د مېشن نېټورک رسنۍ د راپور له مخې، ډیورنډ کرښې ته نږدې د افغانستان ختیځه سیمه د نړۍ تر ټولو بې وزله سیمه ګڼل کېږي. دغې رسنۍ په افغانستان کې د ۲۰۲۲ کال زلزلې ته په اشارې لیکلي، دلته خلک په خټینو کورنو کې اوسېږي او د ژوند نورې اسانتیاوې نلري.
دغه رسنۍ وايي، تر زلزلې وروسته، مرستندویه سازمانونه د کلیوالو، غرنیو کلیو ته د رسېدو لپاره مبارزه کوي چې خورا اغېزمن شوي دي.
د او اېف اېم ای مرستندویه سازمان کارکوونکی نیهمیها وايي، په سیمه کې د کرنې لپاره خلکو ته زمینه نه ده برابره شوې ده.
نوموړی وايي:« معمولا د دغې سیمې وګړي د څارویو په ساتلو تکیه کوي. دلته هیڅ صنعت او فابریکې نشته، دا ډېره زیاته کلیواله، ډبرینه او غرنۍ سیمه ده، نو معمولا د کورنیو نارینه د پیسو ګټلو لپاره لویو ښارونو لکه کابل ته سفرونه کوي.»
نوموړی زیاتوي:« هر دوولس کلن هلک په افغاني کلتور کې سړی ګڼل کیږي.« نو کله چې هلکان دوولس کلن شي، دوی بېلابېلو ښارونو ته ځي، او هڅه کوي چي د خپلو کورنیو لپاره ډوډۍ وګټي.»
دا چې ولې خلک په داسې سیمه کې ژوند کوي د دې پوښتنې په ځواب کې نیهمیها داسې وايي:« دا ټول هغه څه دي چې ډېری خلک یې د ژوند د ټولو اسانتیاوو د لګښتونو د پوره کولو توان نه لري. دلته دوی اړ نه دي چې په غرونو کي ځمکې واخلي، دوی کولای شي یوازې خټين او ډبرین کورونه جوړ او ژوند په کې تېر کړي.»
نوموړی وایي: «دلته د ژوند لګښتونه نشته، ځکه برېښنا نشته، ګاز نشته، د حکومت لخوا اوبه نه ورکول کېږي ځکه چې دوی د دغو لګښتونو د پوره کولو توان نه لري.»
اوس د اېف اېم ای مرستندویه سازمان په دې سیمو کې کار کوي؛ چې د دغې سیمې د وګړو لپاره خوندي ځایونه جوړ کړي.
