د افغانستان لپاره د امریکا سرپرسته کرن ډېکر د کابل د پرونۍ چاودنې له قربانیانو سره د خواخوږۍ پر ښودلو سربېره د امنیت او عدالت هیله څرګنده کړې ده. د کابل په دشت برچي کې د سپرلۍ پر موټر د چاودنې له امله ۷ کسان وژل شوي او ۲۰ نور ټپیان دي. داعش د دې برید مسوولیت منلی دی.
کرن ډېکر د چارشنبې په ورځ دې برید ته په اشارې پر خپلې اېکس پاڼې لیکلي، چې افغانستان له ننګونو سره مخ دی؛ خو «ترهګرو» ته باید اجازه ور نه کړل شي چې له دې ننګونو کار واخلي.
د هغې په خبره؛ افغانان د خوندیتوب احساسولو او عدالت واکمنېدو مستحق دی.
نوموړې پر خپلې اېکس پاڼې د افغانستان د بشري حقونو لپاره د ملګرو ملتونو د ځانګړي راپورټر ریچارډ بېنېټ له یادولو سره د دې پېښې د ځوابولو غوښتنه کړې ده.
ریچارډ بېنېټ هم پر اېکس د دې برید له غندلو سره د دې پېښې د عاملانو د پېژندلو او عدالت پلي کولو خواست کړی دی.
هغه ویلي؛ په یوه میاشت کې دا درېیم برید دی چې پکې په دشت برچي کې هزاره افغانان په نښه کېږي.
پخواني افغان ولسمشر حامد کرزي هم پرونۍ چاودنه غندلې ده.
لا هم د دې چاودنې ډول مالوم نه دی، چې د سپرلۍ موټر پکې په نښه شوی.
