د اسراییل د دفاع وزیر د دوشنبې په ورځ اعلان وکړ، چې حماس د غزې تړانګې کنټرول له لاسه ورکړی دی. په ورته وخت کې اسراييلي رسنيو د غزې په پارلمان کې د اسراييلي پوځ یو انځور خپور کړی، چې د دغه هېواد بېرغ يې د بريا د نښې په توګه پورته کړی دی.
ټایمز اف اسراییل د دغه هېواد د دفاع وزیر له قوله لیکلي چې: «حماس نه شي کولای د اسراییل د دفاعي ځواکونو د پرمختګ مخه ونیسي، حماس د غزې کنټرول له لاسه ورکړی دی، ترهګر سویل ته تښتي او خلکو د حماس اډې لوټ کړې دي.»
تر اوسه خپلواکو سرچینو د یواو ګالانټ څرګندونې نه دي تایید کړي.
ګالانټ ویلي، چې د دوی ځواکونو له پخواني پلان سره سم پرمختګ کړی او د حماس ډلې د تونلونو ویجاړولو ته یې زور ورکړی دی.
د راپورونو له مخې، د اسراییلي ځواکونو او فلسطیني وسلهوالو ترمنځ د غزې د تر ټولو لوی روغتیایي مرکز الشفاء روغتون څخه بهر نښتې شوې دي.
د جګړو زیاتوالی د دې لامل شوی، چې په زرګونه خلکو چې په دغه روغتون کې یې پناه اخیستی وه، له هغه ځایه وتښتي.
له دې سره، د اسوشېټېډ پرېس د راپور له مخې، سلګونه ناروغان او نور کسان تراوسه هم په روغتون کې پاتې دي.
د روغتیا نړۍوال سازمان د دوشنبې په ورځ وویل چې، دغه روغتون له تېرو درېیو ورځو راهیسې اوبه او برېښنا نه درلوده او تر ډېره له فعالیته لوېدلی دی.
