د ازبکستان ولسمشر د ملګرو ملتونو سرمشریزه کې وویل، چې خپلو ستونزو ته افغانستان یوازې پرېښودل به لویه تېروتنه وي. شوکت میرضیایف له نړیوالې ټولنې وغوښتل چې د افغان کشالې د حل لپاره سره یو موټی شي. د هغه په خبره، په افغانستان کې هر بدلون پر نړیوال امنیت مخامخ اغېز لري.
د ازبکستان د ولسمشرۍ دفتر د چارشنبې ورځې د اعلامیې له مخې، نوموړي خپلو خبرو کې وویل: «اوس چې افغانستان له نوي حالت سره مخ دی، د کړکېچ د اواري لپاره یې بې سارې هڅې پکار دي.»
ازبکستان هم په هغو څو هېوادونو کې دی چې د طالبانو سره اړیکي ساتي او هم یې په اقتصادي برخه کې ور سره همکاري پراخه کړې ده، خو د منځنۍ اسیا او نورو ګاونډیو هېوادونو په څېر تاشکند هم له افغانستانه خپلې خاورې ته د وسلوالو د نفوذ اندېښنه لري.
شوکت میرضیایف له طالبانو سره د نړیوال تعامل په باور دی او ملگرو ملتونو ته په خپله وینا کې یې ویلي: «افغانستان له پامه غورځول، منزوي کول او بندیزونه پرې لګول یوازې د عادي افغانانو مشکلات زیاتوي. موږ په دې باور یو چې له افغانستان سره انساني یا بشري مرستې باید کمې نه شي.»
نوموړي د افغانستان د کنګل شویو پیسو د ازادېدو غوښتنه وکړه او ویې ویل، د افغان ټولنې د سختو ستونزو په ځوابولو کې دې د دې پیسو د لګولو لپاره ځانګړی میکانیزم جوړ شي.
د طالبانو په واکمنېدو سره د افغانستان نږدې اوه میلیارده ډالره شتمني په امریکا کې کنګل شوه، خو وروسته یې نیمايي په سویس کې یوه بانک ته ولېږدول شوه، اما د کارېدو اجازه یې نشته.
