په کابل کې یوشمېر طالب پلوه دیني عالمانو د لویې جرګې په تالار کې د غونډې په وروستیو شېبو کې، د یوه پرېکړه لیک په صادرولو د دغې ډلې سره د نړۍوالې ټولنې د تعامل غوښتونه وکړه.
د دغه پرېکړه لیک له مخې، هغوی د طالبانو مشر ته د بیاځلي بیعت ترڅنګ له دغې ډلې ملاتړ یې « شرعي او ملي وجیبه» بللې ده.
د طالبانو ویاند دغه پرېکړه لیک د چهارشنبې په ورځ (د وږي ۸مه) په خپلې اېکس یا پخوانۍ ټوېټرپاڼې خپور کړی دی.ښاغلي مجاهد ویلي، چې دغه ناسته د کابل د یوشمېر علماوو او قومي مخورو په شتون د لویې جرګې په تالار کې جوړه شوې وه.د طالبانو ملاتړو له دغې ډلې غوښتي، چې له سیمې هېوادونو سره دې خپل «اقتصادي محوره» بهرني سیاست ته پراختیا ورکړي او له سوداګرو یې وغوښتل، چې خپله پانګونه لاډېره کړي.ځینو لوړپوړو طالب چارواکو، د طالبانو کورنیو چارو وزیر سراج الدین حقاني، د بهرنیو چارو وزیر امیرخان متقي او طالبانو د ریاست الوزرا اداري مرستیال هم په دغې ناسته کې ګډون کړی وو.د دغې ناستې د پرېکړه لبک په وروستۍ برخه کې د طالبانو ملاتړو له دغې ډلې غوښتي، چې د کان کېندنې لپاره خپل قانون او مقررات او د دې ډول بیروکراسۍ جوړونه دې نوره هم اسانه کړي.او هغوی د اسلامي ارزښتونو او «افغاني فرهنګ» ته په کتو د دیني او عصري علومو د زدهکړې پر اړتیا ټینګار وکړ.هغوی همدارنګه د امنیت د ټینګښت، د نشهیی توکو پر وړاندې مبارزه او د روږدو کسانو د راټولولو په برخه کې د طالبانو ستاینه وکړه او له دغې ډلې یې غوښتي، چې د خپلې لومړۍ واکمنۍ په څېر دې د فساد پر وړاندې متحد شي.د پرېکړه لیک په بلې برخې کې له نړۍوالې ټولنې غوښتنه شوې، چې له طالبانو سره دې په اقتصادي ډګر کې مرسته وکړي، د بانکي محدودیتونو او د افغانستان بانک د زېرمو په ازادولو کې دې ګام واخلي.د طالبانو ملاتړو دا رنګه له دغې ډلې غوښتي، چې د دغې ډلې د مشر ملا هبت الله ټول حکمونه دې پلې کړي؛ خو هغوی د طالبان مشرانو لهخوا د نجونو پر زدهکړو او د مېرمنو په کار کولو لګېدلو بندیزونو ته اشاره و نه کړه.طالبانو په تېرو دوو کلونو کې د پر له پسې فرمانونو په صادرولو له شپږم ټولګي پورته د نجونو پر زدهکړو، د مېرمنو په کار کولو او په عمومي ځایونو کې د مېرمنو په شتهوالي چورلټ بندیزونه لګولي دي.
