خيبرپښتونخوا ته د نوماند اعلی وزیر د نیولو غوښتنه شوې
د پاکستان د تحریک انصاف ګوند د غړي او د خیبر پښتونخوا د اعلی وزیر څوکۍ له پاره د نوماند علي امین ګندا پور د نیولو غوښتنه شوې ده.
د پاکستان د تحریک انصاف ګوند د غړي او د خیبر پښتونخوا د اعلی وزیر څوکۍ له پاره د نوماند علي امین ګندا پور د نیولو غوښتنه شوې ده.
سره له دې چې تر اوسه ښاغلي ګنداپور د دغې څوکۍ لپاره لوړه نه ده کړې؛ خو پر نوموړي تور پورې شوی چې په ۲۰۲۱ کال کې یې په ازاد کشمیر کې د ټاکنو پر مهال ټاکنیزې سرغړونې کړي او نوموړی دې د دغې څوکۍ پر ځای محکمې ته راکاږل شي.
دا رنګه د ډېره اسماعیل خان له پولیسو هم غوښتنه شوې، چې هغه دې ونیسي او محکمې او قانوني ادارو ته دې یې وسپاري.
پر ښاغلي ګنداپور دغه تور د وکیل ذوالقرنین لهخوا لګول شوی دی.
هغه دغه تور د ۲۰۲۱ کال په فبرورۍ میاشت کې پر ښاغلي ګنداپو لګولی و، چې د ازاد کشمیر په ټاکنو کې یې د یو ولاړ نوماند په ګټه کمپاین چلولی دی، په لګول شوي تور کې ویل شوي چې نوموړی هغه مهال د پخواني لومړي وزیر عمران خان د واکمنۍ پر وخت وفاقي وزیر و او له خپل واکه یې ناوړه ګټه پورته کړې وه.
له دې وروسته به ښاغلی ګندا پور محکمې ته حاضرېږي او ښایي د ضمانت په ورکولو سره یې دغه تور وځنډول شي.
په پېښور کې ازاد خبریال رفعت الله ورکزي افغانستان انټرنشنل ته وویل، چې پر ښاغلي ګندا پور له دې وړاندې هم له شلو زیات نور تورونه شته، چې ښایي په راتلونکې کې به يو په یو پر نوموړي ولګول شي او د هر تور د سپینولو له پاره هغه اړ دی چې محکمې ته ځواب ووایي.
داسې راپورونه هم شته، چې یو شمېر سیاستوال لکه اسد قيصر، مشتاق غني، عاطف خان او شهرام ترکۍ هم د خیبر پښتونخوا د اعلی وزیر د څوکۍ له پاره د علي امين ګنډاپور په نوماندۍ ناخوښه دي.
