له تېرو دوو ورځو راهیسې د پاکستان په لاهور کې ۴۰ الوتنې لغوه شوې او لسګونه یې ځنډېدلې دي، چې له امله یې د الوتنو عملیات سخت اغېزمن شوي دي. لاهور، سیالکوټ او نورو ښارونو ته د الوتنو عملیات د سختې لړې او لوګي له امله ګډوډ شوي دي.
د راپورونو له مخې څلوېښت الوتنې لغوه شوې، شپږ نورې نورو هوايي ډګرونو ته اړول شوې او لسګونه نورې ځنډول شوې دي.
د امارات اېر الوتنه دوبۍ څخه سیالکوټ ته ښکته نه شوه او بېرته دوبۍ ته ستنه شوه، په داسې حال کې چې د پي ای اې دوحې - لاهور الوتنه په اسلام اباد کې ښکته شوه او ګوانګزو، جده او دوبۍ الوتکې هم په اسلام اباد کې ښکته شوې.
له کراچۍ څخه لاهور ته تلونکې الوتکه بېرته کراچۍ ته ستنه شوې.
له بلې خوا، د هوايي ډګر د مهال وېش له مخې نن د لاهور او بېلابېلو هوايي ډګرونو ۱۵ پروازونه لغوه شوي دي.
د دې ترڅنګ د لړې او لوګي له امله د لاهور- اسلام اباد موټروې هم وتړل شوه.
