د طالبانو د المپیک کمېټې او سپورټ عمومي ریاست پر ایکس پاڼه لیکلي، د چین په کوربتوب د ۴۵ هیوادونو تر منځ په روانو اسیایي سیالیو کې افغان لوبغاړو په څلورو بېلابېلو برخو رګبي، تکواند، ووشو او لامبو وهلو کې بریاووې ګټلې دي.
له افغانستانه په دغه سیالیو کې د ګډون په موخه په ۱۵ ورزشي برخو کې ۸۰ لوبغاړو ګډون کړی.
تردې مهاله محمد خالد هوتک، محسن رضايي په ووشو برخه کې خپلو قزاقي، تاجکستاني او جاپاني سیالانو ته ماتې ورکړې دي.
او همدارنګه فهیم انوري په بیا د لامبو وهلو په سیالیو کې د تاجکستان، پاکستان، قطر او مالدیف څخه خپلو سیالانو ته ماتې ورکړې دي.
دغه راز په دې سیالیو کې د افغانستان د رګبي ملي لوبډلې له دوو ماتو وروسته، د نیپال هیواد ملي لوبډلې ۴۱ پر صفر ماتې ورکړې ده.
دغه سیالۍ چې د چین هیواد د هانګژو ښار په کوربتوب د روانې میاشتې په ۲۳مې نېټې پیل شوې د راتلونکې اکټوبر میاشتې تر اتمې نېټې پورې به وغځيږي.
