ملګري ملتونه: د غزې په جګړه کې ۷۰ سلنه وژل شوي کسان ښځې او ماشومان دي

په داسې حال کې چې پر غزې د اسراییل بریدونه زیاتیږي، د اسراییل لومړي وزیر د جګړې د پای ته رسولو لپاره نړۍوالې غوښتنې رد کړې دي.

د الجزیرې تلویزیونې شبکې د سې شنبې په ورځ (د لړم په ۹مه) راپور ورکړ، چې اسراییلي ځواکونو په غزه کې د اورپکو په پراخو د تونلونو شبکه کې دننه د حماس له وسله والې ډلې سره جګړه کړې.

دا تونلونه د اسراییل اصلي موخه ده؛ ځکه چې دوی د غزې له شمال څخه سویل ته د حماس د ځپلو لپاره خپل ځمکني بریدونه پراخوي.

ګومان کېږي، چې په دغه تونلونو کې د حماس شاوخوا ۲۴۰یرغمل شوي کسان ساتل کېږي.

حماس هم ویلي، چې د غزې په سویلي سیمو کې یې پر اسراییلي ځواکونو برید کړی او څلور اسراییلي واسایط یې په راکټونو په نښه کړي دي.

حماس ویلي، چې د دوی وسله والو د غزې په شمال لویدیځ کې پر دوو اسراییلي ټانکونو او بلدوزرونو ډزې کړې دي.

د اسراییل پوځ اعلان کړی، چې یو "هوايي هدف" یې مخکې له نېژدې کېدو شنډ کړی دی.

همداشان د یمن حوثیانو ویلي، چې دوی د اسراییل پر لور یو زیات شمېر بالستیک توغندي او بې پیلوټه الوتکې توغولي، چې دا د دوی درېیم عملیات دي، چې اسراییل په نښه کوي.

په غزه کې د تلفاتو مخ په زیاتېدونکي شمېر د امریکا متحده ایالات، یو شمېر هېوادونه او ملګري ملتونه دې ته اړ کړي، چې د بشري مرستو د رسولو لپاره د جګړې د درولو غوښتنه وکړه.

ملګرو ملتونو او نورو مرستندویه ادارو خبرداری ورکړی، چې د عامې روغتیا ناورین په غزه کې ملکي وګړي ځپلي، روغتونونه د زیاتو تلفاتو او د خوراکي توکو، درملو، د څښاک اوبو او سون موادو له کمښت سره مبارزه کوي.

د اسراییل پوځ په یوې بیانیه کې اعلان وکړ: «تېره ورځ د اسراییل دفاعي ځواکونو شاوخوا ۳۰۰ هدفونه په نښه کړل، چې په کې د ټانک ضد توغندیو اډو او همدارنګه د تروریستي سازمان حماس اړوند د ځمکې لاندې تونلونو کې دننه پوځي مجتمع ګانې شامل دي».

حماس په یوې بیانیه کې اعلان وکړ، چې د دوی جنګیالي له اسراییلي ځمکنیو ځواکونو سره په درنه جګړه بوخت دي، چې دوی ته یې مرګ ژوبله اړولې ده. حماس ویلي: «غزه به تل د اشغالګرو هدیره وي».

عیني شاهدانو د سې شنبې په ورځ وویل، چې اسراییلي ځواکونو تنګه ساحلي سیمه کې په هوایي، سمندري او ځمکنیو بریدونو کې بمباري وکړه او په شمال لویدیځو سیمو یې بریدونه وکړل.

د دوشنبې په ورځ اسراييلي ځواکونو د غزې اصلي سړک له شماله تر جنوبه په نښه کړ او د غزې پر ښار يې له دوو خواوو بريد وکړ.

د غزې روغتیايي چارواکي وايي، د اسراییل په بریدونو کې تر اوسه ۳زرو ۵۴۲ ماشومانو په ګډون ۸ زره او ۵۲۵ کسان وژل شوي دي.

د ملګرو ملتونو چارواکو ویلي دي، چې د غزې د ملکي وګړو له ۲.۳ میلیونو څخه ۱.۴ میلیونه بې ځایه شوي دي.

اسراییل ویلي دي، چې د حماس په بریدونو کې شاوخوا ۱۴۰۰ اسراییلیان چې زیاتره یې ملکي وګړي دي وژل شوي دي.

د ناورې د بهرنیو چارو وزیر اسپن بارت ایډي رویټرز سره په یوې مرکه کې ویلي، په داسې حال کې چې اوسلو له اسراییل څخه ملاتړ کوي؛ خو بشري حقونه باید مراعات شي.

هغه وویل، چې د جنګیالیو او ملکي وګړو ترمنځ باید توپیر وشي او ډاډ ورکړل شي چې نظامي بریدونه متناسب دي او ملکي وګړو او زیربناوو ته پکې ډېر زیان نه اوړي.

هغه چې په متحده عربي اماراتو کې خبرې کولې وویل: «موږ باور لرو، چې داسې قضیې شته چې دې توپیر او تناسب ته په بشپړه توګه درناوی نه دی شوی».

په ابوظبۍ کې د اسراییل سفارت په دې اړه څه نه دي ویلي؛ خو دغه هېواد وایي چې ځواکونه یې ملکي کسان نه په نښه کوي.

د فلسطین د روغتیايي چارواکو په وینا؛ د اسراییل په بمباریو کې تر ۸۰۰۰ زیات کسان وژل شوي دي.

ناروې د ۱۹۹۲-۱۹۹۳ خبرو اترو کې د اسراییل او فلسطین د ازادۍ سازمان ترمنځ د اسانتیاوو برابرونکي په توګه دنده ترسره کوله.

له هماغه وخته ناروې د مرستندوی په توګه سیمه کې د فلسطین لپاره نړۍوالې مرستې همغږي کوي.

د غزې په تړانګه کې فلسطینیانو ته د لا زیاتو بشري مرستو رسولو لپاره په جګړه کې د موقتي اوربند غوښتنه د اسراییل لخوا رد شوې ده.

بارت ایډي وویل: "هغه څه چې موږ په غزه کې وینو یو ډېر خطرناکه ډراماتیک بشري وضعیت دی".

هغه په غزه کې وضعیت ویرونکي وباله ځکه چې د اسراییل له خوا د څو اونیو بمبارۍ وروسته خلک د اوبو، برېښنا، خوړو او طبي توکو څخه بې برخې دي.

بارت ایډي وویل: «دا یوازې له قانوني اړخه نه دی مهم، دې مسالې ته باید سیاسي حل لارې هم ولټوو. موږ اړتیا لرو چې د فلسطین او اسراییل د جګړې اصلې مسالې ته ورسیږو».

ناروې هم د حماس دغه بریدونه غندلي دي.

شاو خوا ۲۰۰ نارویژي اتباع په غزه کې بند پاتې دي او د وتلو لار نه لري.

د ټوکیو په شمال کې د ورابي پولیسو په یوه بیان کې ویلي، چې یوه سړي د سې شنبې په ورځ (اکټوبر په ۳۱مه) په یوه پوسته کې نامعلوم شمېر کسان یرغمل کړل.

رویټرز د ښار د پولیسو په حواله راپور ورکړی، چې شکمن سره د لاسي ټوپک په څېر یو څه ښکاري.

ځایي جاپاني رسنیو راپور ورکړی، چې لږ تر لږه دوه ښځینه کارکونکې چې عمرونه یې د ۲۰ او ۳۰ کلونه دي یرغمل شوې دي.

د جاپان ملي تلویزیون (NHK) راپور ورکړی، چې د یرغمل کېدو څو شیبې وروسته شل کلنه ښځه د پوستې له ودانۍ څخه ویستل شوې او د پولیسو تر څارنې لاندې ده.

جاپاني چارواکو ویلي، چې مشکوک کس شاوخوا ۸۰ کاله عمر لري.

په ورته وخت کې د جاپان ځايي رسنیو ویلي، چې د تودا ښار په یوه روغتون کې د ډزو له امله دوه تنه ټپیان شوي دي.

رسنیو راپور ورکړی، چې د شکمن په اړه اټکل کیږي چې د ۵۰ او ۷۰ کلونو تر منځ عمر لري، پر موټر سایکل د پېښې له ځایه تښتیدلی.

تر اوسه معلومه نه ده، چې دا دواړه پېښې سره تړاو لري او که نه.

رویټرز د جاپان د ملي پولیسو د ادارې په حواله راپور ورکړی، چې تېر کال په هېواد کې د ډزو نهه پېښې شوي.

د جاپان د ملي پولیسو اداره وايي، دا پېښې تېر کال د څلورو کسانو د وژل کېدو لامل شوې وې.
​

د غزې د جګړې په اړه د یوه پرېکړه لیک د تصویب لپاره د څلور ورځينۍ ناکامې هڅې وروسته د ملګرو ملتونو امنیت شورا د دوشنبې په ماښام (د اکتوبر ۳۰مه) د متحده عربي اماراتو په غوښتنه په غزه کې د اوربند د بیا کتنې په موخه غونډه وکړه.

د امنیت شورا په غونډه کې متحده عربي اماراتو په غزه کې په روغتونونو، کلینیکونو او د ملګرو ملتونو په تاسیساتو کې د نړۍوالو بشري قوانینو د رعایت غوښتنه وکړه.

په ملګرو ملتونو کې د جاپان استازي، کیمي هیرو ایشیکان وویل: "د بل بې ګناه انسان وژل د منلو وړ نه ده، پرته له دې چې د دوی قومیت، مذهب یا توکم ته پام وشي".

په ملګرو ملتونو کې د روسیې استازي واسیلي نیبنزیا وویل "بشري اوربند کافي نه دی".

هغه ټینګار وکړ، چې امنیت شورا باید په دې برخه کې منظمې غونډې ته ژمن وي.

په ملګرو ملتونو کې د امریکا سفیرې لیندا توماس ګرینفیلډ له غړو هېوادونو وغوښتل، چې د کړکېچ د زیاتېدو د مخنیوي لپاره هڅې وکړي.

هغې په ​​دې شورا کې ویتو شویو پرېکړه لیکونو ته په اشارې سره وویل: د حیرانتیا خبره ده، چې د حماس دغه کړنې د عمومی اسمبلۍ له خوا ونه غندل شوې.

په ملګرو ملتونو کې د فلسطین استازي ریاض منصور د اوربند په اړه د ملګرو ملتونو د سرمنشي د غوښتنې هرکلی کړی؛ خو په دې سازمان کې د اسراییل دایمي استازي ګیلاد اردان ویلي: "موږ به د تباهۍ پر وړاندې له ځانه دفاع وکړو".

د اسراييل او فلسطين تر منځ د شخړو له پيل وروسته په امنيت شورا کې څلور مسودې وړاندې شوې؛ خو تصويب شوې نه دي.

له دغو پرېکړه ليکونو څخه يو يې د امريکا، بل د روسيې او چين له خوا ويټو شو او نور دوه پرېکړه ليکونو د تصويب لپاره نهه مثبتې رايې ترلاسه نه کړې.

ټاکل شوې ده، چې د دې غونډې دویمه ورځ نن سې شنبه (د لړم ۹مه) د ماسپښین په یوه بجه جوړه شي.

ښاغلي کریلوف زیاته کړه: "موږ داسې اسناد لرو، چې دا تاییدوي چې متحده ایالاتو په عراق او افغانستان کې د بیولوژیکي وضعیت او د چین، ترکیې، پاکستان او سعودي عربستان په پولو کې جاسوسي کوله".

هغه د سې شنبې په ورځ (لړم په ۹ مه ) په یوه خبري غونډه کې وویل، چې د پنټاګون یوه دنده د هېوادونو «بیولوژیکي جاسوسي» ده.

ایګور کریلوف د امریکا د دې اقدام موخه د سرحدونو په اوږدو کې د ایپیډیمولوژیکي وضعیت تحلیل ګڼلی.

بل خوا د روسیې د دفاع وزیر سرګي شویګو چې چین ته یې سفر کړی، د دوشنبې په ورځ (د لړم په ۸مه) د «ژیانګ شان» په سرمشریزه کې اعلان وکړ، چې د اوکراین په ګډون په هېوادونو کې د امریکا پوځي حیاتي فعالیتونه مخ پر زیاتېدو دي.

امریکا تر اوسه د لوړ پوړو روسي پوځي چارواکو دغو څرګندونو ته غبرګون نه دی ښودلی؛ خو تر دې مخکې یې په دغو مواردو کې د روسیې ادعاوې "دروغ" بللې وې.
​