د الجزیرې د یوه راپور له مخې، هغه افغانان چې د اقتصادي او بشري وضعیت د خرابېدو له امله یې خپل هېواد پرې اېښی، په نورو هېوادونو کې د پناه اخیستو لپاره د محدودو لارو په لټه کې دي.
د الجزیرې په راپور کې راغلي، یو افغان چې نه یې غوښتل نوم یې واخیستل شي، له خپلې مېرمنې سره د خوندي ژوند لپاره امریکا ته راغلی و؛ خو څنګه چې دوی د متحده ایالاتو په خاوره کې خپلې لومړۍ ورځې تجربه کولې، د یو بل ډول واقعیت سره مخامخ شول.
هغه وويل: "موږ فکر کاوه چې زموږ ستونزې هوارې شوې، موږ په افغانستان کې د زندان او شکنجې له ګواښه نور خلاص شو."
هغه په دې توقیف ځای کې شپږ میاشتې تېرې کړې.
د قانوني کډوالۍ لپاره د محدودو انتخابونو سره، د دغه افغان په څېر په زرګونو افغانان په ناقانونه توګه د لویدیځو هېوادونو د تګ لپاره ګواښوونکي سفرونه ټاکي.
د دغه توقیف شوي افغان په څېر ډېری نور کډوال هم د متحده ایالاتو د مهاجرت په بند کې دي او له دغه هېواده د احتمالي شړلو سره مخامخ دي.
متحده ایالاتو کې مېشته افغانه او د کډوالو حقونو ډلې پروژې «انار» وکیله وايي.« هیڅوک داسې ګواښونه نه مني، پرته له هغوی چې ډېر مجبوره نه وي ."
دغه توقیف شوی افغان او مېرمن یې د جمهوریت پرمهال ټولنیز او بشري فعالیتونه لرل، کله چې طالبان واک ته ورسېدل، د هغه مېرمن د ګواښ احساس وکړ. دوی خپل ملکیتونه وپلورل او مکسیکو له پولې یې امریکا ته د تګ تکل وکړ.
که څه هم د طالبانو له بیا واکمنېدو سره ډېریو بهرنیو هېوادونو د خپلو افغان همکارانو د اېستلو پروسې پیل کړې؛ خو هغه افغانان چې د یو لړ ګډوډیو له امله پاتې شول، تر ډېره خپل او د کورنیو د نورو غړیو ژوند له ګواښه سره احساسوي.
دا مهال هم په افغانستان او هم په درېیمو هېوادونو کې ګڼ افغانان امریکا ته د تلو لپاره په تمه دي؛ خو د دغو کډوالو په وینا، دغه بهیر ډېر پڅ او مټه روان دی او له ډېرو هغو سره د سبا او بېګا لپاره د خوړو څرک نه لګیږي.
دغه افغانان له امریکا غواړي، چې د هغوی د اېستلو په بهیر کې دې په سملاسي توګه لاس په کار شي او د بشر پالنې له مخې دې د هغوی ژوند وژغوري.
