امریکايي چارواکو ویلي، چې د شمالي کوریا مشر کېم جونګ اون پلان لري چې د سپټمبر په پای کې روسیې ته سفر وکړي او د روسیې له ولسمشر پوتين سره وویني. ویل کيږي، په دې ناسته کې به روسیې ته د شمالي کوریا له لوري د وسلو په لیږد هوکړه وشي.
د دې ناستې اصلي هدف هغه هوکړه ده چې له مخې به یې شمالي کوریا، روسیې ته د وسلو هغه کمی ور بشپړوي چې د اوکراين په جګړه کې ورسره مخ ده.
دواړه مشران به د سپتمبر له (۱۰ تر ۱۳ مې) په ختیځ اقتصادي فورم کې د ګډون لپاره په ولادیوستوک کې سره یو ځای وي.
ویل کیږي چې کیم جونګ اون به د شمالي کوریا له پلازمېنې پیونګ یانګ څخه د روسیې ختیځ ساحل ولادیوستوک ښار ته په زغره وال اورګاډي کې سفر وکړي او هلته به له پوتین سره وویني.
دوو جګپوړو امریکايي چارواکو واشنګټن پوسټ ته ویلي، پوتین غواړي چې د کیم جونګ اون له خوا روسیې ته د توپونو مرمۍ او د ټانک ضد توغنديو په لیږد سره سلا شي.
په بدل کې يې، کیم غواړي چې شمالي کوریا د روسیې سپوږمکیو او اټومي اوبتلونو ته لاسرسی ولري، همدارنګه کیم له روسیې څخه د خوراکي توکو د مرستې موضوع هم یاده کړې ده.
سپینې ماڼۍ ویلي چې پوتین او کیم د وسلو د احتمالي جوړجاړي په اړه لیکونه تبادله کړي دي. د سپینې ماڼۍ ویاند ویلي چې د دواړو هېوادونو ترمنځ د پوځي همکاریو په اړه د لوړې کچې خبرې روانې دي.
واشنګټن پوسټ په دې راپور کې لیکلي چې پر اوکراین د روسیې له برید وروسته امریکايي چارواکو د پټو معلوماتو په خپرولو سره هڅه کړې چې شمالي کوریا، چین او نور هېوادونه روسیې ته د وسلو له ورکولو را ورګرځوي.
د ویلسن په مرکز کې یو لوړپوړی کارپوه ژان ایچ لی وايي: «د روسیې او شمالي کوریا ترمنځ د اړیکو پیاوړتیا په مناسب وخت کې د دوو هیوادونو لپاره لنډه ملګرتیا ده خو د امریکا ګډ دښمن جوړیدای شي.»
هغه زیاته کړه چې دا د هغه دودیز یووالي بیا راژوندي کول دي چې «د پوتین او کیم ستراتیژیکې ګټې خوندي کوي.»
