طالبان پلازمینې کابل ته پر غځېدلو لویو لارو جوماتونه جوړوي

د طالبانو مشر هبت الله اخوندزاده ته د منسوب حکم له مخې؛ دغه ډله پلان لري چې کابل ته په غځېدلو لویو لارو کې جومات جوړ کړي. د طالبانو تر کنټرول لاندې ملي ټلویزیون د دوشنبې په ورځ خبر ورکړی، چې دا پرېکړه د طالبانو د وزیرانو شورا له خوا تصویب شوه.

د دغې رسنۍ د خبر له مخې؛ په کابل کې د طالبانو والي محمد قاسم خالد د دغه فرمان د عملي کېدو په موخه د دغه ډلې د کرنې، فواید عامې، حج او اوقافو او ښار جوړونې ریاستونو له رییسانو سره وکتل.

په کابل کې د طالبانو والي ویلي دي، چې دا جوماتونه به په "ضروري" سیمو کې جوړ شي، چې په لویو لارو کې د لمونځ کوونکو لپاره د ځای د نشتوالي ستونزه هواره کړي.

طالبانو د دغو جوماتونو کره شمېر او ځای نه دی روښانه کړی او نه یې هم د جوړولو لګښت په ډاګه کړی دی.

په تېرو دوو کلونو کې دغې ډلې د جوماتونو او دیني مدرسو پر جوړولو ډېرې پیسې لګولې دي.