د طالبانو تر واک لاندې د ټولګټو وزارت د یوې خبرپاڼې په خپرولو ویلي، چې د ۸۰ کیلو مټرو په اوږدوالي د سالنګ د لویې لارې د بیارغونې او اساسي ترمیم کارونه پیل شوي او د وږي په ۱۹مه تر بشپړېدو پورې به دغه لاره تړلي وي.
داسې ویل کېږي، چې د دغه سړک د بیارغولو چارې چې د جولای په دیارلسمه پیل شوې وې، ډېر ژر به بشپړې شي او ګټې اخیستو ته به چمتو شي.
ویل کېږي، چې د دغې لويې لارې د بيارغونې چارې دوو کورنيو شرکتونو ته سپارل شوې دي.
د طالبانو تر واک لاندې د ټولګټو چارو وزارت له سوداګرو او موټر چلوونکو غوښتي، چې د دغې لویې لارې تر تړلو پورې دې خپلې ټولې اړتیاوې پوره کړي.
دغه وزارت له هېوادوالو هم غوښتي، چې د سالنګ د تونل دننه د بیارغونې د چارو تر بشپړېدو پورې دې
له حوصلې کار واخلي.
دغه وزارت تر دې وړاندې د سالنګ لویه لار د ورځې لهخوا د ټرافیکو پر مخ تړلې وه او لامل یې د سړک د بیارغونې د پروژې ښه تطبیق بللی و.
د سالنګ لویه لار چې شمالي، شمال ختیځ او شمال لویدیځ ولایتونه له پلازمینې سره نښلوي، پخوا د افغانستان د پخواني ولسمشر حامد کرزي په وخت کې بیارغول شوې وه؛ خو په دې ورستيو کې دغه لویه لار د زياتو موټرو په ځانګړې توګه د بار وړونکو موټرو د تګ راتګ له امله د نورو لارو په څېر ويجاړه شوې ده.
د کابل او د افغانستان د شمالي ولایتونو ترمنځ د شیبر پخوانۍ لویه لار هم خلاصه ده؛ خو د دغه سړک ډېرې برخې بیارغولو ته اړتیا لري.
د سالنګ لاره د منځنۍ اسیا او د پاکستان د کراچۍ بندر تر منځ یو له لنډو لارو څخه ده، چې اوسمهال پاکستاني سوداګر د خپلو مالونو د لېږد رالېږد لپاره ترې کار اخلي.
