د طالبانو مشر ملا هبت الله په ملکي او پوځي څانګو کې نوې ګومارنې کړي او له ۳۰ زیات کسان یې بدل رابدل کړي دي. د دغې ډلې ویاند ذبیح الله مجاهد په دوو جلا خبر پاڼو کې په درېیو ولایتونو کې د امنیه قومندانانو، ښاروالانو او یو مستوفي په ګډون د پنځو نویو ګومارلو خبر ورکړی دی.
نوموړي بیا په بله خبر پاڼه کې د طالبانو د دفاع وزارت اړوند په پوځي لیکو کې د ۲۸ تنو د نوې ګومارنې او له یوې قول اردو نه بلې ته د هغوی د بدلولو رابدلولو خبر ورکړی، چې ټول د لوا ګانو او قول اردو د مرستیالانو په توګه نوي ګومارل شوي دي.
په دغو غبرګو خبرپاڼو کې ویل شوي، چې دغه ټولې ګومارنې د طالبانو د ډلې مشر ملا هبت الله په خوښه شوې دي.
له دغو ګومارنو داسې ښکاري، چې د دوی مشر که څه هم چې د دویم ځلي واک ته له رسېدو سره، لومړی تر ډېره سمبولیک کس بلل کېده؛ خو اوس داسې برېښي، چې په هر اړخیزه توګه ځان بشپړ واکمن کس بولي او ان د ښاري حوزو تر امرینو او د هغوی تر مرستیالانو پورې په خپله خوښه ټاکي.
ځیني کتونکي بیا داسې وايي، د طالبانو مشر هڅه کوي چې د پوځ په لیکو کې ټول ځان ته وفادار کسان وګوماري او یا داچې په دې وروستیو کې یې پر ځینو کسانو او ځانګړو کړیو ویسا او باور کم شوی دی.
