ولادیمیر پوتین یو ځل بیا د روسیې ولسمشریزو ټاکنو ته نوماند شو
د روسیې د ټاکنو مرکزي کمېسیون د دوشنبې په ورځ د دې هېواد ولسمشریزو ټاکنو ته د نوماند په توګه د ولادیمیر پوتین د نوم لیکنې اعلان وکړ.
د روسیې د ټاکنو مرکزي کمېسیون د دوشنبې په ورځ د دې هېواد ولسمشریزو ټاکنو ته د نوماند په توګه د ولادیمیر پوتین د نوم لیکنې اعلان وکړ.
ټاکل شوې ده، چې د دې هېواد ولسمشریزې ټاکنې په راتلونکې مارچ میاشت کې ترسره شي.
د یاد کمېسیون چارواکو ویلي، چې د ولادیمیر پوتین د ټاکنیزو کمپیانونو دفتر د نوموړي د بیا ټاکل کېدو لپاره توانیدلی، چې ۳۱۵ زره لاسلیکونه را ټول کړي.
د روسیې د ټاکنو د قوانینو پربنسټ؛ هر هغه کس چې غواړي د دې هېواد د ولسمشریزو ټاکنو لپاره نوم لیکنه وکړي، باید د خپلې نوماندۍ لپاره لږ تر لږه ۳۰۰ زره لاسلیکونه راټول کړي.
ولادیمیر پوتین د ولسمشریزو ټاکنو څلورم نوماند دی، چې په راتلونکو ټاکنو کې یې د برخې اخېستو لپاره د روسیې د ټاکنو د مرکزي کمېسیون رسمي سند تر لاسه کړی دی.
ښاغلی پوتین له ۱۹۹۹ کال څخه تر اوسه پورې د روسیې د ولسمشر او لومړي وزیر په توګه پاتې شوی؛ خو په دوامداره توګه ولسمشري یې له ۲۰۱۲ کال څخه تر اوسه روانه ده.
د یادولو ده، چې پوتین د ۲۰۱۸ کال د ټاکنو له ګټلو دوه کاله وروسته د دغه هېواد اساسي قانون بدل کړ، چې له مخې یې کولی شي تر ۲۰۳۶ کاله پورې د ولسمشر په توګه پاتې شي.
