د ترکیې ولسمشر رحب طیب اردوغان وايي، اروپايي ټولنه پخپله له ترکیې د ځان لرې کولو هڅه کوي
نوموړي د شنبې په ورځ امریکا ته تر سفر مخکې خبریالانو ته وویل، که اړتیا شي هېواد یې له اروپايي ټولنې خپله لار بېلوي.
د ښاغلي اردوغان دا ځواب د ترکیې په هکله د اروپايي پارلمان د راپور په غبرګون کې و.
رجب طیب اردوغان تېرو میاشتو کې له بیا ولسمشر کېدو راهیسې له اروپايي ټولنې سره د ترکیې یوځایولو هڅې بیا پیل کړې دي.
خو اروپايي پارلمان د سپټمبر پر ۱۳ خپل کلني راپور کې ویلي، انکره او بروکسل باید له اروپايي ټولنې سره د ترکیې له غړیتوب پرته د همکارۍ پراخولو لارې پیدا کړي.
اروپايي پارلمان دا هم ویلي، چې دمګړۍ له دې ټولنې سره د ترکیې د ګډېدو امکان نشته.
اروپايي پارلمان له ترکیې غواړي چې له ناټو سره د سوېډن د غړیتوب ملاتړ وکړي او زیاتوي چې له دې تړون سره د یو هېواد یوځایېدل له اروپايي ټولنې سره د بل هېواد په غړیتوب ترلاسولو پوري تړاو نه لري.
د ترکیې ولسمشر څو میاشتې مخکې له اروپايي ټولنې وغوښتل چې د ترکیې غړیتوب ته خپل ور پرانیځي او په بدل کې به دوی په ناټو کې د سوېډن د غړیتوب ملاتړ وکړي.
رجب طیب اردوغان د اروپايي ټولنې دې راپور ته په غبرګون کې وايي، چې دا ټولنه له ترکیې د بېلتون هڅه کوي: موږ د دې بدلونونو په برخه کې خپله ارزونه کوو او که اړتیا وه موږ هم له اروپا سره لار بېلوو.
تر دې مخکې د ترکیې بهرنیو چارو وزارت هم د اروپايي ټولنې راپور له تورونو او بې انصافه قضاوت ډک بللی و.