د خوړو نړۍوال پروګرام په افغانستان کې د انساني ناورین د زیاتېدو خبرداری ورکړ

د خوړو نړۍوال پروګرام همداراز زیاتوي، په افغانستان کې د طالبانو له واکمنۍ وروسته بشري ناورین "د باور وړ کچې" ته رسېدلی او شاوخوا په ۲۵ ولايتونو کې خوراځواکي له بېړنۍ کچې هم پورته ده.

د خوړو د نړۍوال پروګرام د شمېرو له مخې، په افغانستان کې اووه مېلیونه وګړي د سخت ژمي د تېرولو له پاره بېړنیو مرستو ته اړتیا لري.

دغه بنسټ ویلي، واک ته د طالبانو له رسېدو وروسته ډېر شمېر افغانانو خپلې دندې له لاسه ورکړي او دا د دې لامل شوی چې بشري ناورین لا پسې پېچلی او د اندېښنې وړ شي.

له دې سره په افغانستان کې د امریکا د سفارت شارژدافیرې کرېن ډېکر بیا ویلي، چې افغانان له پر له پسې ناورینونو څخه د تېرېدو لپاره مرستو ته اړتیا لري.

نوموړې په دوحه کې د افغانستان لپاره د خوړو د نړۍوال پروګرام له استازي او د یو شمېر نورو مرستندویه ادارو له چارواکو سره په لیدنه کې ویلي، چې د امریکا متحده ایالات له افغانستان سره د بشري مرستو د یوه ستر تمویلوونکي هېواد په توګه باید د هر لګول شوي ډالر حساب ورکړي.

د خوړو د نړۍوال پروګرام په باور، د راتلونکو دوولسو میاشتو لپاره له پنځو کلونو د کم عمره ماشومانو څخه کابو نیمایي او یو پر څلورمه برخه میېدواره او شیدې ورکوونکې مېرمنې د ژوند ژغورنې له پاره د خوراکي توکو ملاتړ ته اړتیا لري.

د خوړو د نړۍوال پروګرام د راپور په یوه بله برخه کې د هرات ولایت د وروستیو زلزلو قربانیانو ته په اشارې سره ویلي چې، نړۍواله ټولنه باید په افغانستان کې د انساني ناورین مخه ونیسي.

دا په داسې حال کې ده، چې تر دې مخکې د نړۍوالو ادارو له‌خوا داسې راپورونه خپاره شوي وو، چې د افغانستان ۸۵ سلنه وګړي د بې‌وزلۍ تر سرې کرښې لاندې ژوند کوي.