په هغه اخ و ډب کې چې پرون د طالبانو او ځایي خلکو ترمنځ د پکتیکا په ولایت کې پېښ شو، له امله یې د درېیو سپين ږېرو په ګډون لس کسه ټپيان شوي دي. د پېښې ټپيان د سیمې او ښرنې مرکزي روغتون ته لېږدول شوي دي.
د ترووء سرحدي ولسوالۍ ځایي خلکو افغانستان انټرنېشنل ته ویلي، چې تېره ورځ د دغې ولسوالۍ ولسوال ځایي مشران یوه جومات ته وربللي وو، کله چې مشران راټول شول نو ولسوال له مشرانو وغوښتل چې په راوړل شویو اسنادو لاسلیک وکړي، په کوم کې چې د سیمې د ځمکو واک ولسوال ته سپارل کېده.دغو مشرانو په دغو اسنادو له لاسلیک کولو ډډه وکړه، چې په غبرګون کې یې د ولسوال ساتونکو د هغوی په وهلو، ډبولو پیل وکړ.د دغو مشرانو د خلاصون لپاره چې سیمه ییزو ځوانانو راودانګل، د ولسوال د ساتونکو له خوا پرې ډزې وشوې چې په پایله کې یې د درېیو سپين ږېرو په ګډون لس کسه ټپيان شوي دي.
دغه کار د سیمې د اوسیدونکو کرکه راپارولې او هغوی له طالب مشرانو غواړي، چې د دغې پېښې عاملینو ته دې سخته سزا ورکړي.
په دې اړه ځایي خلک د طالبانو له وېرې رسنیو سره خبره کولو ته زړه نه ښه کوي او د روغتونونو ډاکټرانو ته هم طالبانو خبرداری ورکړی، چې په دې اړه به چوپه خوله پاتې کېږي.
یو تن سیمه وال چې نه یې غوښتل نوم یې واخیستل شي افغانستان انټرنېشنل ته ویلي دغسې کړه، وړه د ټولو اسلامي او افغاني ارزښتونو سره په ټکر کې دي.
هغه دا رنګه زیاته کړه چې طالبانو نه د جومات درناوی وکړ او نه یې د مشرانو خیال پر ځای کړ، د هغه په ټکیو دغسې کړنې هم د اسلامي او هم د افغاني اصولو سره اړخ نه لګوي.
