د هند شارژدافير له افغانستان سره د سوداګریزو اړیکو پر دوام ټینګار وکړ
نن چې په کابل کې د افغانستان د سیمهییزې همکارۍ ابتکار غونډه ترسره شوه، د هند شارژدافیر ویلي چې هېواد یې له افغانستان سره خپلو سوداګریزو اړیکو ته دوام ورکوي.
نن چې په کابل کې د افغانستان د سیمهییزې همکارۍ ابتکار غونډه ترسره شوه، د هند شارژدافیر ویلي چې هېواد یې له افغانستان سره خپلو سوداګریزو اړیکو ته دوام ورکوي.
په کابل کې د هند شارژدافير په دغه غونډه کې چې د دوشنبې په ورځ (د سلواغې ۹مه) نېټه د طالب چارواکو په کوربتوب په کابل کې ترسره شوه، همدا راز یې له افغانانو سره خپلې اړيکې تاريخي وبللې او د دواړو هېوادونو ترمنځ یې د همکاريو پر داسې یوې تګلارې ټينګار وکړ، چې د افغانانو په ګټه وي.
نوموړي د غونډې ګډونوالو ته د خبرو پرمهال همدا راز د چابهار بندر له لارې له افغانستان سره د سوداګریزو اړیکو په پرختیا هم ټينګار وکړ.
په ورته وخت کې په کابل کې د پاکستان شارژدافير عبیدالرحمن نظاماني بیا د افغانستان د سیمهییزې همکارۍ ابتکار په غونډه کې په سيمهييز اقتصادي اتصال کې د افغانستان رول مهم بللی دی.
ښاغلي نظاماني زیاته کړې، چې طالبانو د افغانستان په اقتصاد او امنیت کې د پام وړ پرمختګ کړی او د سترو اقتصادي پروژو پلې کولو ته یې ښه زمینه برابره کړې ده.
دغه خبرې په داسې حال کې مطرح کیږي چې په دې وروستیو کې د کابل او اسلام اباد ترمنځ اړیکې د پاکستان د امنیتي وضعیت د خرابیدو او له دغه هیواده د زرګونو افغان کډوالو د اېستلو له امله ترینګلې شوې دي.
د ویلو ده، چې پر افغانستان د طالبانو له واکمنۍ وروسته بیا د هند او افغانستان ترمنځ اړیکې پیکه شوې دي.
