د طالبانو د کډوالو او راستنېدونکو چارو وزارت مرستیال ارسلاخروټي د چهار شنبې په ورځ (د زمري ۱۸مه) ملت ته د دولت د حساب ورکولو په پرواګرام کې ویلي، په تېر یوه کال کې له بېلابېلو هېوادونو د اته سوه افغانانو مړي افغانستان ته لېږدول شوي دي.
همدارنګه نوموړی وايي، په تېر یوه کال کې شاوخوا ۳۰۰۰ افغانان د پاکستان او ۱۰۰۰ تنه نور د ایران له زندانونو خوشې شوي او افغانستان ته راستانه شوي دي.
نوموړی دغه خبرې داسې مهال کوي، چې لاهم د پاکستان او ایران په زندانونو کې ډېر شمېر افغانان بنديان دي.
دغه وزارت زیاتوي، چې د تېر یوه کال په موده کې له ایران، پاکستان او یو شمېر نورو هېوادونو څخه شاوخوا ۹۵۲ زره افغان کډوال افغانستان ته راستانه شوي دي؛ خو ۷ میلیونه افغان کډوال په کوربه هېوادونو او ۳ میلیونه نور کورني بېځایه شوي خلک دي چې د ژوندانه سختې تېروي.
د کډوالو چارو وزارت پر داسې مهال په افغانستان کې ۱۹ زره کسانو ته د کاري زمینو برابرولو خبره کوي، چې اوس هم ګن شمېر افغانان، په افغانستان کې د کاري فرصتونو د نشتوالي له امله په پاکستان او ایران کې اروپایي هېوادونو ته د تلو په نیت شپې او ورځې تېروي.
