د پاکستان د موقت حکومت د بهرنیو چارو وزیر جلیل عباس جیلاني ویلي، طالبانو یوشمېر هغه کسان نیولي چې په پاکستان کې یې په ترهګریزو بریدونو کې لاس درلود. هغه زیاته کړه، چې طالبانو د مشکوکو کسانو د نیولو په اړه پاکستاني چارواکو ته خبر ورکړی دی.
دغه پاکستاني چارواکي د مشکوکو کسانو د هویت او له پاکستاني طالبانو او نورو وسلهوالو ډلو سره د تړاو په اړه معلومات نه دي ورکړي.
له پاکستاني طالبانو سره د اسلام اباد د خبرو له ناکامېدو سره په پاکستان کې ځانمرګي بریدونه، چاودنې او د امنیتي ځواکونو وژنې زیاتې شوې دي.
د دغو بریدونو پړه تر ډېره پاکستاني طالبانو یا هغې ته نږدې ډلو منلې ده.
له هغه وروسته د پاکستان ملکي او پوځي چارواکو پر افغان طالبانو تور پورې کړی و، چې پاکستاني طالبانو ته پټنځایونه ورکوي، له همدې امله یې نیوکې پرې کولې او له افغانستانه یې د هغوی د اېستلو غوښتنه کوله.
د پاکستان د نیوکو په ځواب کې افغان طالبانو پر پاکستان تور لګاوه، چې دغه هېواد د خپلو مخالفانو د ستونزې په حل کې پاتې راغلی او پر ځای یې دغه ډله ملامتوي.
په ترهګریزو بريدونو کې د لاس لرونکو مشکوکو کسانو د نيولو خبر د پاکستاني چارواکو هغه څرګندونې تاييدوي، چې د دوی په وينا وسلهوال له افغانستانه د تروريستي بريدونو د ترسره کولو لپاره پاکستان ته راځي.
