د فایننشل ټایمز د راپور له مخې؛ هند کاناډا ته تر ۱۸ میاشتو پورې وخت ورکړی چې له دغه هېواده خپل ۴۱ ډېپلوماټان وباسي. د هند او کاناډا اړیکې دا وخت سختې ترینګلې شوي، چې کاناډا د هند حکومت د سیک بېلتون غوښتونکي مشر او یو کاناډایی تبعه په وژنه کې په لاس لرلو تورن کړ.
ډیلي، چې مخکې یې هردیپ سینګ نیجار یو "ترهګر" بللی و؛ دا تورونه یې بې اساسه وبلل.
فایننشل ټایمز د باخبرو سرچینو په حواله لیکلي؛ هند ګواښ کړی چې له ۱۷ میزان وروسته به د کاناډایي ډېپلوماټانو معافیت لغوه کړي.
د دې ورځپاڼې په وینا؛ کاناډا په هند کې ۶۲ ډیپلوماټان لري او هند له دغو ډیپلوماټانو څخه د ۴۱ د وتلو غوښتنه کړې ده.
د هند او کاناډا د بهرنیو چارو وزارتونو په دې اړه څه نه دي ویلي.
د هند د بهرنیو چارو وزیر جی شنکر مخکې ویلي وو، چې په کاناډا کې د هندي ډیپلوماټانو پر وړاندې د "د ډار او تاوتریخوالي فضاء" شتون لري.
د پښتون ژغورنې غورځنګ مشر منظور احمد پښتین په تازه وینا کې چې د دوشنبې په ماښام د (تلې په ۱۰مه) پر خپله فیسوک پاڼه خپره کړې ویلي، هڅه کېږي چې د پروپاګند له لارې د پښتون ژغورنې غورځنګ بدنامه شي.
ښاغلي پښتین ویلي، د مودو راهیسي پښتانه پر خپله خاوره هیڅ ډول امن نه لري او د پښتنو د حقونو څخه د دفاع په موخه يې دغه غورځنګ رامنځته کړی، چې د پښتنو د ځورونو او پر هغوی د ظلمونو په غبرګون کې غږ پورته شي.
منظور پښتین وايي، د هرې غونډې او لاریون وروسته د دغه غورځنګ مهم غړي نیول کېږي« اوس د پښتون ژغورنې غورځنګ پر ضد پروپاګند پیل شوی، زموږ د غورځنګ غړي نیول کېږي او په زندانونو کې د غورځنګ د غړو سره په دې موخه ناانساني چلند کېږي، چې له غورځنګ څخه بېل شي.»
نوموړی وايي، د پاکستاني ادارو د مخنیوي له کوښښونو سربېره يې د روان کار په اګسټ میاشت کې په اسلام اباد کې د پښتنو د حقونو د دفاع په موخه غونډه وکړه؛ خو د پاکستاني ادارو له لوري د جلسې د مخنیوي په موخه د دغه غورځنګ شاوخوا ۱۳۰۰ تنه غړي تر نیول کېدو وروسته بندیان شول.
منظور احمد پښتین په خپلې دغه تازه وینا کې د نوې تګلارې او پلاونو په اړه هم غږېدلی دی.
نوموړي یوځل بیا د پښتون ژغورنې غورځنګ پر پلویانو غږ وکړ، چې د سویلي پښتونخوا او خېبر پښتونخوا په ډېرو سیمو کې د پښتنو له حقونو څخه د دفاع په موخه جلسو ته چمتوالی ونیسي.
نوموړی وايي: .«دا خاوره د نیابتي جکړو لپاره په هیڅ ډول هم چاته نه پرېږدو.»
د پښتون ژغورني غورځنګ د فعالیتونو د مخنیوي په موخه د پاکستان حکومت له هرې ممکنې لارې کار اخیستی دی.
تېره میاشت د پاکستان د حکومت له لوري په اسلام اباد کې د پښتون ژغورنې غورځنګ د مشر منظور احمد پښتین پر کور چاپه ووهل شوه، د دې تر څنګ د دغه غورځنګ مهم غړي علي وزیر، ګېلهمن وزیر او نورو کسانو ترڅنګ د غورځنګ ملاتړي او د بشري حقونو فعاله ایمان مزاري هم ونیول شوه.
د امریکا پخوانی ولسمشر ډونالډ ټرمپ د نیویارک یوې محکمې د خپلو شتمنیو په اړه د درغلیو او دروغ ویلو په تور احضار کړی دی.
ښاغلی ټرمپ د خپل مالي وضعیت په اړه د دروغ ویلو له امله له یو ملیارد ډالرو څخه په ډېرې ګټې اخیستو تورن شوی.
د امریکا پخوانی ولسمشر د دوشنبې په ورځ (د تلې ۹مه) د نیویارک په منهاټن ولسوالۍ کې یوې ملکي محکمې ته حاضر شو.
د ښاغلي ټرمپ څارنوال کیون والاس وویل، چې هغه د پورونو او بیمې لپاره خپل مالي وضعیت له ۲۰۱۱ کال څخه تر ۲۰۲۱ کال پورې نادرست بیان کړی و.
د نوموړي په وینا؛ دې کار د ښاغلي ټرمپ مالي ګټه شاوخوا یو ملیارد ډالرو ته لوړه شوې او د املاکو بازار ته یې لوی ګوزار ورکړ.
هغه ټینګار وکړ چې دا یو "جرم" دی چې "بې قربانۍ" نه دی. خو د ښاغلي ټرمپ وکیل کریسټوفر کیس په خپله دفاع کې ویلي، چې د امریکا د پخواني ولسمشر او د ټرمپ ادارې مالي چارې په بشپړه توګه قانوني دي.
نوموړي ټینګار وکړ: "د درغلۍ هېڅ اراده نه وه، هېڅ غلط کار قصدي نه دی شوی، هېڅ غیرقانوني کار نه دی شوی، نه هم په سود اتکا شوې او نه هم ناعادلانه عمل شوی دی."
که پر ډونالډ ټرمپ لګېدلي تورونه ثابت شي؛ ښايي تر ۲۵۰ میلیونه ډالرو جریمې او په نیویارک کې د هغه پر سوداګریزو فعالیتونو بندیز ولګول شي.
د ښاغلي ټرمپ محاکمه کولی شي، د هغه راتلونکې ټاکنیزې هلې ځلې اغېزمنې کړي.
د افغانستان لپاره د ملګرو ملتونو د بشري مرستو د همغږۍ دفتر وايي، چې د اسټرالیا هېواد له افغانستان سره پنځه میلیونه امریکايي ډالره بشري مرسته کړې ده.
اوچا پر خپلې اېکس پاڼې د اسټرالیا هېواد د مرستو خبر ورکړی او له هغوی یې د مننې تر څنګ زیاته کړې، چې د افغانستان خلک له بل هر وخته بشري مرستو ته زیاته اړتیا لري.
دغه دفتر زیاتوي، چې یادې مرستې به په بشري فعالیتونو ولګول شي او له نورو مرسته کوونکو څخه یې هم د مرستې غوښتنه کړې ده.
یاد سازمان څه موده وړاندې په خپل یوه راپور کې ویلي وو، چې افغانستان په شدید ډول له بشري کړکېچ سره مخ دی او که چېرې بشري مرستې ورسره ونه شي، ښايي بشري ناورین رامنځته شي.
په ورته وخت کې د خوړو نړۍوال سازمان هم وايي، چې ښځې په افغانستان کې د مرستو کمېدو تاوان پرې کوي.
دغه سازمان پر خپلې اېکس ټولنیزه پاڼه لیکلي؛ له یو میلیون څخه ډېرې مېندې او ماشومان به د بودیجې د کمښت له امله خوراکي مرستې ترلاسه نه کړي.
د دغه سازمان د معلوماتو له مخې؛ دمګړۍ په افغانسان کې څه باندې ۱۵ میلیونه وګړي له لوږي سره مخ دي. خو له افغانستان سره به د بشري مرستو د کمښت له امله په دغه هېواد کې د لوږې شمېري نورې هم لوړې شي.
د اروپايي ټولنې د بهرنیو چارو وزیرانو د کییف په یوې "تاریخي" غونډې کې له اوکراین سره د اروپايي ټولنې د اوږدمهاله ملاتړ اعلان وکړ. د اروپايي ټولنې د بهرني سیاست مسوول جوزب بورل ویلي، دا له اروپايي ټولنې بهر د ۲۷ غړو هېوادونو د بهرنیو چارو وزیرانو لومړۍ غونډه ده.
د اېکس ټولنیزې شبکې په یوه پوسټ کې ښاغلي بورل دا غونډه "تاریخي" وبلله او ټینګار یې وکړ، چې د اروپايي اتحادیې چارواکو د اوکراین له خلکو سره د پیوستون څرګندولو لپاره دې هېواد ته سفر کړی دی.
هغه د اوکراین پر وړاندې د روسیې جګړه د اروپا د وجود لپاره یو ګواښ وباله او خبرداری یې ورکړ، چې دغه جګړه د ټولې نړۍ لپاره جدي پایلې لري.
په همدې حال کې د امریکا ولسمشر جو بایډن له جمهوري غوښتونکو غوښتي چې اوکراین ته د لا زیاتو مرستو د ورکولو د پلان د تصویب ملاتړ وکړي.
د میزان په اتمه؛ د استازو جرګې او د امریکا سنا د فیډرالي ادارو لپاره ۴۷ ورځیني د تمویل پلان تصویب کړ، چې د متحده ایالاتو د حکومت د بندیدو مخه ونیسي.
لنډمهاله پلان په دې موده کې اوکراین ته نوې مرستې نه لري. په داسې حال کې چې ډېموکراټانو غوښتل د اوکراین د مرستو بهیر ته دوام ورکړي، د جمهوري غوښتونکو یوې برخې د دغو مرستو د محدودولو پر اړتیا ټینګار وکړ.
د امریکا د دفاع وزیر لوید اسټن هم له کانګرس څخه وغوښتل چې له اوکراین سره د مرستې لپاره نورې پیسې ځانګړې کړي. هغه ویلي دي چې امریکا باید د اوکراین د خلکو سره د خپل هېواد د دفاع په برخه کې پر خپلو ژمنو ودریږي.
د اوکراین د بهرنیو چارو وزیر دیمیټرو کولبا له کییف سره د مرستو د لغوه کولو لپاره د کانګرس موقتي پلان یوه "حادثه" وبلله او زیاته یې کړه، چې دا پرېکړه د اوکراین په اړه د واشنګټن په چلند کې د بدلون څرګندونه نه کوي.
د کرملین ویاند دیمیتري پیسکوف د امریکا د کانګرس د موقتي پلان په غبرګون کې ویلي، چې امریکا او اروپايي ټولنه د اوکراین له جګړې ستړي شوي دي. د هغه په وینا؛ مسکو دا وړاندوینه کړې وه.
پیسکوف دا اعلان هم وکړ چې دا فتوا به د لویدیځو هېوادونو ترمنځ د نظر اختلاف ته وده ورکړي.
د فرانسې د بهرنیو چارو وزیرې کاترین کولونا هم له اوکراین سره د مرستو د دوام په اړه د اروپايي ټولنې پر هوډ ټینګار وکړ او ویې ویل، چې په کییف کې د دې اتحادیې د بهرنیو چارو وزیرانو حضور دا پیغام ورکوي، چې مسکو باید وپوهېږي چې موږ له مرستو ستړي شوي نه یو.
دا څرګندونې په داسې حال کې کېږي چې د بریتانیا لومړي وزیر ریشي سناک پرون اعلان وکړ، چې لندن اوکراین ته د برېتانوي پوځي روزونکو د لېږلو نیت نه لري.
د بښنې نړۍوال سازمان د یوه کمپاین په پیلولو سره د فرانسې له حکومت څخه وغوښتل، چې افغان ښځو او نجونو ته د ویزو په ورکولو کې اسانتیاوې رامنځته کړي. تر اوسه څه باندې ۴۵۰۰ کسانو دغه غوښتنلیک لاسلیک کړی او له فرانسې یې غوښتي، چې افغان ښځو او نجونو ته دې دغه هېواد ته د تګ چانس ورکړي.
د بښنې نړۍوال سازمان د سنبلې له ۲۱ مې څخه د میزان ۱۰ پورې د دې غوښتنې په ملاتړ د لاسلیکونو راټولولو لپاره آنلاین غوښتنلیک پیل کړ او ۴۶۵۶ کسانو لاسلیک کړ.
د بښنې نړۍوال سازمان تېره اونۍ په پاریس کې د دې کمپاین د ملاتړ لپاره یوه غونډه جوړه کړه.
د دې غوښتنو په متن کې راغلي، چې طالبان په پراخ او منظم ډول نجونې او ښځې ځوروي.
د بښنې نړۍوال سازمان د حقوقي تحلیل له مخې؛ د دې ډلې چلند کېدای شي "د بشریت ضد جرم" وي.
د بشري حقونو دغه نړۍوال سازمان وايي، هغه ښځې چې د طالبانو له ظلمونو څخه ګاونډيو هېوادونو لکه؛ ايران او پاکستان ته تښتېدلي، په دغو هېوادونو کې هم له نورو ځورونو سره مخ دي.
د بښنې نړۍوال سازمان د بېلګې په توګه د ایران او پاکستان د سیمه ییزو چارواکو له خوا د دغو مېرمنو په خپلسري توګه نیول او افغانستان ته د هغوی د جبري ستنېدو خطر یاد کړی دی.
دغه سازمان لیکلي، چې د فرانسې ویزې د ګوتو په شمېر افغانو ښځو او نجونو ته ورکول کېږي، چې له خطر سره مخامخ دي او د دغه هېواد قونسلګرۍ له ډېر ځنډ سره د ویزې غوښتنې ته ځواب وايي.