په لسګونو سیکانو تېره ورځ په کاناډا کې د هند د ډیپلوماټیک ماموریت مخې ته د هردیپ سېنګ نجار د وژنې په ضد لاریون وکړ. دا لاریونونه وروسته له هغه کېږي، چې د کاناډا لومړي وزیر د هردیپ سېنګ نجار په وژنه کې د هند د حکومت د لاس لرلو احتمال څرګند کړ.
شاوخوا سلو لاریونوالو د هند بېرغ وسوځاوه او د هند د لومړي وزیر نریندرا مودي انځور يې په بوټونو وواهه.
سربېره پر دې، شاوخوا ۲۰۰ لاریونوال د کاناډا په ونګور ښار کې د هند د قونسلګرۍ مخې ته راټول شوي وو.
په اوټاوا کې شاوخوا سل کسان د هند د سفارت مخې ته راټول شوي وو او ژېړ بېرغونه یې ځړولي وو، چې د هند پنجاب ایالت د سېکانو لپاره په یوه خپلواک هېواد بدلولو سره یې خپل ملاتړ څرګند کړ.
په اوټاوا کې یو لاریون کوونکې رېشما سېنګ بولیناس وویل: «موږ واقعا د جسټېن ټروډو څخه مننه کوو." "کاناډا باید په هند فشار راوړي، چې په راتلونکي کې د بې ګناه خلکو وژنه بنده کړي.»
په ټورنټو او اوټاوا کې یو شمېر لاریونوالو په کاناډا کې د هند د سفیر سنجې کمار ورما د اېستلو غوښتنه وکړه، چې مخکې یې ویلي وو چارواکي له لاریونونو خبر وو او امنیت یې ورته نیولی دی.
د کاناډا لومړي وزیر جسټېن ټروډو د وږي په ۲۷ مه په پارلمان کې وویل، چې د هېواد امنیتي ادارې په بریټش کولمبیا کې د سېکانو د ټولنې د یوه مشر په وژنه کې د هند د حکومت د اجنټانو د لاس لرلو په اړه څېړنې کوي او همدا راز د کاناډا حکومت یو لوړ پوړی هندي دیپلومات له دغه هېواده واېست.
هند د ټروډو دا ادعا "بې بنسټه" وبلله او کاناډایانو ته یې د ویزو ورکول بند کړل.
کاناډا د شاوخوا ۷ لکه ۷۰ زره سېکانو کور دی او د خپل کور پنجاب ایالت څخه بهر د سېکانو تر ټولو لوی نفوس همدلته په کاناډا کې دی.
ډېری یې د هند په پنجاب ایالت کې د سېکانو لپاره د "خالصتان" حکومت د جوړولو ملاتړ کوي.
