کرزي او عبدالله د ایران په کرمان ښار کې خونړۍ چاودنې وغندلې
د افغانستان پخواني ولسمشر حامد کرزي او پخواني اجراییه رییس ډاکټر عبدالله عبدالله د ایران په کرمان ښار کې چاودنې په کلکه غندلې او دا «ترهګریز» عمل یې د انسانیت ضد کار بللی دی.
د افغانستان پخواني ولسمشر حامد کرزي او پخواني اجراییه رییس ډاکټر عبدالله عبدالله د ایران په کرمان ښار کې چاودنې په کلکه غندلې او دا «ترهګریز» عمل یې د انسانیت ضد کار بللی دی.
ښاغلي کرزي او عبدالله د چهارشنبې په ماښام په اېکس ټولنیزې شبکې لیکلي، د ایران په کرمان ښار کې چاودنه چې ګڼ شمېر هېوادوال پکې شهیدان او ټپیان شوي یو ترهګریز او د انسانیت خلاف عمل دی او له ټولو انساني او اسلامي اصولو او ارزښتونو سره په ټکر کې دی.
دواړو ښاغلو د ایران له خلکو او حکومت سره خواخوږي ښودلې او ټپیانو ته یې د عاجلې روغتیا هیله کړې.
د ایران په کرمان ښار کې له دوو خونړیو چاودنو وروسته د ایران د بېړنیو حالاتو د ادارې چارواکو اعلان وکړ چې په دغو چاودنو کې لږ تر لږه ۱۰۳ کسان وژل شوي او ۱۷۱ کسان ټپیان دي.
دا چاودنې د ایران د سپاه پاسداران د قدس ځواکونو د پخواني قوماندان قاسم سلیماني د مړینې د څلورم تلین غونده کې شوې دي.
