د امریکا د هاوایي ایالت په ماوي ځنګل کې د اورلګېدنې له امله سلګونه ودانۍ سوځېدلې او د مړو شمېره یې ۹۳ تنو ته لوړه شوې ده. چارواکو د یکشنبې په ورځ رسنیو ته ویلي، اور وحشتناک دی او ورکو شویو خلکو پسې د پلټنې او ژغورنې ډلې پلټنې کوي.
دوی وايي اور په یوه تاریخي ښارګوټي ماوي کې لګېدلی، چې تر اوسه ۹۳ تنه پکې مړه شوي او ګڼ نور لا درکه دي.
د هاوایي والي جاش ګرین وايي، دغه اور د تېرې جمعې په ورځ لګېدلی او نېږدې ۲۲۰۰ ودانۍ چې ۸۶ سلنه یې د استوګنې ودانۍ وې، پوره او یا نیمې سوځېدلې دي.
نوموړي ویلي، د هاوایي ایالت په دغه اورلګېدنه کې د نېږدې شپږ میلیارد ډالرو په ندازه زیانونه اوښتي او د ماوي په دوو ټاپوګانو کې لا هم اور شته، چې د هوا له لارې پرې اوبه پاشل کیږي.
بلخوا سکای نیوز دا وژونکې اورلګېدنه د امریکا په په تېر سل کلن تاریخ کې بې سارې او مرګونې بللې ده.
سکای نیوز د پخواني امریکايي سرتېري “ډېوېډ” چې کور یې په اور کې سوځېدلی، په حواله وايي؛ تر اوسه یې دا ډول وحشتناکه پېښه نه وه ليدلې.
هغه زیاتوي: “ ما د افغانستان او کویټ سفرونه کړي، مګر کله مې هم دغه ډول وحشتناکه پېښې نه دي لیدلې”.
دا لومړی ځل دی، چې په دغه اورلګېدنه کې د پلټنې له سپیو ګټه اخیستل کیږي، تر څو له ژغورونکې ډلې سره د ورکو انسانانو لټه وکړي.
له دې وړاندې د کاناډا په یو شمېر ځنګلونو کې اور لګېدلی و، چې له امله یې ځاني او مالي تلفات اوښتي وو.
