د اکسفورډ پوهنتون د څېړنو پایلې ښيي چې مصنوعي ځیرکتیا لس کاله مخکې په خلکو کې د زړه د حملې د خطر اټکلولی شي. څیړونکي په دې باور دي چې دا ټکنالوژي د زرګونو خلکو ژوند ژغورلی او همداراز د شاوخوا نیمایي ناروغانو د درملنې پروسې ته وده ورکولی شي.
دا څیړنه د برتانیا د زړه بنسټ په غوښتنه شوې او د زړه په سي ټي سکنونو کې یې د دقت په زیاتوالي کې د مصنوعي ځیرکتیا رول څیړلی دی.
د سي ټي سکن ازموینه د شریانونو د بندیدو یا تنګیدو په تشخیص کې مرسته کوي.
د بریتانیا د زړه بنسټ کې د زړه ناروغۍ مشر او د اکسفورډ پوهنتون د اکسېرې مرکز رییس پوهاند کارالامبوس انتونیادس وویل، څیړنو ښودلې چې ځینې ناروغان چې د سینې درد لپاره روغتون ته راځي، حتا که دوی کې د زړه د ناروغۍ نښې نښانې نه وي، په راتلونکو لسو کلونو کې د زړه د حملو له خطر سره مخ دي.
ډاکټران دا ډول ناروغان له لومړنیو ازموینو وروسته کور ته لیږي.
اوسنۍ څیړنه ښیي چې ډاکټرانو ته د شته خطرونو کره انځور وړاندې کول د زړه د ډېرو ناروغانو د درملنې بهیر تر ډېره بدلولی او ښه کولی شي.
په بریتانیا کې هر کال شاوخوا ۳۵۰ زره خلک د سي ټي سکن ازمویته کوي، خو د زړه بنسټ د راپور له مخې، د وخت په تیریدو سره، ډیری یې د ستونزې د نه تشخیص له امله له زړه حملې سره مخ کیږي او مري.
د اکسفورډ پوهنتون څیړونکود په اتو بېلابېلو بریتانیايي روغتونونو کې د ۴۰ زرو څخه ډیرو ناروغانو معلومات څیړلي چې په منظمه توګه د سي ټي سکن ازموینې کوي.
د دې معلوماتو تجزیې او تحلیل د ۲/۷ کلونو اوسط موده نیولې ده.
د دې څیړنې لپاره رامنځته شوی د مصنوعي ځیراکتیا وسیله د اتو کلونو په موده کې په ۳ زره او ۳۹۳ نورو ناروغانو ازمویل شوې او په دې توانیدلی چې د زړه د حملې د خطر کره وړادوینه وکړي.
له دې ناروغانو څخه د ۷۴۴ کسانو لپاره ترلاسه شوې پایلې د دوی ډاکټرانو ته لیږل شوې او د دوی د درملنې په پلانونو کې یې ۴۵ سلنه بدلون راوستی.
څیړونکي هیله من دي چې د مصنوعي ځیرکتیا پورې اړوند دا ټکنالوژي به ډیر ژر د بریتانیا د ملي روغتیا خدماتو کې پلې شي ترڅو په هېواد کې د زړه له حملې څخه د زرګونو ناروغانو د مړینې مخنیوی وکړي.
