو له ځانه سره یوړل. هغې زموږ خبریال ته ویلي، چې پولیس ان نارینه وو ته وخت ورنکړ، چې خپل پاسپورټونه او ویزې له ځانه سره واخلي.یو بل افغان کډوال هم افغانستان انټرنشنل ته ویلي، چې پولیسو شاوخوا ۱۷ داسې افغانان نیولي چې ځینې یې پاسپورټ او ویزې هم لري. هغه ویلي دا هغه کسان وو، چې د طالبانو له وېرې پاکستان ته کډوال شوي وو.له څه مودې راهیسې د پاکستان پولیسو د افغان کډوالو د ایستلو په برخه کې یو شمېر چټک ګامونه اخیستي دي.د پاکستان پولیسو د سې شنبې پر ورځ اعلان وکړ، چې ۷۲ بې اسناده افغان کډوال یې نیولي دي.د راپورونو له مخې، په تېره میاشت کې هم شاوخوا ۵۰۰ افغان کډوال نیول شوي وو.
