د پاکستان په سند صوبې کې ناپېژاندو وسله والو درې پولیس تښتولي دي
د پاکستان د سند صوبې پولیس وايي، چې درې تنه پوليس هغه وخت وتښتول شول چې له رونټي له پوستې څخه خپلې قرار ګاه ته پر لار وو.
د پاکستان د سند صوبې پولیس وايي، چې درې تنه پوليس هغه وخت وتښتول شول چې له رونټي له پوستې څخه خپلې قرار ګاه ته پر لار وو.
د سند پولیسو د یوې خبر پاڼې په خپرولو سره ویلي، چې دغه پولیس نن چهار شنبه (د سلواغې څلورمه) د ناپېژاندو وسلوالو له خوا تښتول شوي دي.
اعلامیه کاږي، چې دا مهال د پولیسو یوه ډله د رونټي سیمې ته رسېدلې او د یادو پولیسو په لټه چاڼیز عملیات پیل شوي دي.
تر اوسه کومې وسلوالې ډلې د دغې تښتونې مسوولیت پر غاړه نه دی اخیستی.
دا په روان کال کې د خپل ډول دویمه پېښه ده، چې په پاکستان کې رامنځته کیږي؛ له دې وړاندې یو پولیس په بلوچستان کې د وسلوالو له خوا تښتول شوی و.
نېږدې دوه میاشتې وړاندې د بلوڅانو د نسل وژنې پر ضد لسګونو مېرمنو په اسلام اباد کې د اسلام اباد پرېس کلب مخې ته پرلت وهلی و، چې ویل یې چې «د پاکستان حکومت له لوري بېګناه بلوڅان وژل او تېري تم کیږي.»
د دغه پرلت سرلارې ماه رنګ بلوڅ نن په یوې خبري غونډې کې وویل، چې د اسلام اباد په سختې یخنۍ کې یې په ازاده فضاء کې شپې او ورځې تېرې کړې؛ خو د پاکستان حکومت یې غوښتنې ونه منلې.
نوموړې د پاکستان حکومت ته وویل: "له څنګه چې تاسو د مظلومو بلوڅانو پر وړاندې خپله کرکه او نفرت وښوده؛ موږ ته هم اوس ډېره ښه معلومه شوه، چې ستاسو له مظلومو بلوڅانو سره د دښمنۍ اعلان کړی دی."
د ماه رنګ بلوڅ په خبره؛ دوی به بېرته بلوچستان ته ځي او د پاکستان د غیر اسلامي او غیر انساني کردار په اړه به په بلوچستان کې مېشتو بلوڅانو ته خبر ورکوي.
نوموړې وايي، چې د دوی مبارزه یو بل پړاو ته رسېدلې او په پوره زغم او حوصله به له خپلو حقونو څخه دفاع کوي.
ماه رنګ بلوڅ وویل، چې په پلازمېنه کې له دوی سره انساني چلند نه دی شوی، د دې پر ځای چې حکومت د دوی بشري غوښتنې ومني له دوی سره یې د زور زیاتي، ربړونې او بندي کولو لړۍ پیل کړې ده.
اغلې بلوڅ وویل، چې سلګونه بلوڅان ورک او لا یې معلومات نه کیږي، چې چېرې او له چا سره دي؛ خو د پاکستان حکومت یې هم په اړه څه نه وايي.
پرلت کوونکو د پاکستان حکومت ته ګوت څنډنه وکړه، که د دوی غوښتنې و نه منل شي؛ نو ټول بلوڅان به په یوه خوله او یو اواز سره راپورته کېږي او د خپلو حقونو غوښتنه به کوي.
دوی وايي؛ غوښتنې یې پر حقه دي او د خپلو خلکو د تری تم کېدو او نسل وژنې د مخنیوي غوښتنه کوي.
دا لا نه ده معلومه، چې د بلوڅ مېرمنو بېرته تلونکي پرلتوال به په بلوچستان کې د پاکستان د حکومت پر وړاندې له کوم رد عمل څخه کار اخلي؛ خو د پاکستان حکومت د یادو پرلتوالو په تړاو څه نه دي ویلي.