د طالبانو د کورنیو چارو وزارت په یوې خبرپاڼه کې ویلي، چې دغه ځواک به د عامه نظم د ځواکونو په اډانه کې چارې پر مخ وړي؛ خو د دغه ځواک د تشکیل او نورو دندو په اړه یې زیات جزییات نه دي خپاره کړي.
د قوش تېپې کانال چې د هېواد په شمال کې د اوبو د مدیریت تر ټولو ستره پروژه ده، د جمهوري نظام پر مهال یې هم د جوړېدو هڅې شوې وې.
له هغه مهاله چې طالبانو د دغې پروژې د رغونې چارې پیل کړې، په کور دننه د تاوده هرکلي سره مخامخ شوي دي.
خو تر څنګ یې ځینو شمالي ګاونډیو هېوادونو یې په اړه اندېښنې په ډاګه کړې وې او ویلي یې و، چې د دغه کانال په جوړېدو سره ښایي د دوی د اوبو د مدیریت چارې اغېزمنې شي.
دا رنګه په دې وروستیو کې یو شمېر طالب چارواکو دا هم ډاګیزه کړې وه، چې پاکستان له دوی څخه غوښتي چې د دغه کانال چارې دې وځنډوي، هغه ادعا چې د پاکستان له لوري په کلکه رد شوې وه.
ځیني کتونکي وايي، د دغه کانال لپاره د نوي ځواک ګومارل ښايي د ګاونډیو هېوادونو د لاسوهنې د منخیوي لپاره یوه تازه هڅه وي.
په ټوله کې د قوش تېپې کانال د اوبو د مدیریت هغه ستره پروژه یادېږي، چې ورسره د شمالي ولایتونو زرګونه جریبه ځمکه خړوبېدای او لسګونه زره افغانان د کارکولو جوګه کېدای شي.
