د طالبانو تر واک لاندې له ارګه په خپرې شوې خبرپاڼه کې راغلي، چې د دوی د کابینې په غونډه کې د بهرنيو چارو وزارت ته دنده سپارل شوې، چې په نورو هېوادونو کې د افغان بنديانو په اړه له هغو هېوادونو سره خبرې اترې وکړي او د خلاصولو لپاره یې لارې چارې ولټوي.
تر دغې خبر پاڼې وړاندې هم د یو لړ جوړچاړیو په پایله کې له پاکستان او ایرانه هم یو شمېر افغان بندیان خوشې شوي وو؛ خو داسې هم ویل کېږي چې لا هم سلکونه نور افغانان په دغو دوو هېوادونو کې بندیان دي چې د ډېرو هغو یې لا هم برخلیک جوت شوی نه دی.تر دې مخکې د ایران د بهرنیو چارو وزارت د قنسولي چارو مشر علي رضا محمودي د ایران د ایسنا خبري اژانس سره په مرکه کې ویلي و، چې د ایران په زندانونو کې د نورو هېوادونو پرتله زیات شمېر افغانان بندیان دي، چې شمېر یې نږدې شپږ زرو ته رسېږي.د ایران د بهرنیو چارو وزارت دغه چارواکي د افغان بندیانو د جرمونو په اړه زیات جزییات نه و ورکړي؛ خو ځینو نورو ایراني چارواکو ویلي وو، چې اکثره افغانان په ایران کې د اوسېدنې د قانوني اسنادو د نه لرلو تر څنګ د نشهيي توکو د قاچاق او ځینو نورو جنايي جرمنو له امله بندیان شوي دي.له بله پلوه له هغه مهاله چې د اسلام اباد او په کابل کې د واکمنو طالبانو تر منځ تربګني پیل شوه، ګڼ افغانان په دې تور چې ګواکې د اوسېدو لپاره قانوني اسناد نه لري بندیان شوي دي، چې له هغې ډلې یې یو شمېر له پولې په زوره اړول شوي او د پاتې نورو برخلیک لا معلوم نه دی.
