د افغانستان لپاره د امریکا د مرستو پلټونکې اداره سیګار د سه شنبې په ورځ کانګرس ته ویلي، ارزونې ښیي چې د طالبانو تر کنټرول لاندې د افغانستان بانک خپلواک نه دی او د پېسو د سپینولو او د ترهګرو د تمویل د مخنیوي توان نه لري.
د سیګار په وینا، دغه موندنې یوې مالي ټولنې تر سره کړي، چې امریکا د افغانستان بانک د ارزونې لپاره ګمارلې وه.
سیګار په خپل درې میاشتني راپور کې کانګرس ته ویلي، چې د دغې ټولنې د ارزونې پر بنسټ ، د افغانستان بانک مدیریت ستونزو سره مخامخ دی.په دغه راپور کې راغلي:«د طالبانو تر کنټرول لاندې افغانستان بانک خپلواک نه دی او د پېسو سپینولو او د ترهګرو د تمویل په برخه کې ډېرې تشې او نیمګړتېاوې لري.»د افغانستان بانک د خپلواکۍ په اړه د دغه راپور اشاره درې طالب چارواکو ته ده، چې د دغه بانک مشري په غاړه لري او د امریکا او ملګرو ملتونو سازمان د بندیزونو په تور نوملړ کې دي.رویټرز راپور ورکړی، دغه ارزونه د دې لامل شوه چې امریکا د افغانستان بانک د ۳،۵ ملیارده ډالري اسعارو زېرمو ته د لاسرسي سره موافقه ونه کړي.
