کاظمي قمي: د مسکو غونډې یوه پرېکړه هم د افغان ګاونډیانو د تماس ډلې جوړول دي
د افغانستان لپاره د ایران ځانګړی استازی وايي، د مسکو غونډې یوه پرېکړه هم د دغه هېواد د ګاونډیانو او سیمه ییزو هېوادونو د تماس ډلې جوړول دي. د حسن کاظمي قمي په خبره، غرب د افغانستان په هکله د نړیوالې تماس ډلې ملاتړ کوي، خو «دا ډله به د امریکا او ناټو د ستنېدو په مانا وي.»
ښاغلی قمي وايي: « دا ډله د افغانستان د ګډوډۍ لامل ده او نه دا چې د شرایطو ښه والي کې به مرسته وکړي، بلکې ستونزې به نورې هم ډېرې کړي.»
نوموړی د خپل هېواد له دولتي رسنۍ سره خبرو کې زیاتوي چې د مسکو ناسته کې ګاونډي هېوادونه دې پرېکړې ته ورسېدل چې د ټولیز حرکت او سیمه ییز نوښت له لارې له طالبانو سره پر همکارۍ سربېره په افغانستان کې شرایط بدل کړي.
د هغه په خبره، د غونډې ګډونوال په دې نظر و چې په افغانستان کې د وضعیت د ښه والی لپاره د داسې حکومت جوړېدل پکار دي چې خلکو ته باور وړ او ځوابګو وي.
نوموړی وايي، په دې ناسته کې د طالبانو پلاوي ته هم وویل شول چې که د ګاونډیانو او سیمه ییزو هېوادونو ملاتړ غوړي، نو باید ځواب ویونکی او د خلکو باور وړ حکومت جوړ شي.
د مسکو فارمټ پنځمه غونډه وړمه ورځ د روسیې په کازان ښار کې جوړه شوې وه.
د غونډې پاییزه اعلامیه کې له طالبانو د ټولګډونه حکومت جوړولو، نشه يي توکو او وسلوالو ډلو سره پر مبارزه او د ښځو او انساني حقونو پر پرځایښت ټینګار شوی دی.
خو په دې اعلامیه کې د افغان کشالې د حل لپاره د ګاونډیانو او سیمه ییزو هېوادونو د تماس ډلې په هکله څه نه دي ویل شوي.
په دې غونډه کې د هند، ایران، قزاقستان، چین، قرغزستان، پاکستان، روسیې، ترکمنستان او ازبکستان، سعودي عربستان، قطر، متحده عربي اماراتو او ترکیې ځانګړو استازو او لوړ پوړو چارواکو حضور درلود.
د طالبانو د بهرنیو چارو وزیر امیر خان متقي د مېلمه په توګه بلل شوی و.