د طالبانو د زندانونو د چارو سمون ادارې مرستیال حبیب الله بدر له طلوعنیوز سره په مرکه کې ویلي، په ټول افغانستان کې اوسمهال د محبوسینو شمېر تر ۱۹۳۰۰ تنو رسېږي چې په دې کې ۸۰۰ یې ښځینه بندیانې دي.
هغه وایي، چې د دغې ډلې شاوخوا ۲۵۰ غړي هم چې د «خطا په ترسره کولو تورن وو نیول شوي» او اوسمهال د افغانستان په زندانونو کې بندیان دي.
هغه دا رنګه وویل، چې شاوخوا ۲۵ بهرنيان هم د دوی سره بندیان دي؛ خو د هغوی د هویت او پېژنګلوۍ په اړه یې زیات توضیحات نه دي ورکړي.
تر دې وړاندې د روان کال په زمري میاشت کې دغې ادارې ویلي و، چې شاوخوا ۱۶۰۰۰ کسان د دوی په زندانونو کې بندیان دي چې له زرو ډېرې یې ښځې او ۱۶ یې بهرنیان دي.
تر دې وړاندې د طالبانو د بهرنیو چارو وزیر امیرخان متقي په ایران کې د افغان کډوالو په یوه غونډه کې ویلي و، چې د دوی سره په زندانونو کې هیڅ یو سیاسي بندي نه شته او هغه بندیان چې له دوی سره دي ټول یې د جنايي جرمونو له کبله بندیان شوي دي؛ خو په افغانستان کې ډېر داسې کسان نیول شوي او زندانونو ته اچول شوي، چې د طالبانو پر کړنو یې نیوکې کولې او یا هم سیاسي او مدني فعالان دي.
