د حماس او اسراییل د جګړې په اړه د برازیل پرېکړه لیک د امریکا د ویټو له امله تصویب نه شو

د حماس او اسراییل ترمنځ د جګړې د بشرپاله بندولو لپاره د برازیل لخوا وړاندیز شوی پرېکړه لیک د ملګرو ملتونو په امنیت شورا کې د امریکا د ویټو له امله تصویب نه شو. دغې مسودې په اسراییل او غزه کې ټول تاوتریخوالی غندلی او غزې ته یې د مرستو د رسولو غوښتنه کړې ده.

په ملګرو ملتونو کې د امریکا استازې لینډا ماس ګرینفیلډ وویل: «د برازیل د پرېکړه لیک په مسوده کې هېڅ یادونه نه ده شوې، چې اسراییل د ځان د دفاع حق لري».

اوس مهال ولسمشر جو بایډن، د بهرنیو چارو وزیر انټوني بلېنکن او د ملګرو ملتونو سرمنشي انټوني ګوټرش له اسراییل سره د غزې په تړانګه کې فلسطینیانو ته د بشرپاله مرستو رسولو لپاره د خبرو اترو په حال کې دي.