د ملګرو ملتونو د خوړو نړۍوال پروګرام په اېکس پاڼه د یوه خبر په خپرولو سره ویلي چې، په راروان ژمي کې د کورنیو د لاسنیوي لپاره ۴۰۰ مېلیونه امریکايي ډالرو ته اړتیا لري.
د دغې ادارې د افغانستان څانګې لیکلي، په افغانستان کې سخت ژمي ته یوازې څو اوونۍ پاتې دي او په غرنیو سیمو کې د واورو له امله به د خلکو د تګ راتګ لارې تړلې وي.
د افغانستان په سړو سیمو کې هر کال د واورې له ورېدو سره مواصلاتي لارې تړل کېږي او ډېرې کورنۍ په سختۍ سره د اړتیا وړ خوراکي توکي ترلاسه کوي.
له دې سره، د بشري حقونو د ښځو د څانګې مرستیالې هېدر بار په خپلې اېکس پاڼه لیکلي، چې د بشري ناورین او د ژمي په درشل کې د یو مېلیون افغان کډوالو اېستل بله "ظالمانه" کړنه ده چې افغانان ورسره مخامخ دي.
له تېرو څو میاشتو راهیسې ډېر شمېر مرستندویه ادارو د بودجې د کمښت په اړه اندېښنې څرګندې کړې؛ خو داسې ښکاري چې دا ستونزه تراوسه هم نه ده هواره شوې.
د یادونې ده چې، د افغانستان روان وضعیت او د ژمي په رارسېدو سره د بشري ناورین اندېښنې لازیاتې شوې دي.
